شاڭعىشىلارىمىز بي-اتلوننان سپرينتتىك سايىستا ولجا سالدى. ەرلەر دوداسىندا 10 شاقىرىمدىق قاشىقتىقتى 23 مينۋت 14 سەكۋندتا وندىرگەن جەرلەسىمىز نيكيتا اكيموۆ ءدۇبىرلى دودانىڭ چەمپيونى اتاندى. 49 سپورتشىنىڭ اراسىنان قارا ءۇزىپ شىققان ساڭلاق نىسانانى كوزدەي اتۋدىڭ ەكى كەزەڭىندە دە بارلىق مۇمكىندىگىن ءمۇلت جىبەرمەي ءدوپ تيگىزدى.
التىن مەدال – نيكيتانىڭ ايتۋلى الامانداعى سۇبەلى تابىسى. ەلىمىزدىڭ بياتلوننان ەرەسەكتەر قۇراماسىنا وتكەنىنە كوپ بولا قويماعان سايىپقىران قاتىسۋشىلار اراسىندا تەگەۋرىندى باسەكەلەستەرى كوپ بولعانىن ايتتى. ء«بىز, وتانداسىم پولينا ەگوروۆا ەكەۋىمىز سپرينتتىك سايىستىڭ الدىندا ميكس-ەستافەتا دوداسىندا (ەرلەر 7,5 شاقىرىم, ايەلدەر 6 شاقىرىم) 4-ورىندى مىسە تۇتتىق. قولا جۇلدە ولجالاۋعا مۇمكىندىك تۋىپ, تارتىسقا تۇسكەندە كۇشىمىزدى سارقىپ الدىق. مەدال بۇيىرماعانى ەڭسەمدى ءتۇسىرىپ-اق جىبەرىپ ەدى. بۇگىنگى 10 شاقىرىمدىق سايىستىڭ ەكىنشى اينالىمىنا كەلگەندە تاعى دا جۇلدەسىز قالام با دەگەن قوبالجۋ بولدى. بىراق بارىمدى سالىپ, نىسانانى كوزدەپ اتۋدا دا قاتەلەسپەي ءدوپ تيگىزدىم. جاھاندىق دودانىڭ التىن مەدالىن ەلىمىزگە تارتۋ ەتكەنىمە قۋانىشتىمىن», دەدى ن.اكيموۆ.
قىسقى ۋنيۆەرسيادانىڭ كەزەكتى مەدالىن قانجىعامىزعا بياتلوننىڭ سپرينت سايىسىنان ارينا كريۋكوۆا بايلادى. 7,5 شاقىرىمدى ول 23 مينۋت 17 سەكۋندتا ءوندىردى. جەرلەسىمىز نىسانا كوزدەۋدىڭ ءبىرىنشى سىنى, جەر باۋىرلاپ جاتىپ نىسانانى كوزدەۋدە بارلىق مۇمكىندىگىن ءدوپ تيگىزسە, ەكىنشى تىك تۇرىپ كەزەنۋدە ەكى مۇمكىندىگىن ءمۇلت جىبەرىپ الدى. دەگەنمەن دە ۋاقىتتى ۇتىمدى پايدالانا وتىرىپ, جىلدامدىعىن ۇدەتىپ, قولا جۇلدەگەر اتاندى. ارينا دا سپورتتىق مانسابىنداعى العاشقى مەدالىن ولجالادى.
دۇنيەجۇزىلىك قىسقى ۋنيۆەرسيادا ويىندارىندا پاراشاڭعىدان دەنيس زينوۆ 1 400 مەترگە سپرينتتىك سايىستا كۇمىس مەدال ەنشىلەدى. ول بۇعان دەيىن 10 شاقىرىمعا ەركىن ستيلدە تارتىسقا ءتۇسىپ تە كۇمىس جۇلدە العان ەدى. قازاق سپورت جانە تۋريزم اكادەمياسىنىڭ ستۋدەنتى كەلەشەكتە پاراليمپيادانىڭ چەمپيونى اتانۋعا بارىن سالاتىنىن جەتكىزدى. «قىسقى ۋنيۆەرسيادانىڭ باعدارلاماسىنا پاراشاڭعى سايىسى العاش رەت قوسىلدى. سوعان قاراماستان باسەكەلەستىك وتە جوعارى. باپكەرلەردىڭ ەڭبەگى اقتالدى, دەگەنمەن وكىنىشىم دە جوق ەمەس, ەكى مەدالىمنىڭ ءبىرى التىن بولعاندا, شىركىن... كەلەشەكتە پاراليمپيادا سايىسىندا جەڭىسكە جەتۋگە بارىمدى سالامىن. تۋريندەگى تارتىس بىزگە وتە اۋىر سوقتى. سەبەبى تاۋلى وڭىرگە تابانىمىز تيگەننەن كليماتقا ۇيرەنىسۋ وڭاي بولمادى. سوعان قاراماستان بارىمىزدى سالدىق», دەدى سپورتشى. كوللەدجدە وقىپ جۇرگەندە اياعىنا شاڭعى ىلگەن سپورتشى 7 جىلدا وسىنداي بيىككە قول جەتكىزىپ وتىر.
پاراشاڭعىدان 1 400 مەتر قاشىقتىقتا (سپرينت) قوستاناي كوللەدجىنىڭ ستۋدەنتى رومان قۇربانوۆ قولا جۇلدە ەنشىلەدى.
