كارتوپ قورى جەتكىلىكتى

كورشى ەلدەردىڭ, اسىرەسە وزبەكستان تاراپىنان سۇرانىستىڭ ارتۋىنا جانە ەكسپورتتىق باعانىڭ جوعارى بولۋىنا بايلانىستى بيىل كارتوپ ەكسپورتى 1,5 ەسەگە, ياعني 411 مىڭ توننادان 605 مىڭ تونناعا دەيىن ءوستى. كارتوپقا دەگەن اسا جوعارى سۇرانىس ىشكى نارىققا اسەر ەتكەنى اتاپ ءوتىلدى. ماسەلەن, كەيىنگى اپتادا ەكسپورتقا باعىتتالعان وندىرۋشىلەر اراسىندا باعانىڭ كۇرت ءوسۋى (170 تەڭگەدەن 270 تەڭگەگە دەيىن) تىركەلدى.

وسىعان بايلانىستى ىشكى نارىقتاعى كارتوپ باعاسىن تۇراقتاندىرۋ ماقساتىن­دا 2025 جىلعى 18 قاڭتاردا وتكەن ساۋدا قىزمەتى ماسەلەلەرى جونىندەگى ۆەدومستۆو­ارا­لىق كوميسسيا وتىرىسىندا كارتوپ­تى ءۇشىن­شى ەلدەرگە اكەتۋدى 6 اي مەرزىمگە شەكتەۋ تۋرالى شەشىم قابىلداندى. بۇل شارا ەاەو ەلدەرىنە قولدانىل­ماي­دى, الايدا بۇل باعىتتاعى ەكسپورت­قا باقىلاۋ جۇرگىزىلەدى. سونىمەن قاتار قالىپتاسقان جاع­دايدى ەسكەرە وتىرىپ, بيىلعى 16 قاڭ­تار­دا ەكسپورتقا فيتوسانيتاريالىق سەر­تي­فيكاتتار بەرۋ تولىعىمەن توقتاتىلدى.

قابىلدانعان شارالار كارتوپ باعاسىنىڭ تۇراقتىلىعىن قامتاماسىز ەتۋگە, باعانىڭ نەگىزسىز وسۋىنە جول بەرمەۋگە جانە نارىققا قاتىسۋشىلار تاراپىنان الىپساتارلىق ارەكەتتەردى بولدىرماۋعا باعىتتالعان.

سونداي-اق ساۋدا جانە ينتەگراتسيا مينيسترلىگىنىڭ اۋماقتىق ورگاندارى مونوپولياعا قارسى ورگاننىڭ اۋماقتىق بولىمشەلەرىمەن بىرلەسە وتىرىپ, جاعدايعا كۇشەيتىلگەن قاداعالاۋ جۇرگىزەدى جانە ساۋدا قىزمەتى ماسەلەلەرى بو­يىن­شا قولدانىستاعى زاڭنامانى بۇز­عان جاعدايدا ولار نارىققا قاتىسۋ­شى­لارعا شۇعىل ىقپال ەتۋ شارالارىن قابىلدايدى.

اشم دەرەكتەرىنە سۇيەنسەك, بۇگىنگى تاڭدا قولدا بار قورلار 2025 جىلعى ەرتە ەگىن جيناۋ ناۋقانىنا دەيىن ىشكى قاجەت­تىلىكتى تولىق جابۋ ءۇشىن جەت­كىلىكتى. 19 قاڭتارداعى جاعداي بويىنشا قورلار ساۋدا جەلىلەرىندەگى قورلار­دى ەسەپكە الماعاندا 850 مىڭ توننا­دان اسادى (كارتوپ وسىرۋشىلەر قاۋىمداس­تىعى بويىنشا 600 مىڭ توننا, تۇ­راق­تاندىرۋ قورلارىنداعى 68 مىڭ توننا, جەكە قوسالقى جانە شاعىن شارۋاشى­لىقتارداعى جەرتولەلەردە 200 مىڭ توننادان استام).

بىلتىر كارتوپتىڭ جالپى ءونىمى 2,9 ملن توننانى قۇرادى (ونىڭ ىشىندە ەرتە ءونىم – 300 مىڭ توننا). سونىمەن قاتار يمپورت 56 مىڭ توننا بولدى. نارىققا تاراتۋ ءۇشىن كارتوپتىڭ كولەمى 2024 جىل­دىڭ تامىز ايىنان باستاپ 2,6 ملن تون­نانى قۇرايدى, حالىقتىڭ جالپى قاجەتتىلىگى – 1,5 ملن توننا (ونىڭ ىشىندە قالالىق 954 مىڭ توننا) ەرتە ەگىن جيناۋ ناۋقانىنا دەيىن (قاڭتار-ءساۋىر). 2024 جىلعى تامىزدان جەلتوقسانعا دەيىن 844 مىڭ توننا تۇتىنىلدى, 620 مىڭ توننا ەكسپورتتالدى (2024 جىلعى قاڭتاردان جەلتوقسانعا دەيىن). 2025 جىلعا ارنالعان بولجامدى تۇتىنۋ كولەمى (قاڭتار-ءساۋىر) – 675 مىڭ توننا.