سۋرەتتەردى تۇسىرگەن – جۇماباي مۇسابەكوۆ
ماسەلەن, ءوڭىر كولەمىندە كۇندەلىكتى قوعامدىق ءتارتىپتى جانە جول قاۋىپسىزدىگىن قامتاماسىز ەتۋگە 1 مىڭنان اسا قىزمەتكەر مەن 110 كولىك قۇرالى تارتىلادى. ال 140 پوليتسيا وكىلى مەن ۇلتتىق ۇلاننىڭ 136 ساربازى تالدىقورعاندىقتاردىڭ تىنىشتىعىن كۇزەتەدى. ەڭ قيىنى مەيرامداردا جول قاۋىپسىزدىگىن ساقتاۋعا 2 مىڭنان اسا قىزمەتكەر جانە 200 جۋىق قىزمەتتىك كولىك قۇرالى جۇمىس ىستەيدى. سول سەبەپتى وبلىس اكىمى بەيبىت يساباەۆ جاۋاپكەرشىلىگى مول سالانىڭ ماڭىزدىلىعىن تۇسىندىرە وتىرىپ, سالتاناتتى ءىس-شارادا ءتارتىپ ساقشىلارىنا ارنايى اۆتوكولىكتەردىڭ كىلتىن تابىستادى.
ء«وڭىردىڭ تۇراقتى دامۋى ەڭ الدىمەن قوعامدىق ءتارتىپتىڭ ساقتالۋىنا, تۇرعىنداردىڭ قاۋىپسىزدىگى مەن ەلدىڭ تىنىشتىعىن قامتاماسىز ەتۋگە تىكەلەي بايلانىستى. قازىرگى جاڭا رەفورمالارعا نەگىز بولىپ وتىرعان زاڭنىڭ ۇستەمدىگىن ورنىقتىرۋ, ادىلدىك پەن اشىقتىققا جول اشۋ مىندەتتەرىن ىسكە اسىرۋدا سىزدەرگە ارتىلار جاۋاپكەرشىلىك جۇگى ۇلكەن. سوندىقتان سىزدەردىڭ ۋاقىتپەن ساناسپاي, كۇن-ءتۇن دەمەي, كۇردەلى دە جاۋاپتى جۇمىستى ادال اتقارعان ەڭبەكتەرىڭىزدى ءاردايىم باعالايمىز جانە العىس ايتامىز. وسى ورايدا الاڭسىز جۇمىس ىستەۋلەرىڭىزگە قولايلى جاعداي جاساۋ – مەملەكەت باسشىسىنىڭ الدىمىزعا قويعان باستى مىندەتتەرىنىڭ ءبىرى. بۇل رەتتە بۇگىنگى يگى ءىس-شارا سىزدەردىڭ ءوز مىندەتتەرىڭىزدى لايىقتى اتقارۋعا, جۇمىستارىڭىزدىڭ ساپاسى مەن تيىمدىلىگىن جاقسارتۋعا مۇمكىندىك بەرەدى دەپ سەنەمىن», دەدى ب.يساباەۆ.
جيىن بارىسىندا جالپى سانى 40 اۆتوكولىك, ياعني وبلىستىق پوليتسيا دەپارتامەنتىنىڭ ءاربىر اۋداندىق, قالالىق پوليتسيا بولىمشەلەرىنە 4 قىزمەتتىك اۆتوكولىكتەن بەرىلدى. اتاپ ايتقاندا, ۋچاسكەلىك پوليتسيا ينسپەكتورلارىنا, پاترۋلدىك پوليتسياعا «Chevrolet Cobalt», تابيعاتتى قورعاۋ بولىمشەلەرىنە «Wingle 7», كەزەكشى بولىمدەرگە «گاز سوبول» ماركالى اۆتوكولىكتەرى, سول سياقتى پانفيلوۆ اۋداندىق بولىمىنە 4 اۆتوكولىككە قوسىمشا تاعى ءبىر كولىك – «JAC Sunray» تابىستالدى.
