سۋرەتتى تۇسىرگەن – جۇماباي مۇسابەكوۆ
جەتىسۋدى تابيعي الەۋەتىنە, ەكونوميكالىق باعىتىنا قاراپ, اۋىل شارۋاشىلىعى سالاسىن عانا دامىتا بەرۋگە بولمايدى. قازىر وڭىردە ءار سالادا كادر تاپشىلىعى قاتتى ءبىلىنىپ تۇر. سىرتتان بىلىكتى مامان تارتقاننان گورى, وقۋعا قۇشتار جاستاردىڭ تۋعان جەرىندە قىزمەت ەتۋىنە جول اشقان ابزال. وسى ماقساتتا ءارى مەملەكەت باسشىسىنىڭ جۇمىسشى ماماندىقتار جىلى جونىندەگى باستاماسى اياسىندا جەتىسۋ وبلىسىنداعى كوللەدجدەردە سۇرانىسقا يە جاڭا ماماندىقتاردى اشۋ جۇمىستارى جالعاسىپ جاتىر.
بۇگىندە وڭىردە «جاڭا ماماندىقتار اتلاسى» بەكىتىلدى. ول, ەڭبەك نارىعى مەن ءوڭىردىڭ ەكونوميكاسىن دامىتۋ تالاپتارى ەسكەرىلە وتىرىپ, 5 نەگىزگى باعىتقا – اۋىل شارۋاشىلىعى, وڭدەۋ ونەركاسىبى, تۋريزم يندۋسترياسى, اقپاراتتىق-كوممۋنيكاتسيالىق تەحنولوگيالار, ەنەرگەتيكا جانە جاڭارتىلاتىن ەنەرگيا كوزدەرى سالالارىنا باعدارلانعان. ماسەلەن, وتكەن وقۋ جىلىندا ءوڭىردىڭ 11 كوللەدجىندە 13 جاڭا ماماندىق اشىلسا, بيىل تاعى 14 ماماندىق اشىلادى.
«جەتىسۋ وبلىسىندا تەحنيكالىق, كاسىپتىك ءبىلىم بەرۋدىڭ مازمۇنىن جاڭارتۋ, ساپاسىن ارتتىرۋ, سونداي-اق جۇمىسشى ماماندىقتارىنىڭ ءيميدجىن كوتەرۋ باعىتىندا جۇمىسشى ماماندىقتارى جىلىن وتكىزۋ جونىندەگى ءىس-شارالاردىڭ كەشەندى جوسپارى بەكىتىلدى. سونداي-اق «جاڭا ماماندىقتاردىڭ وڭىرلىك اتلاسى» ازىرلەندى. وبلىس ەكونوميكاسىندا باسىمدىق بەرىلەتىن 5 سالاعا تالداۋ جۇرگىزىلىپ, جاڭادان پايدا بولعان, وزگەرگەن, جويىلىپ بارا جاتقان, اسا تاپشى كاسىپتەر انىقتالدى. ەكونوميكا سالالارىنىڭ باسىم باعىتتارىنا بىلىكتى مامانداردى دايارلاۋ ماقساتىندا 2024–2025 وقۋ جىلىندا وبلىستا 240 ءبىلىم بەرۋ باعدارلاماسى ازىرلەندى», دەيدى وبلىستىق ءبىلىم باسقارماسىنىڭ باسشىسى مارات سۇلەيمەنوۆ.
