فوتو: ءماجىلىستىڭ ءباسپاسوز قىزمەتى
ماجىلىستەگى «Amanat» پارتياسى فراكتسياسىنىڭ دەپۋتاتتارى رۋسلان قوجاسباەۆ پەن بولات كەرىمبەك جەتىسۋ وبلىسىنا جۇمىس ساپارى بارىسىندا كوكسۋ اۋدانىنداعى «سترويتەل» كىرپىش-كەرامزيت زاۋىتىنىڭ جۇمىسىمەن تىنىسىپ, ەڭبەك ۇجىمىمەن كەزدەستى. سەرىكتەستىكتىڭ باس ديرەكتورى الەكساندر بۋزىكين زاۋىتتىڭ اۆتونومدى رەجىمدە جۇمىس ىستەپ, جىلىنا 44 ملن دانا كىرپىش شىعاراتىنىن ايتتى.
– سىزدەر مەملەكەتىمىزدىڭ دامۋى جولىندا ۇلكەن جۇمىس اتقارىپ كەلەسىزدەر. وسى جەردە ايتىلعان ماسەلەلەردىڭ بارلىعىن ءتيىستى مەكەمەلەرگە جەتكىزەمىز, – دەدى ر.قوجاسباەۆ.
سونداي-اق ءماجىلىس دەپۋتاتى بولات كەرىمبەك كاسىپورىن ءوز ونىمدەرىمەن جەتىسۋ ءوڭىرىن عانا ەمەس, قازاقستان نارىعىن دا قامتاماسىز ەتىپ وتىرعانىن اتاپ ءوتتى.
«Amanat» پارتياسى فراكتسياسىنىڭ دەپۋتاتتارى قايرات بالابيەۆ, ۇلاسبەك سادىبەكوۆ, تەمىر قىرىقباەۆ پەن نۇرسۇلتان بايتىلەسوۆ تۇركىستان وبلىسىندا بولىپ, سارىاعاش اۋدانىنداعى كاسىپكەرلىك نىسانداردى ارالادى. سونداي-اق اۋدان جۇرتشىلىعىمەن كەزدەستى. ءماجىلىس دەپۋتاتتارى ەڭ اۋەلى وڭىردەگى «Agrotur» شارۋا قوجالىعى جىلىجايىنىڭ تىنىس-تىرشىلىگىمەن تانىستى. مۇندا 4 گەكتار جەردە كوپتەگەن باقشا ءونىمى وسىرىلەدى. كاسىپكەرلەر دەپۋتاتتارعا تۇقىمباق شارۋاشىلىقتارىن سۋبسيديالاۋ, جىلىجايلاردى كومىرمەن قامتاماسىز ەتۋدە تۋىندايتىن پروبلەمالارعا قاتىستى ويلارىن ورتاعا سالىپ, ۇسىنىستارىن جەتكىزدى.
ءماجىلىس دەپۋتاتى سنەجاننا يماشەۆا باتىس قازاقستان وبلىسىنا جۇمىس ساپارىمەن باردى. ورال قالاسى دەرقۇل اۋىلىنداعى «جايلى مەكتەپ» رەسپۋبليكالىق جوباسى اياسىندا سالىنعان №51 جالپى ءبىلىم بەرەتىن مەكتەپتىڭ جۇمىسىمەن تانىستى. №51 ورتا مەكتەپ ديرەكتورى جاقسىعالي جۇمابايدىڭ ايتۋىنشا, وقۋشىلار كوپ بولعاندىقتان ساباق ءۇش اۋىسىمدا جۇرگىزىلەتىن №49 ورتا مەكتەپتىڭ وقۋشىلارى وسىندا اۋىستىرىلعان. بۇگىندە 1 200-دەن اسا بالا جاڭا, جايلى مەكتەپتە ءبىلىم الىپ جاتىر.
– مەملەكەت باسشىسى جۋىردا «انا ءتىلى» گازەتىنە بەرگەن سۇحباتىندا ايتقانداي, الداعى ۋاقىتتا رەسپۋبليكا بويىنشا 460 مىڭ وقۋشىعا ارنالعان 217 جايلى مەكتەپ سالۋ جوسپارلانىپ وتىر. دەپۋتاتتار بۇل قۇرىلىستىڭ ساپالى ءارى ۋاقتىلى جۇرگىزىلۋىن ەرەكشە نازاردا ۇستايدى, – دەدى س.يماشەۆا.
