2025 جىلدىڭ 13 قاڭتارىندا جاريالانعان حالىقارالىق Global Firepower Ranking رەيتينگىندە ەلىمىز 1,1016 ۇپايمەن 145 ەلدىڭ ىشىندە 57-ورىنعا تۇراقتاپ, ورتالىق ازيادا كوش باستادى. ال 2024 جىلى 58-ورىنعا يە بولساق, الدىڭعى جىلى 63-ورىنعا تۇراقتادىق.
جالپى, قازاق ەلىنىڭ ەكونوميكالىق تۇرعىدان اسكەري شىعىندارى 1,3 ترلن تەڭگەنى قۇرايدى. بۇل تەحنيكالاردى جاڭارتۋعا, قورعانىس ونەركاسىبىن دامىتۋعا جانە وقۋ-جاتتىعۋلاردى جۇيەلى تۇردە ورىنداۋعا مۇمكىندىك بەرەدى.
ورتالىق ازياعا كەلسەك, وزبەكستان بىزدەن ءبىر ساتى تومەن, 58-ورىنعا جايعاستى. تۇرىكمەنستان 77-ءشى, قىرعىزستان 105-ءشى جانە تاجىكستان 108-ورىندى يەلەندى.
ۇزدىك ۇشتىككە بۇرىنعىشا اقش, رەسەي جانە قىتاي كىرەدى. ال ورتالىق افريكا رەسپۋبليكاسى, بەنين جانە بۋتان مەملەكەتتەرى كوش سوڭىندا.
ايتا كەتەيىك, بۇل رەيتينگ 60-تان اسا جەكە فاكتوردى پايدالانا وتىرىپ, ەلدىڭ كۇش-قۋات كورسەتكىشىن انىقتايدى. بۇل اسكەري بولىمدەردىڭ سانى مەن قارجىلىق جاعدايىنان باستاپ لوگيستيكالىق مۇمكىندىكتەر مەن گەوگرافيا اۋماعىنا دەيىنگى ەرەكشەلىكتەردى قامتيدى.
نۇرداۋلەت كارىباي,
ق.ا.ياساۋي اتىنداعى حقتۋ ستۋدەنتى
تۇركىستان
