جادىراعان جاز ايى ەدى. ينە-جىپتەن جاڭا شىققانداي قىزمەت كيىمىن كيگەن قۇقىق قورعاۋ قىزمەتكەرلەرى جەرگىلىكتى اكىمشىلىكتە وتەتىن سالتاناتتى جيىنعا بەت العان. الدەن ۋاقىتتا ۋچاسكەلىك ينسپەكتور رۋسلان كراۆتسۋنوۆتىڭ قالتا تەلەفونى شىر ەتە ءتۇستى. حابارلاسىپ تۇرعان جەدەل جاردەم فەلدشەرى ەكەن. رۋسلاننىڭ ۋچاسكەسىندەگى كەيۋاناعا كومەك قاجەت. جەدەل جاردەم قىزمەتكەرلەرى پاتەرىنە كىرە الار ەمەس. تەمىر ەسىكتى اشۋدىڭ مۇمكىندىگى تاعى جوق. وقيعا ورنىنا جەدەل جەتكەن رۋسلان كىلت ساڭىلاۋىنان پاتەر ءىشىن بارلادى. بۇل ۇيدە كوپتەن بەرى سىرقاتتانىپ جۇرگەن اجەي تۇراتىن. كوز سالىپ قاراسا, ءجۇزى تانىس اجەي ەدەندە س ۇلىق ءتۇسىپ جاتىر, ءتىپتى, تىرشىلىك بەلگىسى دە بىلىنبەيدى. جىعىلعالى دا قانشا ۋاقىت وتكەنى بەلگىسىز. ويلانىپ-تولعاناتىن ۋاقىت تا جوق. ەندى نە ىستەۋ كەرەك؟ ۋچاسكەلىك ينسپەكتور ءۇشىنشى قاباتتاعى كورشى پاتەردىڭ بالكونى ارقىلى كەيۋانانىڭ تەرەزەسىنە جەتتى. ونسىز دا قاۋساپ تۇرعان جاقتاۋدى ءسال يتەرىپ, اينەكتى بوساتىپ ىشكە ەندى. جالما-جان ەسىكتى اشىپ جىبەرسە, جەدەل جاردەم قىزمەتكەرلەرى تابالدىرىقتى اتتاعالى تۇر ەكەن. «ساباقتى ينە ساتىمەن» دەگەندەي, ەس-ءتۇسسىز جاتقان كەيۋاناعا ۋاقتىلى جەدەل كومەك كورسەتىلىپ, امان قالدى. قىسىلتاياڭ ساتتە تاپقىرلىق تانىتقان ۋچاسكەلىك ينسپەكتورى العىس حاتپەن ماراپاتتالدى. ايتسە دە, ەڭ قىمباتى كەيۋانانىڭ تۋىستارى جاۋدىرعان اق تىلەك ەدى.
2023 جىلدىڭ قازان ايىنىڭ 28-ءى كۇنى اكىمشىلىك ۋچاسكەنى ارالاپ كەلە جاتقان بولاتىن. قاس قارايىپ, ىمىرت ۇيىرىلگەن ءسات. قىزمەت كولىگىنە ورناتىلعان راتسيا ارقىلى تاعى ءبىر سۋىت حابار ءتۇستى. جالعىزىلىكتى كەيۋانا تالما اۋىرىمەن اۋىرادى ەكەن. ءوز بەتىنشە ەسىك اشۋعا دارمەنى جوق. رۋسلان مەكەنجايىن بىردەن انىقتاپ, جەدەل جەتتى. بۇل جولى دا ەسىكتى اشۋ مۇمكىن بولماعاندىقتان, تەرەزەنىڭ اينەگىن شىنتاعىمەن ۇرىپ سىندىرىپ, ىشكە ەندى. ەسىك الدىندا تۇرعان جەدەل جاردەم قىزمەتكەرلەرى كەيۋانانى ىلە الا جونەلدى. دەر كەزىندە مەديتسينالىق قىزمەت كورسەتىلگەندىكتەن, دارمەنسىز كەيۋانا اجال اۋزىنان امان قالدى.
وتكەن جىلدىڭ اقپان ايىندا ۋچاسكەلىك ينسپەكتور جەرگىلىكتى تۇرعىندارعا سوڭعى ۋاقىتتا الاياقتىق وقيعالاردىڭ كوبەيىپ كەتكەنى تۋرالى ايتىپ, بەيتانىس ادامدارعا وزدەرى جايىنداعى مالىمەتتەردى بەرمەۋى كەرەكتىگى تۋرالى ەسكەرتىپ جۇرگەن ەدى. كەزەكتى ءبىر تۇرعىن ۇيگە ەنگەن كەزدە ىرگەدەگى پاتەردەن الدەبىر ايەل ادامنىڭ دەرەكتەردى ايتىپ جاتقانىن قۇلاعى شالىپ قالدى. ىشكى تۇيسىك الداماپتى. الاياقتار اڭقاۋ ايەلدى الداپ, 8 ملن تەڭگەگە نەسيە راسىمدەمەكشى ەكەن. ءمان-جايدى بىلگەننەن كەيىن بىردەن بانكپەن حابارلاسىپ, نەسيە راسىمدەۋدى توقتاتتى.
