سۋرەتتى تۇسىرگەن – جۇماباي مۇسابەك
وبلىس اكىمى بەيبىت يساباەۆتىڭ تاپسىرماسىنا سايكەس وتكەن جىلى «بەرەكە» كوتتەدج قالاشىعىنداعى قۇرىلىس ساپاسىنا بايلانىستى وزەكتى ماسەلەلەردى شەشۋ باعىتىندا بىرقاتار جۇمىس جۇرگىزىلدى. سونىڭ ناتيجەسىندە جۇرت تىلەگى ورىندالدى.
«بەرەكە قالاشىعى وبلىس اكىمىنىڭ جەكە باقىلاۋىندا تۇر. اي سايىن ارنايى تەكسەرۋ جۇمىستارى جۇرگىزىلەدى. بۇرىنعى قاتەلىكتەرگە قايتا جول بەرۋگە بولمايدى. كەزەكتە تۇرعان كوپبالالى انالار تيەسىلى ۇيىنە كىرىپ جاتىر. ءبارى زاڭنىڭ اياسىندا, قۇرىلىس جۇمىستارىن بىلىكتى ماماندار قاداعالاپ وتىر. جىل سوڭىنا دەيىن جوندەۋ جۇمىستارى تولىقتاي اياقتالىپ, قالاشىقتىڭ تىنىسى كەڭەيەدى», دەدى تالدىقورعان قالاسىنىڭ اكىمى ەرنات ءبازىل.
قالاشىقتا قۇرىلىسى اياقتالماعان, ساپاسىندا كەمشىلىكتەرى بارلارىن قوسا العاندا پروبلەمالىق 204 كوتتەدج بولعان. ەسكەرتۋلەر تۇزەتىلگەننەن كەيىن 25 كوتتەدج وتكەن جىلدىڭ سوڭىندا كەزەكتە تۇرعان ازاماتتارعا بەرىلدى. ەندى مىنە, 30 وتباسىعا ءۇي كىلتتەرى تابىستالدى. تاعى 42-ءسىن ءبىرىنشى توقساننىڭ سوڭىنا دەيىن پايدالانۋعا بەرۋ جوسپارلانعان. قالعان 107-ءسى كەزەڭ-كەزەڭىمەن ەنگىزىلەدى.
ءوڭىر اكىمىنىڭ ءباسپاسوز قىزمەتىنىڭ مالىمەتىنشە, جالپى وبلىس كولەمىندە حالىقتى قولجەتىمدى باسپانامەن قامتاماسىز ەتۋدىڭ بارلىق شارالارى قابىلدانىپ جاتىر. وتكەن جىلى وڭىردە تۇرعىن ءۇي سالۋ جانە ساتىپ الۋ ەسەبىنەن 2 708 وتباسى جاڭا قونىسقا يە بولدى. وبلىس ورتالىعىنا كەلسەك, بىلتىر كەزەكتە تۇرعاندار قاتارىنان 1 283 وتباسى تۇرعىن ۇيمەن قامتاماسىز ەتىلسە, بيىل تاعى 1 400-دەن استام وتباسىن قامتۋ جوسپارلانىپ وتىر.
«تۇرعىن ءۇي كەزەگىندە 10 جىلدان اسا تۇردىم. وسى ءساتتى ۇزاق كۇتتىك. وتباسىمىزدى قۋانىشقا كەنەلتكەن ازاماتتاردىڭ بارىنە شىن جۇرەكتەن العىس ايتامىن. بۇرىن كوزگە قوراش كورىنەتىن ۇيلەرگە تىرشىلىك قايتا ورالىپ, ءوزىم قاتارلى كەلىنشەكتەر ءماز-مەيرام بولىپ ءجۇر», دەيدى جەتى بالانىڭ اناسى گۇلنۇر نۇرىمبەتوۆا.
پانفيلوۆ اۋدانىنىڭ جاركەنت قالاسىندا دا 80 پاتەرلى تۇرعىن ءۇي پايدالانۋعا بەرىلدى. جاڭا پاتەرلەردى الەۋمەتتىك وسال توپ ساناتىمەن كەزەكتە تۇرعاندار, جەتىم بالالار, كوپبالالى وتباسىلار, باسقا دا ساناتتاعى ازاماتتار الدى, ءسويتىپ, كەزەكتە تۇرعان 700-گە جۋىق ادام باسپانالى بولدى.
وبلىستىق قۇرىلىس باسقارماسىنىڭ مالىمەتىنشە, بيىل وڭىردە 100 دەنساۋلىق ساقتاۋ نىسانى, 10 مادەنيەت نىسانى, 8 ءبىلىم بەرۋ نىسانى, 3 سپورت نىسانى, 1 وڭالتۋ ورتالىعى سالىنادى, سولاردىڭ 105-ءى بيىل ىسكە قوسىلادى دەپ جوسپارلانعان.
«بيىل الاكول جانە پانفيلوۆ اۋداندارىندا 900 ورىندى 2 جاڭا مەكتەپتى پايدالانۋعا بەرۋ جوسپارلانىپ وتىر. الاكول اۋدانى لەپسى اۋىلىندا جاڭا دەنەشىنىقتىرۋ-ساۋىقتىرۋ كەشەنى بوي كوتەرەدى. سونداي-اق جاڭا مادەنيەت ۇيلەرى اقسۋ اۋدانىنىڭ ماتاي, اراسان, ەسبولاتوۆ اۋىلدارىندا, كوكسۋ اۋدانىنىڭ جارلىوزەك اۋىلىندا ىسكە قوسىلادى. ولاردىڭ ەكەۋى سپورت زالدارىمەن بىرىكتىرىلگەن نىساندار بولماق. دەنساۋلىق ساقتاۋ سالاسىندا 39 فەلدشەرلىك-اكۋشەرلىك, 20 مەديتسينالىق پۋنكت, سونداي-اق 4 جەدەل جاردەم ستانساسى, قاجك-ءنىڭ 1 مەديتسينالىق قىزمەتى نىسانى سالىنادى», دەلىنگەن وبلىستىق قۇرىلىس باسقارماسىنىڭ حابارلاماسىندا.
بيىل الەۋمەتتىك نىساندار, تۇرعىن ۇيلەر, ينجەنەرلىك-كوممۋنيكاتسيالىق جەلىلەر, ءورت ءسوندىرۋ دەپوسى, اۋىل شارۋاشىلىعى وبەكتىلەرى, جالپى العاندا ءتۇرلى سالاداعى 298 نىساننىڭ قۇرىلىسى جوسپارلانعان. وبلىس قۇرىلعالى بەرى جوندەۋ مەن جاڭا قۇرىلىس جۇرگىزۋدىڭ ناتيجەسىندە نىسانداردى جاڭارتۋ 50%-عا جەتتى. سونىڭ ىشىندە وتكەن جىلى وڭىردە 171 نىسان سالىنىپ, پايدالانۋعا بەرىلدى.
جەتىسۋ وبلىسى
