دەپۋتات ارنايى ماقساتتاعى ءموبيلدى ءىس-قيمىل ءبولىمىنىڭ جۇمىسىمەن تانىسىپ, وقۋ ورتالىعى مەن وقۋ-وندىرىستىك زەرتحانانى ارالادى. ۇجىممەن اسكەري قىزمەتشىلەردى دايارلاۋ, «قاراساي» ءوب ينجەنەرلىك-جەلىلىك ينفراقۇرىلىمىنىڭ قىزمەتىن تالقىلادى.
جيىن بارىسىندا قازاندىقتى قايتا جاڭعىرتۋ ماسەلەسىن شەشۋ جولدارى, شەكارالاس اۋماقتى سۋمەن قامتۋ جانە كارىز جۇيەسى ماسەلەلەرى ايتىلدى. سونداي-اق اسكەرگە شاقىرىلعانداردىڭ قىزمەتتەن ورالعان سوڭ جۇمىسقا ورنالاسۋ مۇمكىندىگى دە ءسوز بولدى.
– مەملەكەت جاساندى ينتەللەكتىنى, تەحنيكانىڭ سوڭعى جەتىستىكتەرى – ساپالى جابدىقتاردى, ارنايى داتچيكتەردى پايدالانا وتىرىپ, شەكارادا قاۋىپسىزدىكتى قامتاماسىز ەتۋگە ءتيىس. ارينە, تۇرمىستىق ماسەلەلەردى دە شەشۋ قاجەت. شەكارادا ساپالى جانە قاۋىپسىز قىزمەت اتقارۋ ءۇشىن بارلىق جاعداي بولۋى قاجەت, – دەدى و.قۇسپەكوۆ.
دەپۋتات سونداي-اق قر توتەنشە جاعدايلار مينيسترلىگى مەملەكەتتىك ماتەريالدىق رەزەرۆتەر كوميتەتىنىڭ «رەزەرۆ» رمك «كومەتا» فيليالىندا بولىپ, فيليال قىزمەتىنىڭ نەگىزگى كورسەتكىشتەرىمەن, جەتىستىكتەرىمەن جانە مىندەتتەرىمەن تانىستى. جۇمىس ساپارى بارىسىندا قر ۇلتتىق قاۋىپسىزدىك كوميتەتى شەكارا قىزمەتىنىڭ «الماتى جابدىقتاۋ باسقارماسىنا» دا باردى. مۇندا ول وندىرىستىك تسەحتىڭ كۇردەلى جوندەۋ بارىسىن, سونداي-اق ينجەنەرلىك قۇرىلىمداردى دايىنداۋ بويىنشا وندىرىستىك قىزمەتتى, ينجەنەرلىك-تەحنيكالىق جابدىقتاردى جوندەۋ جانە مونتاجداۋ پروتسەسىن كورىپ قايتتى.
سونىمەن قاتار ولجاس قۇسپەكوۆ قۇرىلىس ماتەريالدارىن شىعاراتىن بىرقاتار كاسىپورىندا – كوبىكتى پۆح قاڭىلتىرلارىن شىعاراتىن زاۋىتتا, سەندۆيچ-پانەلدى جانە گرانيت زاۋىتىندا بولدى. بۇدان سوڭ دەپۋتات الماتى قالالىق ءماسليحاتىنىڭ وتىرىسىنا قاتىسىپ, وندا قالانىڭ تۇيتكىلدى ماسەلەلەرى تالقىلاندى. ول وزەكتى ماسەلەلەردى جەدەل شەشۋ جانە قالا تۇرعىندارىنىڭ ءومىر ءسۇرۋ جاعدايىن جاقسارتۋ بويىنشا ءماسليحات پەن ءماجىلىس دەپۋتاتتارىنىڭ بىرلەسكەن جۇمىسىنىڭ ماڭىزدىلىعىن اتاپ ءوتتى.
