كوميسسيا جازاتايىم وقيعاعا جۇمىس بەرۋشىسى – مەكتەپ ديرەكتورىنىڭ بۇيرىعى سەبەپ بولعانىن انىقتادى. ال ەندى زاڭعا سايكەس جابىرلەنۋشىگە كەلتىرىلگەن شىعىندى ءوزى وتەۋگە مىندەتتى.
«جۇمىس بەرۋشى 100% كىنالى, قۋات ايتقاليەۆتىڭ كىناسى جوق. سوندىقتان كوميسسيا وسىنداي شەشىم قابىلدادى. قازىرگى ۋاقىتتا مۇعالىمگە جالاقىسى تولەنىپ جاتىر. ەگەر ول اقىلى نەگىزدە ەمدەلسە, كەتكەن بارلىق شىعىندى وتەيدى», دەدى مەملەكەتتىك ەڭبەك ينسپەكتسياسى جونىندەگى دەپارتامەنتىنىڭ ءبولىم باسشىسى توقتاربەك تۇسىپباەۆ.
قازىرگى ۋاقىتتا ءىس قىزمەتتىك وكىلەتتىگىن تەرىس پايدالانۋ فاكتىسى بويىنشا ودان ءارى شەشىم قابىلداۋ ءۇشىن قۇقىق قورعاۋ ورگاندارىنا جىبەرىلدى. مۇعالىم ۇيدە ەم قابىلداۋىن جالعاستىرىپ جاتىر, ونىڭ جازىلۋىنا كوپ ۋاقىت كەرەك.
«حاتتاما جاسالىپ, بارلىق ءتيىستى قۇجات تولتىرىلدى. قازىر ماتەريالدار قۇقىق قورعاۋ ورگاندارىنا جىبەرىلىپ جاتىر. قىلمىستىق كودەكستىڭ 156-بابىنا سايكەس, ەڭبەكتى قورعاۋ ەرەجەلەرىن بۇزعانى ءۇشىن جۇمىس بەرۋشى جاۋاپتى بولادى», دەدى توقتاربەك تۇسىپباەۆ.
ەسكە سالايىق, وقيعا جاڭا جىل الدىندا سەمەيدە بولعان. قالالىق شىرشانى بەزەندىرۋ كەزىندە ۇستازداردىڭ ءبىرى جاراقات الىپ, اۋرۋحاناعا جەتكىزىلدى. تەرگەۋ ناتيجەسىندە مەكتەپ ديرەكتورىنا قاتاڭ سوگىس جاريالانىپ, قالالىق ءبىلىم ءبولىمىنىڭ باسشىسى قىزمەتىنەن بوساتىلدى.