ءوز كەزەگىندە وبلىستىق پوليتسيا دەپارتامەنتىنىڭ باستىعى, پوليتسيا پولكوۆنيگى سارقىتباي قۇساينوۆ ءسوز الىپ, ىشكى ىستەر ورگاندارىنا جاسالىپ وتىرعان قولداۋلار ءۇشىن العىسىن ءبىلدىردى:
«كۇندەلىكتى كوشەدە جانە باسقا دا قوعامدىق ورىنداردا ءتيىستى ءتارتىپتىڭ ساقتالۋىن باقىلاۋ, ازاماتتاردىڭ قاۋىپسىزدىگىن قامتاماسىز ەتۋ – ءبىزدىڭ باستى مىندەتىمىز. وسى ورايدا ءبىزدىڭ بولىمشەلەردى ماتەريالدىق جانە تەحنيكالىق جابدىقتاۋعا ۇلكەن قولداۋ كورسەتىپ وتىرعاندارىڭىزعا العىس ايتامىز», دەدى ول.
جالپى, وبلىستا ىشكى ىستەر ورگاندارىنىڭ ماتەريالدىق-تەحنيكالىق بازاسىن نىعايتۋعا ەرەكشە كوڭىل بولىنەدى. ماسەلەن, 2022 جىلى جەرگىلىكتى بيۋدجەتتەن 26 اۆتوكولىك ساتىپ الىنىپ بەرىلگەن ەدى. وعان قوسا بۇگىنگە دەيىن وبلىستا 34 بەكەتتە, سونىڭ ىشىندە «الماتى – وسكەمەن» اۆتوجولىنا جانە تالدىقورعان قالاسىنىڭ جولدارىنا جالپى سانى 240-قا جۋىق «سەرگەك», «Vidar», «زەرەك» بەينەكامەرالارى ورناتىلدى. ءتۇرلى ۇلگىدەگى 8 ءموبيلدى كەشەن ساتىپ الىنىپ, ىشكى ىستەر ورگاندارىنىڭ قىزمەتتىك اۆتوكولىكتەرىنە ورناتىلدى. ولاردىڭ زاڭ بۇزۋشىلىقتاردى انىقتاۋدا ەداۋىر ىقپالى بار ەكەنىنە تاجىريبە جۇزىندە كوز جەتكىزىلگەندىكتەن, الداعى جىلى وسىنداي تاعى 20 ءموبيلدى كەشەن ساتىپ الۋعا 445 ملن تەڭگە قارجى قاراستىرىلىپ وتىر.
ء«بىزدىڭ ارىپتەستەر دەمالىس كۇندەرى دە تىنىم تاپپايدى. پوليتسيا كەشەندى كۇشتەرى جاساقتارىنىڭ قىزمەت وتكەرۋىنە باقىلاۋ كۇشەيتىلدى. قاۋىپتى ايماقتاردىڭ راديۋسىن, جەر بەدەرىن, اۋا رايى جاعدايلارىن, ىرگەلەس وبەكتىلەردىڭ سيپاتىن جانە ولاردى پايدالانۋ قاۋىپسىزدىگىنە اسەر ەتەتىن باسقا دا فاكتورلاردى ەسكەرە وتىرىپ, مەرەكەلىك وتشاشۋدى ۇشىرۋ ورىندارىن كۇزەتۋ قاراستىرىلدى. كولىكتىڭ, ارنايى تەحنيكانىڭ, قارۋ-جاراقتىڭ, جەكە قورعانىس جانە بەلسەندى قورعانىس قۇرالداردىڭ قوعامدىق ءتارتىپتى ساقتاۋ بويىنشا مىندەتتەردى ورىنداۋعا, جەدەل احۋال شيەلەنىسكەن جاعدايدا كۇشتەر مەن قۇرالداردىڭ تاسىمالدانۋعا دايىندىعى تەكسەرىلدى», دەيدى ازاماتتىق قورعاۋ مايورى قالدىبەك تولەۋ ۇلى.
ايتا كەتەيىك, مەرەكە كۇندەرى وبلىس كولەمىندە بارلىعى 2 682 اكىمشىلىك بۇزۋشىلىقتار انىقتالعان.
جەتىسۋ وبلىسى
