فوتو: egemen.kz/ ەرلان ومار
وسى جىلدىڭ 1 قىركۇيەگىنەن باستاپ باكالاۆريات ستۋدەنتتەرىنە بەرىلەتىن ستيپەنديا 52 372 تەڭگەگە دەيىن, ال پەداگوگيكالىق جانە مەديتسينالىق باعىتتارداعى ءبىلىم الۋشىلارعا – 84 000 تەڭگەگە دەيىن, ماگيسترانتتارعا – 117 098 تەڭگەگە, دوكتورانتتارعا – 262 500 تەڭگەگە دەيىن وسەدى.
ينتەرناتۋرادا وقيتىن ستۋدەنتتەر شاكىرتاقىسى – 94 862 تەڭگە, ال رەزيدەنتۋرادا ءبىلىم الۋشىلارعا – 134 664 تەڭگە كولەمىندە ستيپەنديا تولەنەدى.
ەمتيحان سەسسياسىن «وتە جاقسى» تاپسىرعان جاعدايدا ستۋدەنتتەردىڭ جوعارى ستيپەنديا الۋ مۇمكىندىگى ساقتالىپ قالا بەرمەك.
ستۋدەنتتەردىڭ جەكەلەگەن ساناتتارى ءۇشىن ستيپەندياعا ۇستەمەاقى بەلگىلەنىپ وتىر.
ماسەلەن جوعارى نەمەسە كاسىپتىك, ورتا بىلىمنەن كەيىنگى, جوعارى وقۋ ورنىنان كەيىنگى ءبىلىم الاتىن كورۋ جانە ەستۋ قابىلەتى بۇزىلعان باكالاۆريات ستۋدەنتتەرىنە – 94 651 تەڭگە, ماگيسترانتتارعا – 204 921 تەڭگە, دوكتورانتتارعا – 459 375 تەڭگە ۇستەمەاقى قوسىلادى.
جارالانۋ, كونتۋزيا, اۋرۋ سالدارىنان مۇگەدەكتىگى بار نەمەسە مەرتىككەن ادامدارعا باكالاۆريات ستۋدەنتتەرىنە – 78 558 تەڭگە, ماگيسترانتتارعا – 175 647 تەڭگە, ينتەرندەرگە – 142 293 تەڭگە ۇستەمەاقى بەلگىلەنگەن.
اتا-اناسىنىڭ قامقورلىعىنسىز قالعان نەمەسە قامقورشىلىقتاعى جەتىم بالالار قاتارىنداعى ءبىلىم الۋشىلاردىڭ ستيپەندياسى 30%-عا كوتەرىلەدى, ياعني باكالاۆريات ستۋدەنتتەرىنە – 68 083 تەڭگە, ماگيسترانتتارعا – 152 227 تەڭگە, ينتەرندەرگە – 123 320 تەڭگە ۇستەمەاقى تولەنەدى.
مەملەكەتتىك ستيپەنديادان باسقا, جوعارى وقۋ ورنىنىڭ عىلىمي كەڭەسىنىڭ شەشىمى بويىنشا 104 744 تەڭگە مولشەرىندە تاعايىندالاتىن وقۋدا ەرەكشەلەنگەن ستۋدەنتتەرگە, وليمپيادالاردىڭ, شىعارماشىلىق كونكۋرستاردىڭ, سپورتتىق جارىستاردىڭ جەڭىمپازدارىنا ارنالعان پرەزيدەنتتىك ستيپەنديا دا بار.
پرەزيدەنتتىك ستيپەنديانى 3-ءشى وقۋ جىلىنان باستاپ ستۋدەنتتەر جانە 2-ءشى وقۋ جىلىنان باستاپ ماگيسترانتتار الا الادى. مۇنداي ستيپەنديانى الۋعا بيۋدجەتتىك نەگىزدە وقيتىن ستۋدەنتتەر دە, اقىلى نەگىزدە وقيتىندار دا قۇقىلى.