ونىڭ ايتۋىنشا, گيدروتەحنيكالىق مەليوراتسيا, اۆتوماتتاندىرىلعان ءوندىرىس جۇيەلەرىنە تەحنيكالىق قىزمەت كورسەتۋ جانە جوندەۋ, مەحاترونيك, حاۋس-شەبەر, تەحنيك-جوبالاۋشى (ساۋلەت), ورمان شارۋاشىلىعى, بالىق شارۋاشىلىعى, جىلىجاي شارۋاشىلىعىن ۇيىمداستىرۋ سىندى كاسىپ يەلەرى وبلىسقا اۋاداي قاجەت. ماسەلەن, وتكەن جىلى ماتەريالدىق-تەحنيكالىق بازانى نىعايتۋعا جەرگىلىكتى بيۋدجەتتەن 475 ملن تەڭگەدەن استام قارجى بولىنگەن, بيىل تاعى 488 ملن تەڭگە بولىنەدى دەپ جوسپارلانىپ وتىر. جاڭا ماماندىقتاردى اشقان وقۋ ورىندارىنىڭ ءبىرى – تالدىقورعان جوعارى پوليتەحنيكالىق كوللەدجى.
ء«بىزدىڭ كوللەدجدە مىڭ جارىمنان استام ستۋدەنت 11 ماماندىق بويىنشا ءبىلىم الىپ جاتىر. بۇگىنگە دەيىن ءبىز اشقان جاڭا ماماندىقتاردىڭ ىشىندە «ۇشقىشسىز ۇشۋ اپپاراتتارىنىڭ وپەراتورى», «BIM تەحنيكتەر» بار. بۇلار «وڭىرلىك جاڭا ماماندىقتار اتلاسىنا» ەنگىزىلگەن. بيىل مەحاترونيكا ماماندىعىن اشىپ, ەلەكترونيكا, روبوتتەحنيكا, 3D باسىپ شىعارۋدى وقىتامىز. وسىعان بايلانىستى ەكى ءىت كومپانيامەن كەلىسىمدەرىمىز بار», دەيدى تالدىقورعان جوعارى پوليتەحنيكالىق كوللەدجىنىڭ ديرەكتورى شىڭعىس نۇرعوجاەۆ.
بۇدان بولەك, وبلىستىق ءبىلىم باسقارماسىنىڭ دەرەكتەرى بويىنشا, ءوڭىردىڭ كادرلىق قاجەتتىلىگىن قامتاماسىز ەتۋ ءۇشىن 15 كوللەدجدە 80 كاسىپورىننىڭ وتىنىمدەرىنە سايكەس 25 ماماندىق بويىنشا 809 ادامدى نىسانالى دايارلاۋ جۇزەگە اسىرىلادى. بۇل كاسىپورىندار كەلىسىمشارت نەگىزىندە وقۋدى بىتىرگەننەن كەيىن ستۋدەنتتەردى مىندەتتى تۇردە جۇمىسقا الادى. وسى رەتتە وڭىردە 15 كوللەدج دۋالدى وقىتۋدى جۇزەگە اسىرىپ كەلەدى.
ايتا كەتەيىك, ءوڭىر كولەمىندە جالپى سانى 27 كوللەدج جۇمىس ىستەيدى, سونىڭ 21-ءى مەملەكەتتىك, 6-ى جەكەمەنشىك. ولاردا وسى وقۋ جىلىندا 13 901 ستۋدەنت ءبىلىم الىپ, ونىڭ 10 155-ءى مەملەكەتتىك الەۋمەتتىك تاپسىرىس شەڭبەرىندە, ياعني تەگىن وقىتىلىپ جاتىر. مەملەكەتتىك تاپسىرىستىڭ كوپ بولىگى تەحنيكالىق ماماندىقتارعا, ياعني IT, قۇرىلىس, ينجەنەريا, اۋىل شارۋاشىلىعى, سۋ شارۋاشىلىعىنا باعىتتالعان. جالپى, وقۋ ورىندارى اۋىل شارۋاشىلىعى, قىزمەت كورسەتۋ سالاسى, قۇرىلىس, ماشينا جاساۋ, سونداي-اق تەحنيكالىق, پەداگوگيكالىق, زاڭ, ەكونوميكالىق, مەديتسينالىق باعىتتاردا 70 ماماندىق, 113 بىلىكتىلىك بويىنشا كادرلار دايارلايدى.
جەتىسۋ وبلىسى
