عالىمداردىڭ جاڭا زەرتتەۋى كورسەتكەندەي, جي قۇرالدارىن ءجيى قولداناتىن ادامداردىڭ سىني ويلاۋ قابىلەتى ايتارلىقتاي تومەندەيدى. بۇل قۇبىلىس «كوگنيتيۆتىك دەمالىس» دەپ اتالادى: مي ۇنەمى جي-گە سەنىپ, اقپاراتتى ءوز بەتىنشە تالداۋدى ۇمىتا باستايدى.
زەرتتەۋ ناتيجەلەرى Societies جۋرنالىندا جاريالاندى. وعان 17 جاستان اسقان 666 ادام قاتىستى. ولار ءارتۇرلى جاستاعى جانە ءبىلىم دەڭگەيىندەگى ادامداردى قامتىدى. الدىمەن قاتىسۋشىلاردىڭ جي قۇرالدارىن قانشالىقتى ءجيى قولداناتىنى انىقتالدى, كەيىن ولاردىڭ سىني ويلاۋ قابىلەتتەرى باعالاندى.
ناتيجەلەر كورسەتكەندەي, جي-ءدى ءجيى پايدالاناتىن ادامداردىڭ مي قىزمەتى سيرەك قولداناتىندارعا قاراعاندا الدەقايدا باياۋ جۇمىس ىستەيدى. تاعى ءبىر تاڭقالارلىق فاكت – ادامنىڭ جي قۇرالدارىن قولدانۋ جيىلىگى ونىڭ ءبىلىم دەڭگەيىنەن دە ماڭىزدىراق فاكتور بولىپ شىقتى. ياعني, جوعارى ءبىلىمدى ادامدار دا جي-گە تىم سەنسە, سىني ويلاۋ قابىلەتتەرى ناشارلايدى.
عالىمدار بۇل قۇبىلىستى الاڭداۋشىلىقپەن قابىلداپ وتىر. «جي قۇرالدارىن شەكتەۋسىز قولدانۋ – ادام ميىن پاسسيۆتىك رەجيمگە كوشىرەدى», – دەيدى زەرتتەۋ اۆتورلارى. بۇل تەحنولوگيالاردى اقىلمەن پايدالانۋ جانە اقپاراتتى ءوز بەتىمىزشە وڭدەۋدى جالعاستىرۋ – بولاشاقتا كوگنيتيۆتىك قابىلەتىمىزدى ساقتاپ قالۋدىڭ ماڭىزدى جولى.
