فوتو: ۆەدومستۆو, ينستاگرام.
عىلىم جانە جوعارى ءبىلىم مينيسترلىگىنىڭ ءباسپاسوز قىزمەتىنىڭ مالىمەتىنشە 167 مىڭعا جۋىق ادامنىڭ 76,7%-ى قازاق تىلىندە, 23,2%-ى ورىس تىلىندە, 142 ادام اعىلشىن تىلىندە تەستىلەۋدەن وتۋگە ءوتىنىش بىلدىرگەن.
قاڭتار ۇبت-سىن وتكىزۋدىڭ ءبىرىنشى كۇنى سالا ءمينيسترى ساياسات نۇربەك استانا قالاسىنداعى تەستىلەۋ ورتالىقتارىنىڭ بىرىندە بولىپ, ۇبت-نىڭ ءوتۋ بارىسىمەن تانىسىپ, بولاشاق ستۋدەنتتەرگە ساتتىلىك تىلەدى.
«تالاپكەرلەر ءوتىنىش بەرۋ بارىسىندا تەستىلەۋ كۇنىن, ۋاقىتىن جانە پۋنكتىن وزدەرى تاڭدادى. ءبىرىنشى كۇنى 2277 ادام, ونىڭ ىشىندە ەلوردادا 155 تالاپكەر ۇبت تاپسىرادى. ەڭ كوپ تاڭدالاتىن بەيىندىك پاندەر كومبيناتسياسى بىرنەشە جىل قاتارىنان وزگەرىسسىز قالىپ وتىر. تالاپكەرلەردىڭ 17,5%-ى «ماتەماتيكا-فيزيكا» كومبيناتسياسىن تاڭداعان. ياعني, بۇل بولاشاق ينجەنەرلەر, مەحانيكتەر, مۇعالىمدەر, تەحنيكتەر, تەحنولوگتار, ەنەرگەتيكتەر, قۇرىلىسشىلار. ال 17,3%-ى «بيولوگيا-حيميا», 10,3%-ى «ماتەماتيكا-ينفورماتيكا» پاندەرىن تاڭدادى, سايكەسىنشە بولاشاق مەديتسينا قىزمەتكەرلەرى مەن IT ماماندارى», دەدى مينيستر.
ۇبت-داعى پاندەردىڭ سانى وزگەرىسسىز قالادى, ياعني ۇشەۋى مىندەتتى جانە ەكەۋى تاڭداۋ بويىنشا پاندەر. ۇبت تاپسىرمالار سانى – 120. ونىڭ ىشىندە «قازاقستان تاريحىنان» 20 تاپسىرما, «وقۋ ساۋاتتىلىعىنان» 10 تاپسىرما, «ماتەماتيكالىق ساۋاتتىلىقتان» 10 تاپسىرما جانە ەكى بەيىندىك ءپان بويىنشا 40 تاپسىرمادان. جوعارى بالل – 140.
تەستىلەۋ ۋاقىتى – 4 ساعات (240 مينۋت). ايتا كەتسەك, ەرەكشە ءبىلىم بەرۋ قاجەتتىلىكتەرى بار بالالار ءۇشىن ۇسىنىلاتىن قوسىمشا 40 مينۋت ۋاقىت ساقتالادى.
ەستەرىڭىزگە سالايىق, قاڭتارداعى ۇبت-عا شارتتى تۇردە اقىلى نەگىزدە كۇندىزگى وقۋ نىسانى بويىنشا جوعارى وقۋ ورىندارىنا قابىلدانعان, جازعى ۇبت ناتيجەلەرى بويىنشا شەكتى بالل جيناماعاندار, شىعارماشىلىق ۇبت-دان باسقا دايىندىق باعىتتارىنا, پەداگوگيكالىق باعىتقا اقىلى نەگىزدە اۋىسقىسى كەلەتىندەر, سونداي-اق مەكتەپ بىتىرەتىن تۇلەكتەر جوعارى وقۋ ورىندارىنا اقىلى نەگىزدە ءتۇسۋ ءۇشىن قاتىسادى.
