ال استانادا قالىڭ قار جاۋىپ, كوممۋنالدىق قىزمەت تاۋلىك بويى ۇزدىكسىز جۇمىس ىستەپ جاتىر. قالا كوشەلەرىن قاردان تازارتۋعا 3 مىڭعا جۋىق مامان مەن 1 500-گە جۋىق تەحنيكا جۇمىلدىرىلدى.
كەلەسى اپتادان باستاپ ەلىمىزدىڭ بىرنەشە ايماعىندا كۇن رايى بۇزىلادى. "قازگيدرومەت" تۇندە اۋا تەمپەراتۋراسى تومەندەپ, كەي وڭىردە قاتتى اياز بولادى دەپ بولجاپ وتىر. ال بۇگىن شىعىس قازاقستان مەن اباي وبلىستارىندا جولدار جابىلىپ, بارلىق كولىك تۇرلەرىنە قوزعالىس شەكتەلگەن. "قازاۆتوجول" ماماندارى جۇرگىزۋشىلەرگە الىس ساپارعا شىقپاس بۇرىن ساقتىق شارالارىنا ءمان بەرۋدى ەسكەرتەدى.
- جول پايدالانۋشىلارعا 1403 بايلانىس ورتالىعى تاۋلىك بويى قىزمەت كورسەتەدى. بايلانىس ورتالىعىنا حابارلاسىپ, جولدىڭ جاعدايىن بىلۋگە بولادى. بۇدان بولەك, ەگەر ءسىز رەسپۋبليكالىق جولداردىڭ بىرىندە كولىگىڭىز بۇزىلىپ قالاتىن بولسا, كومەك سۇراۋعا بولادى. ءبىز مامانداردى جىبەرىپ, كولىگىڭىزدى سۇيرەپ, قولدان كەلگەنشە كومەك بەرەمىز, - دەدى "قازاۆتوجول" كومپانياسىنىڭ رەسمي وكىلى ساكەن دىلداحمەت.
ال توتەنشەلىكتەر جىل باستالعالى جولدا قالعان 250-دەن استام ادامدى قۇتقارعان. ونىڭ 29-ى بالا ەكەن. قۇتقارۋشىلار جىلىتۋ بەكەتتەرىنە 350-گە تارتا ادامدى اپارىپ, قار قۇرساۋىنان 42 تەحنيكا شىعارعان. قازىر ەل بويىنشا 1 مىڭ 500-دەن استام جىلىتۋ بەكەتى جۇمىس ىستەپ تۇر. وسى كۇنى رەسپۋبليكالىق جولداردى ون ءۇش مىڭنان اسا تەحنيكا مەن وتىز جەتى مىڭ مامان تازارتىپ ءجۇر.
- 18 وبلىستا داۋىلدى ەسكەرتۋ كەلىپ ءتۇسىپ جاتىر. سوندىقتان جولعا شىعار الدىندا جۇرگىزۋشىلەرگە ايتا كەتەتىنىمىز – مىندەتتى تۇردە سول ەسكەرتۋلەرگە ءمان بەرۋ كەرەك. ودان كەيىن بىزدە كوماندىلاق ورتالىقتا, توتەنشە جاعدايلار مينيسترلىگىنىڭ كوماندالىق ورتالىعىندا تاۋلىك بويى رەسپۋبليكالىق جەدەل شتاب ءوز جۇمىسىن اتقارادى, - دەدى قر تجم توتەنشە جاعدايلاردى جويۋ دەپارتامەنتىنىڭ باس مامانى ديدار قاجىكەنوۆ.
ەلوردادا تاڭنان بەرى توقتاۋسىز جاۋعان قار قاس قارايا باسىلدى. كوممۋنالدىق قىزمەت ماماندارى قالانى اق ۇلپادان تازارتۋعا كىرىسىپ كەتكەن. ءتىپتى شاھارداعى قار كۇرەۋ جۇمىستارىنىڭ سالدارىنان كوشەدە كەپتەلىس بولىپ جاتىر. قالا بيلىگى ءبىر تۇندە 24 مىڭ تەكشە مەتردەن استام قار شىعارىلعانىن ايتتى.
