پوليتسيا مايورى بەرقان ورالحان ۇلى بۇعان دەيىن دە بىرنەشە ماراپاتقا يە بولعان. سونىڭ ءبىرى 2023 جىلى ءى دارەجەلى «ىشكى ىستەر ورگاندارىنىڭ ۇزدىگى» توسبەلگىسىن تاققان. بۇگىنگى ماراپاتى تىپتەن ەرەكشە, قۇندى. رەسپۋبليكادا «جىل ۇزدىگى» اتانىپ وتىر. ارىپتەستەرى دە مايوردىڭ مۇنداي اتاققا ابدەن لايىق ەكەنىن ايتادى. كريميناليستيكا سالاسىنا 2012 جىلى كەلىپ, سول ۋاقىتتان بەرى از قىلمىستىڭ بەتى اشىلعان جوق.
– 2012 جىلى وسكەمەننىڭ سترەلكا شاعىن اۋدانىن پاترۋلدەپ ءجۇرىپ, بۇرىن-سوڭدى سوتتى بولعان ازاماتتى ۇستادىق. ىشكى تۇيسىك ءدال سول ازاماتتىڭ تەگىن جۇرمەگەنىن سەزدىردى مە, توقتاتىپ, تىنتتىك. ارينە, زاڭ اياسىندا. سوندا الگى ازاماتتىڭ سومكەسىنەن وقتاۋلى تاپانشا شىقتى. بالكىم, قانداي دا قىلمىستىڭ الدىن الدىم با, باسشىلىق بۇل ەڭبەگىمدى ەسكەرۋسىز قالدىرمادى. بۇدان دا باسقا قىلمىس ىزدەرى اشىلدى. ءتىپتى, ءبىر عانا زاتتان ءىز الىپ, از ۋاقىتتىڭ ىشىندە كۇدىكتىنى قۇرىقتاعانىمىز بار, – دەيدى بەرقان ورالحان ۇلى.
ۇزدىك پوليتسەي كۇرشiم اۋدانى, بۇگىنگى باراق باتىر اۋىلىندا دۇنيەگە كەلگەن. اۋەلدە ۆ.بۋنتوۆسكيح اتىنداعى تولىق ەمەس ورتا مەكتەپتە وقىعان. ودان سوڭ قۇيعان اۋىلىنداعى ش.ءۋاليحانوۆ اتىنداعى ورتا مەكتەپتە ءبىلىم الۋىن جالعاستىرىپ, 1997 جىلى تۇلەپ ۇشقان. سول جىلدىڭ كۇزىندە وسكەمەندەگى د.سەرiكباەۆ اتىنداعى شىعىس قازاقستان تەحنيكالىق ۋنيۆەرسيتەتىنە وقۋعا ءتۇسiپ, ونى 2003 جىلى تامامداعان. ءسال كەيىن قۇقىقتانۋ ماماندىعى بويىنشا شىعىس قازاقستان ايماقتىق ۋنيۆەرسيتەتىندە ەكىنشى جوعارى ءبىلىمىن العان. 2006 جىلدىڭ مامىرىندا قارۋلى كۇشتەر قاتارىنا شاقىرىلىپ, اسكەري بورىشىن وتەگەن. اسكەر قاتارىندا «بمپ-دا» باعىتتاۋشى-وپەراتور لاۋازىمىندا ءجۇرىپ, 2007 جىلى كىشى سەرجانت اسكەري اتاعىمەن زاپاسقا اۋىستىرىلدى. سول جىلى وسكەمەندەگى ءىىم ۋچيليششەسىندە قىزمەتكەرلەردى العاشقى دايىنداۋ كۋرستارىنان ءوتتى. ءسويتىپ, ىشكى ىستەر ورگاندارىنا جۇمىسقا ورنالاسقان. العاشىندا ۇلان اۋدانى پوليتسيا ءبولىمىنىڭ ۋاقىتشا ۇستاۋ يزولياتورىندا قىزمەت اتقاردى. تۇڭعىش وفيتسەرلىك شەنىن 2012 جىلى وسكەمەن قالاسى پوليتسيا باسقارماسىنىڭ جەدەل كريميناليستيكالىق بولىمشەسىندە كريميناليست لاۋازىمىندا ءجۇرىپ العان. مۇندا توعىز جىل قىزمەت اتقارىپ, قاراعاندى قالاسىنداعى ىشكى ىستەر اكادەمياسىندا وقىپ, داكتيلوسكوپيالىق, تراسولوگيالىق, بالليستيكالىق جانە سۋىق قارۋعا زەرتتەۋلەر جۇرگىزۋ كۋالىكتەرىن العان. سول جىلدارى ءوزى دە ۇستازدىق ەتىپ, بىرنەشە جاس قىزمەتكەردى دايىندادى. قازىرگى ۋاقىتتا ولار وزىمەن بىرگە كاپيتان شەنىندە قىزمەت اتقارادى. ايتقانداي, «تالىمگەر» توسبەلگىسىن دە يەلەنگەن.
ال پوليتسيا دەپارتامەنتىنىڭ جەدەل كريميناليستيكا باسقاراماسىنىڭ كريميناليسى لاۋازىمىنا 2021 جىلى تاعايىندالعان. قازىرگى ۋاقىتتا شقو پد جكب-نىڭ اعا كريميناليسى لاۋازىمىندا بالليستيكالىق زەرتتەۋلەرمەن جانە مەملەكەتتىك وق-گيلزا قويماسىن قالىپتاستىرۋ بويىنشا جۇمىس اتقارادى.
ايتىپ وتكەندەي, كريميناليستيكا ارقاسىندا اشىلعان قىلمىستار سانى از ەمەس. ول ءۇشىن ىشكى ىستەر مينيسترىنەن جانە شقو پد باسشىلىعىنان بىرنەشە رەت ماراپات العان. بەرقان ورالحان ۇلى جۇمىستان قولى قالت ەتسە, وتباسىنا كوڭىل بولەدى. ۇلكەن قىزى جوعارى ءبىلىمىن الىپ, ەڭبەك جولىنا تۇسكەن. ال كىشى ۇلى مەكتەپتە ءتورتىنشى سىنىپتا وقيدى. سونداي-اق سپورتپەن دە شۇعىلدانىپ, سالاۋاتتى ءومىر سالتىن ۇستانادى.
شىعىس قازاقستان وبلىسى