– كەيىنگى كەزدە الاياقتىق ىستەر تۋرالى كوپشىلىك حاباردار بولعانىمەن, الدى-ارتىن ويلاي بەرمەيتىن اڭعال ادامدار دا كەزدەسىپ قالادى, – دەيدى ۋچاسكەلىك ينسپەكتور رۋسلان ۆيكتوروۆيچ.
ەڭبەگى ەل اۋزىنا ءىلىنىپ جۇرگەن پوليتسيا قىزمەتكەرىمەن تىلدەسە كەلە, ونىڭ بالا كەزىنەن-اق وسى قىزمەتتى اڭساعانى, ارمانداعانى كورىنىپ تۇردى. وعان پوليتسيا قىزمەتكەرلەرى تۋرالى كوركەم فيلمدەر اسەر ەتسە كەرەك. ماماندىق تاڭداۋدا ءمۇلت كەتپەۋىنە اناسى ەلەنا ۆيكتوروۆنا دا ىقپال ەتىپتى. ءجاسوسپىرىم كەزىندە پوليتسيا قىزمەتكەرلەرىنىڭ ەرلىككە تولى ءىس-قيمىلى سيپاتتالاتىن ادەبي كىتاپتاردى كوپ وقىپتى. ءوزى دە سونداي بيىككە كوتەرىلگىسى, ادالدىق پەن شىندىقتى قورعاعىسى كەلگەن. ول ءۇشىن, ارينە, پوليتسيا قىزمەتكەرى كۇشتى بولۋى كەرەك دەپ تۇيسىنگەن. ساباقتى جاقسى وقۋىمەن قاتار سپورتتى دا جانىنا سەرىك ەتكەن. اۋىر اتلەتيكا مەن گرەك-ريم كۇرەسىنە قاتىسقان. الدەنەشە مارتە جارىستاردا جەڭىس تۇعىرىنا كوتەرىلگەن. 2013 جىلى اتباسار قالاسىنداعى كوللەدجگە وقۋعا تۇسكەن. زاڭگەر ماماندىعى بويىنشا. 2016 جىلى ەرتە كوكتەمدە اتباسار قالاسىن قىزىل سۋ باسىپ قالعاندا ەرىكتىلەر قاتارىندا تابىلعان. «قۇتقارۋ وپەراتسيالارىنا بەلسەندى قاتىسقانى ءۇشىن» مەدالىمەن ماراپاتتالىپتى. اتباسار اۋداندىق پوليتسيا بولىمشەسىندە وندىرىستىك تاجىريبەدەن وتكەن كەزدە كريميناليستيكاعا كوڭىلى اۋعان. جاس جىگىتتىڭ بويىنداعى تابيعي بەيىمدى شىڭداۋعا پوليتسيا مايورلارى ك.داۋىلباەۆ پەن ا.جاكىشەۆتەر ىقپال ەتكەن. تاجىريبە جۇمىسى اياقتالعان سوڭ ءوز بەتىنشە ءبىلىمىن جەتىلدىرۋگە كۇش سالعان. وسى بولىمدە ءتورت جىل تابان اۋدارماستان ەڭبەك ەتكەن. 2016 جىلى رۋسلان رەسەيدىڭ ف.م.دوستوەۆسكي اتىنداعى ومبى مەملەكەتتىك ۋنيۆەرسيتەتىنە وقۋعا تۇسكەن. ۋنيۆەرسيتەت قابىرعاسىندا تولىمدى تەوريالىق ءبىلىم الدى.
رۋسلان ۆيكتوروۆيچ اتباسار قالاسىندا ۋچاسكەلىك ينسپەكتور رەتىندە 2018 جىلدان بەرى قىزمەت ەتەدى. ءمىنسىز قىزمەتى ءۇشىن بىرنەشە مارتە ماراپاتقا يە بولعان. وتكەن جىلدىڭ ناۋرىز ايىندا ومبى قالاسىنداعى ءبىر كەزدە ءوزى وقىعان ۋنيۆەرسيتەتتىڭ ماگيستراتۋراسىنا ءتۇسىپتى. ەندىگى ارمانى – قىزمەتىن عىلىممەن ۇشتاستىرۋ. نەسى بار, «تالاپتىعا نۇر جاۋار» دەگەندەي, الدىنا قويعان ماقساتىنا جەتپەي تىنبايتىن ر.كراۆتسۋنوۆتىڭ بۇل بيىككە دە شىعارىنا سەنىم مول.
اقمولا وبلىسى,
اتباسار اۋدانى
