جازۋشىنىڭ ەسىمى وقىرمانعا پروزالىق شىعارمالارىمەن جاقسى تانىس. سونداي-اق سۋرەتكەر قوعامداعى قالتارىس-بۇلتارىستاردى قالت جىبەرمەيتىن كوسەمسوزگە دە جۇيرىك. ءومىردىڭ شىنايى كورىنىسىن اق پاراققا قاز-قالپىندا تۇسىرەدى. جاساندىلىق جوق.
«جان اۋەندەرى» اتتى كىتاپ ءتورت بولىمنەن تۇرادى. العاشقى بولىمدە تاۋەلسىزدىكتىڭ ارايلاپ اتقان تاڭدارىن كوسەمسوزبەن بەينەلەۋگە تىرىسقان. اسىرەسە ەكى مارتە ەڭبەك ەرى ىبىراي جاقاەۆ پەن جازىلبەك قۋانىشباەۆ ءومىرىنىڭ ايتۋلى ساتتەرى, اق كۇرىش پەن قارا قويدان كەيىنگى تاعدىرى كوركەم سۋرەتتەلگەن. سونىمەن بىرگە شوڭ جازۋشى شىڭعىس ايتماتوۆ, ساحنا ساڭلاعى ءسابيرا مايقانوۆا, اتاقتى ديريجەر تولەپبەرگەن ابدىراشەۆ, الەم مويىنداعان ماتەماتيك اسقار جۇمادىلداەۆ بەينەلەرى شەبەرلىكپەن سومدالعان. وسى جيناققا جازعان ارناۋ سوزىندە اۆتور: «ادام جانى تولقىپ تۇرعان توعىز بالل تەڭىز دەرسىڭ. ول تولقىماسا, ەسكەكسىز قايىقتاي بولىپ قالار ەدى. دۇنيەدەگى جاقسىلىقتىڭ ءبارى ادام جانىنىڭ تولقۋىنان تۋعان. كىتاپتىڭ «جان اۋەندەرى» اتالۋى دا وسىعان سايادى. ادام بالاسى تولقىعان دۇنيەگە يە. ادام – ەڭ بيىك قۇبىلىس. مەنىڭ كەيىپكەرلەرىم دە جان تولقۋىن بويىنا دارىتقان ادامدار», دەيدى.
ال «مەنىڭ كوزىم ارقىلى» اتتى كىتابىنا دا بۇگىنگى زاماندى زەردەلەگەن بىرقاتار پۋبليتسيستيكالىق دۇنيەلەرى توپتاستىرىلعان. وسىنداعى ءبىرتۋار قالامگەر شەرحان مۇرتازا مەن كورنەكتى قايراتكەر التىنبەك سارسەنباي ۇلى تۋرالى ەسسەسىندە ايتۋلى ەكى تۇلعانىڭ كىسىلىك كەلبەتىن ايشىقتى كەستەلەگەن. سىرشىل سۋرەتكەردىڭ ۇلتتىق قۇندىلىق, رۋحانيات, ادەبيەت تۋرالى ويلارى دا تەرەڭ. ەشكىمدى بەيجاي قالدىرمايدى. ماسەلەن, «كيە كەتىپ بارادى» ماقالاسىندا: «ەندى مەملەكەتتىك ءتىلىمىزدى نان تابۋ قۇرالىنا اينالدىراتىن كەز كەلدى, تابا ناندى جەگەن تارلاندارىمىز ءوز تىلىندە سويلەپ, نوتاريۋستان انىقتاما الا الماي, اۋدارماشى جالداپ كوزدەرى بوزارىپ جۇرگەن جوق پا؟ ءار سوعىستىڭ جەڭىسى بار, كەڭەس ادامىنىڭ ساپىندا ءجۇرىپ, ءتورت جىلدا رەيحستاگتىڭ دە توبەسىنە تۋ تىكتىك. وتىز جىل ءوتتى, تۋعان ءتىلىمىزدىڭ توبەسىنە كوك تۋىمىزدى جەلبىرەتەتىن كەز كەلدى. كيەدەن اتتامايىق», دەيدى تولعانىپ. سونداي-اق اۆتوردىڭ «كوزبوياۋى جوق كورىنىستەرى» دە قىزىقتى وقىلادى. ودان قازىرگى قوعامنىڭ تىنىسىن سەزىنەسىز.
قىسقاسى, ەكى جيناققا ەنگەن تۋىندىلار جىپ-جىلى جازىلعان. تاڭعى شىقتاي مولدىرەپ تۇر. جانىڭىزدى تولقىتادى. وي سالادى. تولعانتادى.
