فوتو: ەرلان ومار
ەڭبەك جانە حالىقتى الەۋمەتتىك قورعاۋ مينيسترلىگىنىڭ مالىمەتىنشە, ەكى كوزدەن تولەنەتىن ارناۋلى الەۋمەتتىك تولەمگە (رەسپۋبليكالىق بيۋدجەت جانە بىرىڭعاي جيناقتاۋشى زەينەتاقى قورى) 3 205 ادام جۇگىنىپ, ونىڭ ىشىندە 3 093 ادامعا تاعايىندالعان.
ال, ءتورت قارجىلاندىرۋ كوزىنەن بەرىلەتىن ءاات (رەسپۋبليكالىق بيۋدجەت, بىرىڭعاي جيناقتاۋشى زەينەتاقى قورى, جۇمىس بەرۋشى جانە ءومىردى ساقتاندىرۋ ۇيىمى) تاعايىنداۋعا 11 117 ادام ءوتىنىش ءبىلدىرىپ, ونىڭ 10 475-ىنە تاعايىندالعان.
«سونداي-اق, 230 ازامات ساقتاندىرۋ كومپانياسىمەن زەينەتكەرلىك اننۋيتەت شارتىنىڭ جاسالۋىن كۇتىپ جاتىر. 34 ازامات سمس حابارلاماعا جاۋاپ بەرمەگەن. مىندەتتى شارتتاردى ورىنداماعاندىقتان, 490 ءوتىنىش بەرۋشىگە ءاات تاعايىنداۋدان باس تارتىلدى. وڭىرلەر بويىنشا ارناۋلى الەۋمەتتىك تولەمدەردى الۋعا ءوتىنىش بىلدىرگەندەردىڭ ەڭ كوپ سانى قاراعاندى (2 كوزدەن – 547 ادام, 4 كوزدەن – 1 878 ادام), قوستاناي (2 كوزدەن – 343 ادام, ال 4 كوزدەن – 1 146 ادام) جانە شىعىس قازاقستان (2 كوزدەن – 288 ادام, ال 4 كوزدەن – 1 162 ادام) وبلىستارىندا تىركەلگەن», دەلىنگەن حابارلامادا.
ەستەرىڭىزگە سالا كەتەيىك, 2024 جىلدىڭ 1 قاڭتارىنان باستاپ قازاقستاندا زياندى ەڭبەك جاعدايلارىندا ۇزاق ۋاقىت جۇمىس ىستەگەن ادامدارعا ارناۋلى الەۋمەتتىك تولەم ەنگىزىلگەن ەدى.
