جازۋشىنىڭ تۋعان جەرى اتباسار قالاسىنداعى قالامگەردىڭ اتىنداعى مۋزەي ۇجىمى مازمۇندى شارا ۇيىمداستىردى. مۋزەي ديرەكتورى ۇلبوسىن دانيارقىزى ادەبيەت الەمىن اسپەتتەيتىندەرگە جەرلەس جامپوز جازۋشىنىڭ رۋحاني الەمىمىزگە قوسقان وراسان زور ۇلەسى تۋرالى تاراتىپ ايتىپ بەردى. مۋزەيدە كوپتەگەن قۇندى جادىگەرلەر بار. پەرزەنتتەرى تاپسىرعان جازۋ ۇستەلىندە قازاق حالقىنىڭ وتكەن ءداۋىرىنىڭ ماڭىزدى تۇستارى قامتىلعان بەلگىلى شىعارماسى «كوشپەندىلەر» تريلوگياسى ومىرگە كەلىپتى. وسى اتاقتى شىعارماعا جارىعىن تۇسىرگەن جازۋشىنىڭ جارىقشامى دا بۇگىندە مۋزەيدەگى سول ۇستەلدىڭ ۇستىنەن ورىن العان. مۋزەي قورىندا جازۋشىنىڭ تاسپاعا تۇسىرىلگەن ءوز داۋىسى, «مۇحيتتان وتكەن قايىق» رومانىنىڭ قولجازباسى, قولدانعان جەكە زاتتارى مەن كىتاپتارى جانە دومبىراسى ساقتاۋلى تۇر.
اتباسار قالاسىنداعى ورتالىق الاڭنان بوي كوتەرگەن ءىلياس ەسەنبەرليننىڭ ەسكەرتكىشى 2015 جىلى اشىلعان. بۇگىندە ايماقتىڭ تاريحي-مادەني ومىرىندە وزىندىك ورنى بار بۇل كومپوزيتسيا قۇرىلىسىنا جازۋشىنىڭ ۇرپاقتارى مەن جالپى رۋحانيات جانارشىرلارى دەمەۋشىلىك ەتكەن. اۋداندىق ءماسليحاتى توراعاسى نۇرجان راحىموۆ سالتاناتتى شاراداعى سويلەگەن سوزىندە ءىلياس ەسەنبەرلين مۇراسىنىڭ ۇلت تاريحىنداعى الار ورنىنا توقتالىپ, جازۋشىنىڭ قايراتكەرلىك ىستەرىنىڭ جارقىن تۇستارىن اتاپ ءوتتى.
ەسكەرتكىشكە گۇل شوقتارىن قويۋ راسىمىنەن سوڭ شارا قاتىسۋشىلارى ادەبي مۋزەي زالدارىنا ەكسكۋرتسيا جاساپ, «جازۋشى. ازامات. پاتريوت» تاقىرىبىنداعى جيىنعا قاتىستى.
اقمولا وبلىسى,
اتباسار اۋدانى
