ەكى كۇن بويى 4-18 جاس ارالىعىنداعى قاتىسۋشىلار ينجەنەريا, باعدارلامالاۋ جانە روبوتتەحنيكا سالاسىنداعى بىلىمدەرى مەن داعدىلارىن كورسەتتى. جاسامپاز وقۋشىلار جارىساتىن ءبىلىم دوداسىن «دارىن» رەسپۋبليكالىق عىلىمي-پراكتيكالىق ورتالىعى, «USTEM Foundation» قوعامدىق قورى جانە SDU ۋنيۆەرسيتەتى بىرلەسىپ وتكىزدى.
فەستيۆال جىل سايىن ءارتۇرلى تاقىرىپتا وتەدى. ۇيىمداستىرۋشىلاردىڭ ايتۋىنشا, بۇل بالالاردىڭ جاڭا باعىتتارعا دەگەن قىزىعۋشىلىعىن دامىتۋعا مۇمكىندىك بەرەدى. بيىلعى ماۋسىم – سۋاستى الەمىن زەرتتەۋ جانە ەكولوگيالىق ماسەلەلەردى شەشۋگە باعىتتالعان «DIVE» تاقىرىبىنا ارنالعان. كادەلى كونكۋرس «FIRST» حالىقارالىق باعدارلاماسىنىڭ ءتورت ساناتىن قامتىدى. اتاپ ايتقاندا, «FIRST LEGO League Discover», «FIRST LEGO League Explore», «FIRST LEGO League Challenge» جانە «FIRST Tech Challenge».
مازمۇندى ءىس-شارا جوعارى عىلىمي-تەحنيكالىق دەڭگەيدە ۇيىمداستىرىلىپ, تالانتتار اراسىندا ەرەكشە تايتالاس تۋدىردى. ەڭ ۇلكەن قىزىعۋشىلىق «FIRST Tech Challenge» ساناتىندا بايقالدى. مۇندا جاس ينجەنەرلەر مەحانيكا, باعدارلامالاۋ جانە ەلەكترونيكا سالاسىنداعى كۇردەلى تاپسىرمالاردى ورىنداپ, روبوت-سايىستىڭ كوركىن قىزدىردى.
«قازىرگى جاھاندانۋ, يننوۆاتسيالىق جاڭارۋ زامانىندا روبوتتاردىڭ الاتىن ورنى وتە ەرەكشە. سەبەبى قازىرگى زامان – قۇلتەمىردىڭ ءداۋىرى. اقپارات الۋ, جاردەم بەرۋ, ءۇي شارۋاسىنداعى قىزمەتتەردىڭ 50 پايىزىن ءبىز ءۇشىن روبوتتار جاسايدى. مىنەكەي, ءبىز روبوتوتەحنيكانىڭ بالالار مەن جاسوسپىرىمدەر اراسىندا تانىمال بولا باستاعانىن كورىپ وتىرمىز. «Daryn FIRST Championship» سياقتى فەستيۆالدەر جاستارعا ءوز بىلىمدەرىن پراكتيكادا قولدانۋعا تاپتىرماس الاڭ», دەدى «USTEM Foundation» قوعامدىق قورىنىڭ ديرەكتورى اسىلبەك مىرزاحمەتوۆ.
سايىس سوڭىندا 32 كوماندا ءباسى بيىك «Central Asia FIRST Championship 2025» باسەكەسىنە قاتىسۋ كۆوتالارىن جەڭىپ الدى.
ايتا كەتەيىك, قاڭتاردا ءدال وسىنداي چەمپيوناتتار شىمكەنت, اقتاۋ جانە استانا قالالارىندا دا وتەدى. ءبىز بۇدان نەنى اڭعارامىز؟ ءبىر ايدا ءتورت بىردەي اۋقىمدى سايىستىڭ ءوتۋى روبوتتەحنيكانىڭ بالالار مەن جاسوسپىرىمدەر اراسىندا تانىمال بولا باستاعانىنىڭ ايقىن دالەلى.
«بالالاردىڭ كۇردەلى ينجەنەرلىك تاپسىرمالاردى ۇلكەن ىنتامەن شەشكەنىن كورۋ – ءبىز ءۇشىن ۇلكەن قۋانىش. بۇل فەستيۆال تەك جارىس قانا ەمەس, وقۋشىلارعا ءوز تالانتتارىن كورسەتۋگە جانە بولاشاق جوبالارعا جاڭا يدەيالار تابۋعا مۇمكىندىك بەرەتىن الاڭ. روبوت قۇراستىرۋمەن اينالىساتىن بالانىڭ زەيىنى اشىلىپ, دالدىك پەن تارتىپكە ۇيرەنەدى. اتالعان سالا عىلىمنىڭ بارلىق زاڭى ەلەكترونيكا, مەحانيكا, تەلەمەحانيكا, مەحاترونيكا, ينفورماتيكا, راديوتەحنيكا, ەلەكترتەحنيكامەن تىعىز بايلانىستى», دەدى «دارىن» رعپو ءبولىم باسشىسى سايران باقتيار.
بەكزات مىڭايدار ۇلى
