جەتىسۋ ولكەسىندە العاش اشىلعان ءبىلىم شاڭىراعىن مامان –تۇرىسبەك اۋلەتى سالدىرعان. بۇل بايقاۋدىڭ ماقساتى – مەكتەپتىڭ تاريحي مۇراسىن قايتا جاڭعىرتۋ, ءبىلىم شاڭىراعى تۇلەكتەرىنىڭ ءومىرى مەن قىزمەتىن, مامان – تۇرىسبەك ۇرپاقتارىنىڭ قازاق رۋحانياتىنا جاساعان ىستەرىن دارىپتەۋ.
ۇستاز قاۋىمىنىڭ سايىسىنداعى العاشقى ءسوزدى العان اباي اتىنداعى قازاق ۇلتتىق پەداگوگيكالىق ۋنيۆەرسيتەتىنىڭ وقىتۋشىسى, فيلولوگيا عىلىمدارىنىڭ كانديداتى ەرلان قاسەن, «مامانيا» مەكتەبىنىڭ قازاق قوعامىن وقىتۋداعى رولىنە توقتالدى. ءبىلىم شاڭىراعىن اشىپ, جان-جاقتان مىقتى ۇستازداردى شاقىرىپ, ولاردى باسپانامەن قامتىپ, بىرلەسكەن وقۋ باعدارلاماسىن بەكىتۋدەگى جاۋاپكەرشىلىكتى مىسالعا كەلتىردى.
«مۇندا قازاقتىڭ الىپتارى ءدارىس الىپ, ۇلت رۋحانياتىنا ولشەۋسىز ۇلەس قوسقان. بۇل قاتاردا ەسىمى ەلگە بەلگىلى پوەزيا قۇلاگەرى ءىلياس جانسۇگىروۆ, قازاقتىڭ العاشقى كونستيتۋتسياسىنىڭ اۆتورى بارلىبەك سىرتتانوۆ, قوعام قايراتكەرى ءبىلال سۇلەەۆ, اقىن عالي ورمانوۆ سەكىلدى ايتۋلى تۇلعالارىمىز بار. ولار قاراعاشتاعى قاسيەتتى قارا شاڭىراقتان قاناتتانىپ, الاشتىڭ نامىسىن قورعاعان ازاماتتار.سول زاماندا قازاق بالالارى ساۋاتتى بولسىن دەپ قارجىسىن بىلىمگە قۇيعان بايلار ساناۋلى. سونىڭ ىشىندە بىرەگەيى – مامان قۇتتىڭ ۇلى تۇرىسبەك قاجى. ول وسى اقسۋ وڭىرىندە مامانيا مەكتەبىن سالىپ, اۋىل بالالارىنا ءارىپ ۇيرەتتى. سىرتتان بىلىكتى ۇستازداردى تارتىپ, قاراعاشتى مادەني قالاشىققا اينالدىردى», دەدى وبلىستىق ءبىلىم باسقارماسىنىڭ باسشىسى مارات سۇلەيمەنوۆ.
بايقاۋعا بارلىق اۋدان ۇستازدارىنان قۇرالعان بىرنەشە كوماندا قاتىستى. ولار 3 اينالىم بويىنشا سىنعا ءتۇستى.
جالپى بايقاۋدىڭ كوتەرەر جۇگى, ماڭىزى جوعارى بولدى. ۇيىمداستىرۋشىلار بۇل بايقاۋدى كەلەسى جىلى دا وتكىزسەك دەگەن باستاما كوتەردى. ءىس-شارا سوڭىندا باس جۇلدە اقسۋ اۋدانىنىڭ كومانداسىنا ءتيدى. «مامانيا» مەكتەبىن اشقان اتىمتاي جومارت ازاماتتاردىڭ ەڭبەگى كوپكە ۇلگى ەتىلۋى ءتيىس.
جەتىسۋ وبلىسى