ماجىلىسمەندەر ءادىل جۇبانوۆ پەن دۇيسەنباي تۇرعانوۆ اتىراۋ وبلىسى جىلىوي اۋدانىنا ساپارى بارىسىندا جەم وزەنى مەن قۇرساي وزەكتەرىنىڭ ءتۇبىن تەرەڭدەتۋ جوباسىنىڭ ورىندالۋ بارىسىمەن تانىستى.
ساپار اياسىندا دەپۋتاتتار جەرگىلىكتى تۇرعىندارمەن كەزدەسىپ, ولاردىڭ تۇرمىس-تىرشىلىگىن, وڭىردەگى ەكولوگيالىق جاعدايدى جانە اتقارىلىپ جاتقان جۇمىستاردى تالقىلادى. ازاماتتاردىڭ ۇسىنىس-تىلەكتەرىن تىڭداپ, پارلامەنتتە قابىلدانىپ جاتقان زاڭدار تۋرالى پىكىر الماستى.
ءماجىلىس دەپۋتاتى, «Respublica» پارتياسى فراكتسياسىنىڭ مۇشەسى ولجاس قۇسپەكوۆ الماتى وبلىسىنا ساپارى اياسىندا قاراساي اۋدانى بويىنشا شەكارا باسقارماسىنا باردى. دەپۋتات ارنايى ماقساتتاعى ءموبيلدى ءىس-قيمىل ءبولىمىنىڭ جۇمىسىمەن تانىسىپ, وقۋ ورتالىعى مەن وقۋ-وندىرىستىك زەرتحانانى ارالادى. ۇجىممەن اسكەري قىزمەتشىلەردى دايارلاۋ, «قاراساي» ءوب ينجەنەرلىك-جەلىلىك ينفراقۇرىلىمىنىڭ قىزمەتىن تالقىلادى.
– مەملەكەت جاساندى ينتەللەكتىنى, تەحنيكانىڭ سوڭعى جەتىستىكتەرى – ساپالى جابدىقتاردى, ارنايى داتچيكتەردى پايدالانا وتىرىپ, شەكارادا قاۋىپسىزدىكتى قامتاماسىز ەتۋگە ءتيىس. ارينە, تۇرمىستىق ماسەلەلەردى دە شەشۋ قاجەت. شەكارادا ساپالى جانە قاۋىپسىز قىزمەت اتقارۋ ءۇشىن بارلىق جاعداي بولۋى كەرەك, – دەدى و.قۇسپەكوۆ.
ال ماجىلىستەگى «اق جول» فراكتسياسىنىڭ دەپۋتاتى قازىبەك يسا تۇركىستان وبلىسىنىڭ زيالى قاۋىم وكىلدەرىمەن كەزدەستى. دەپۋتات رۋحانياتتى قولداۋعا باعىتتالعان بىرقاتار باستاماعا توقتالدى. سونىڭ ىشىندە جۋىردا عانا ماجىلىستە قابىلدانعان تۇركىستان قالاسىنا ەرەكشە مارتەبە بەرۋ تۋرالى زاڭ قالاعا ەرەكشە مارتەبە بەرىپ قانا قويماي, قالانىڭ قارىشتاپ دامۋىنا, وڭىرگە قوماقتى ينۆەستيتسيا تارتۋعا, مادەني-رۋحاني قۇندىلىقتاردى ساقتاپ قالۋعا زور سەپتىگىن تيگىزەتىنىن اتاپ ءوتتى.
ءوز كەزەگىندە «Turkistan Media Holding» باسقارۋشى ديرەكتورى تەلمان بەيسەن تاريحي ورىندار سانالاتىن «قىزقورعان», «بالاقورعان» قامالدارىن مەملەكەتتىك قورعاۋعا الۋدى ۇسىندى. وسى كيەلى جەرلەرگە باراتىن جولدى جوندەپ, تۋريستەرگە قولايلى جاعداي جاساۋعا شاقىردى.
