فوتو:instagram.com/islam_bairamukov_97
- يسلام ءىلياس ۇلى, بالۋاندارىمىز پاريجدەگى تورتجىلدىقتىڭ باستى دوداسىن ءبىر كۇمىسپەن قورىتىندىلادى. گرەك-ريمدە دەمەۋ جادىراەۆتىڭ كۇمىسى كوڭىلگە مەدەۋ بولعانمەن, ەركىن كۇرەس شەبەرلەرىنەن دە ەل جۇلدە كۇتكەنى جاسىرىن ەمەس. جۇرتتىڭ وسى تىلەگىنىڭ ورىندالماۋىنا نە سەبەپ بولدى؟
- راس, پاريج وليمپياداسىنىڭ ناتيجەسى ويداعىداي بولمادى. گرەك-ريمدە دەمەۋ جادىراەۆ توپ جاردى. التىنعا ءبىر قادام جەتپەي, سۇرىنگەنى ەرىكسىز اتتەگەن-اي دەگىزەدى. ال ەركىن كۇرەستە ناتيجە جوق. بولاشاقتا ءىرى باسەكەلەردە تاعى قاپى قالماۋ ءۇشىن جەڭىلىستەن جاقسى ساباق الۋى شارت. ەلىمىزدىڭ كۇرەسىنە وزگەرىستەر ەنگىزەتىن ۋاقىت جەتتى دەپ ويلايمىن. ءتيىستى فەدەراتسيا, باپكەرلەر قۇرامى دۇرىس باعىتتا جۇمىس باستاۋى ءتيىس. حالقىمىز «شىمشىق سويسادا قاساپشى سويسىن» دەيدى. مەنىڭشە, سپورتشىلاردى باپتايتىن ماماندار كۇرەستىڭ ناعىز جىلىگىن شاعىپ, مايىن ىشكەندەر بولۋى كەرەك. جەكە پىكىرىم بويىنشا, بالۋاندارعا باعىت جان-جاقتى بەرىلمەگەن. ءبىزدىڭ سپورتشىلار تەك اياققا جۇمىس ىستەيدى. كەۋدەدەن اسىرمايدى, جامباسقا لاقتىرمايدى, يىقتان اسىرىپ لاقتىرمايدى, قولدا جۇمىس ىستەۋ دەگەن جوق. اسىلىندا, كۇرەستىڭ قىر-سىرى كوپ. اياقتان ۇستاۋ, بەلدەن ۇستاۋ, كەۋدەدەن, يىقتان اسىرۋ سىندى باعىتتار جەتكىلىكتى دەڭگەيدە قامتىلماي, جەڭىس تە قولعا تۇسپەيدى.
- وسى ويلارىڭىزدى وليمپيادا تۇسىندا تىكەلەي ەفيردە ورتاعا سالدىڭىز. دەسە دە كاسىبي مامان, كۇرەس جاناشىرى رەتىندە سپورتشىلارمەن جەكە تىلدەسىپ, كەم كەتكەن تۇستارىن ايتا الدىڭىز با؟
- ءيا, قازاقستان كورەرمەندەرى كۇرەستى ەرەكشە ىقىلاسپەن تاماشالايدى. مەملەكەتىمىزدىڭ نامىسى سىنعا تۇسكەن كەزەڭدە جانىڭدى سالا, تاباندىلىقپەن كۇرەسۋ كەرەك. كەي بالۋاندارىمىزدىڭ بەلدەسۋىنە كوڭىلىمىز تولماي جاتتى. تىكەلەي ەفيردە ەموتسيانى جاسىرۋ دا مۇمكىن ەمەس. ونىڭ سىرتىندا تىلەكتەس نيەت جاتقانى تۇسىنىكتى دەپ ويلايمىن. ەستىر قۇلاققا سول ساتتە-اق بىلگەنىمىزدى بۇگىپ قالماي اقتارىپ سالدىق. ءوزىم سپورتشىلاردى تاربيەلەۋمەن اينالىسۋعا دەن قويدىم. مۇنداي مۇمكىندىككە رەسپۋبليكالىق سپورت كوللەدجىن باسقارۋ ارقىلى يە بولىپ وتىرمىز. 2024 جىلدىڭ ساۋىرىنەن وسى قىزمەتكە تاعايىندالعالى جوعارىدا تۇيگەن ءبىرشاما قاتەلىكتەردىڭ الدىن الۋعا كۇش سالىپ جاتىرمىز. شاكىرتتەرىمىزدىڭ اياق الىسىن كۇنى-ءتۇنى باقىلايمىز, ىشكەن اسىنا دەيىن قاداعالايمىز دەسەم ارتىق ەمەس. ءتىپتى دالاعا جەڭىل شىقسا دا سىرتتاعى تەمپەراتۋراعا ساي كيىنۋىن تالاپ ەتەمىز. مۇنىڭ ءبارى جەڭىستى جولعا باستايتىن - ءتارتىپ.
