ايتا كەتەيىك, 2024 جىلدىڭ جەلتوقسان ايىنا دەيىن مۇنداي تۇرعىندارعا كورسەتىلەتىن جەڭىلدىك الۋدىڭ ماشاقاتى كوپ ەدى: اكىمدىككە الەۋمەتتىك كومەككە مۇقتاج جانداردىڭ ءتىزىمى جىبەرىلەدى, كەيىن دەرەكتەر ابونەنتتەر بازاسىنداعى مالىمەتپەن سالىستىرىلادى. ءبىر ادام مەكەنجايىن اۋىستىرسا نەمەسە كەيبىر دەرەكتەر قاتە تۇسسە, مۇقتاج جان كومەكتەن قاعىلادى.
سوندىقتان 2024 جىلدىڭ جەلتوقسان ايىنان باستاپ ەلىمىزدىڭ ەنەرگەتيكا مينيسترلىگىنىڭ قولداۋىمەن ەڭبەك جانە حالىقتى الەۋمەتتىك قورعاۋ مينيسترلىگى, تسيفرلىق دامۋ, يننوۆاتسيالار جانە اەروعارىش ونەركاسىبى مينيسترلىگى, «QazaqGaz Aimaq» اق بىرىگىپ, eGov Mobile جۇيەسىندە «الەۋمەتتىك ءاميان» باعدارلاماسى ارقىلى جاڭا تسيفرلىق جۇيەنى ىسكە قوسقان ەدى.
مىنە, قازىر بارلىق ءۇردىس اۆتوماتتاندىرىلعان. جوعارىداعى ازاماتتارعا ەندى 1414 نومىرىنەن جەڭىلدىك جونىندە SMS-حابارلاما كەلىپ تۇسەدى. ولار باعدارلاماعا قاتىساتىنىن راستاپ, وزدەرىنىڭ جەكە شوتىن كورسەتەدى. بولدى. بۇل قانشاما ۋاقىتتى ۇنەمدەۋگە, قاتەلىكتەردى بولدىرماۋعا اسەر ەتىپ جاتىر. ءارى الەۋمەتتىك كومەكتىڭ اشىقتىعى مەن قول جەتىمدى بولعانىن ايتىڭىز.
- پيلوتتىق جوبا رەتىندە تسيفرلىق جۇيەنىڭ ەنۋى تۇرعىنداردى الەۋمەتتىك قولداۋ سالاسىن دامىتۋعا ەرەكشە اسەر ەتەدى. قازىر «QazaqGaz Aimaq» اق جۇيەنى ودان ءارى جەتىلدىرۋ ءۇشىن مونيتورينگ جاساپ جاتىر. ءاربىر مۇقتاج ازامات الەۋمەتتىك كومەكتەن تىس قالماۋى ءتيىس, - دەيدى بىزگە جاعىمدى جاڭالىقتى جەتكىزگەن باتىس قازاقستان وبلىسى اكىمىنىڭ ءباسپاسوز حاتشىسى ەرحان تاتكەن.
بۇگىندە باتىس قازاقستان وبلىسى 99,8%-عا تابيعي گاز جۇيەسىمەن قامتاماسىز ەتىلگەن. گاز قۇبىرلارىنىڭ جالپى ۇزىندىعى 10 063 شاقىرىمعا سوزىلىپ جاتىر. كوگىلدىر وتىندى قاۋىپسىز تاسىمالداۋ, تۇتىنۋشىعا جەتكىزۋ سالاسىندا «QazaqGaz Aimaq» اكتسيونەرلىك قوعامى بقو فيليالىنىڭ 536 جۇمىسشىسى ەڭبەك ەتىپ كەلەدى.