- بىلۋىمىزشە, ءوزىڭىز دە وسى قاراشاڭىراق رەسپۋبليكالىق سپورت كوللەدجىنىڭ تۇلەگىسىز. كەي ساتتەردە جۇرتشىلىق سپورتشىلاردىڭ لاۋازىمدى قىزمەتتىڭ تىزگىنىن تارتقانىنا سىني كوزقاراسپەن قاراپ جاتادى. وسى تۋرالى ءسىزدىڭ پىكىرىڭىز قانداي؟
- مەنىڭشە, كىم بولسا دا سول سالانىڭ ىشكى جۇيەسىن جاقسى بىلسە, ايرىقشا نازار اۋداراتىن ماسەلە جوق دەپ ويلايمىن. ارينە, تاجىريبە دە كەرەك. باسشى جۇمىسىنىڭ ناتيجەسى 1-2 جىلدا-اق كورىنەدى. بۇل ورايدا سپورتشىلارعا دا نەگە مۇمكىندىك بەرمەسكە؟! حالىقتىڭ كوكەيىندە «انا سپورتشى قايدا ءجۇر ەكەن, مىنا چەمپيون قانداي ىسپەن اينالىسىپ ءجۇر ەكەن؟» دەگەن ساۋال تۋىپ جاتادى. سپورتشىلار ءوزى ءجۇرىپ وتكەن جول بولعاندىقتان قۇراما كوماندا, فەدەراتسيا, اۋىل-ايماقتارداعى سپورتتى باسقارۋ كوميتەتتەرى بولسىن, بارلىق جەردە جۇمىس ىستەپ كورۋى كەرەك. ال ولاردى قولدايتىن تاجىريبەسى تولىسقان مامان جانىندا بولسا نۇر ۇستىنە نۇر. كەيدە قاعازعا قاتىستى جۇمىستاردى رەتتەۋ كۇتىپ تۇرادى. سونداي ساتتەردە قولداۋ, باعىت نۇسقاۋ ماڭىزدى.
- ءسوز سوڭىندا ءوزىڭىزدى جەڭىسكە جەتەلەگەن تاسىلدەردى ءبولىسىڭىزشى.
- قارسىلاسىڭدى جەك كورۋىڭ كەرەك. بۇل - سپورتتىڭ زاڭى. مەن قارسىلاستارىممەن امانداسپايتىن ەدىم. سالەمدەسىپ تۇرعاندا سىرىڭدى الدىرىپ قويۋىڭ بەك مۇمكىن. قاي جەرىڭ اۋىرىپ تۇر, ءوزىڭدى قالاي سەزىنىپ تۇرعانىڭدى ءبىلىپ الىپ, قارسى ءتاسىل قولدانۋى دا عاجاپ ەمەس. قاي دەڭگەيدە بولسىن قارسىلاستارمەن دوستاسىپ, قۇشاقتاسىپ جۇرۋگە بولمايدى. پىكىرىمدى وقۋشىلار جاقسى ويمەن ايتىپ جاتقانىمدى تۇسىنە جاتار. كەيدە جاتتىعۋدا قۇراما بالالارى ءبىر-بىرىمەن امانداسىپ, قۇشاقتاسىپ جاتقاندا, ىسقىرىق شالىپ توقتاتىپ, «قۇشاقتاسىپ, امانداسىپ جاتساڭدار بوزكىلەمدە قانداي قارسىلىق كورسەتە الاسىڭدار», دەپ ەسكەرتىپ جاتامىن. قانداي دەڭگەيلى جارىس بولسا دا قارسىلاسىڭا جاۋ سەكىلدى قاراۋ كەرەك. سوندا عانا جەڭىس تۇعىرىنا كوتەرىلۋگە بولادى.
- اڭگىمەڭىزگە راقمەت!
