فوتو: 24KZ
جالپى ءبىلىم جانە عىلىم سالاسىندا قىزمەت اتقارىپ, جاستاردى تاربيەلەۋگە اتسالىسىپ جۇرگەندىكتەن, ولاردىڭ يگىلىگى ءۇشىن ىسكە اسىپ جاتقان رەفورمالارعا توقتالىپ كەتسەم دەيمىن. پرەزيدەنتىمىز جاستار يگىلىگى ءۇشىن جاسالىنىپ جاتقان رەفورمالار مەملەكەت ستراتەگياسىنىڭ تۇپكى ءمانى ەكەنىن باسا ايتتى. سونىمەن بىرگە وسى جىلدى «جۇمىسشى ماماندىقتار جىلى» دەپ جاريالاعانىنا دا توقتالدى. ال جاھاندانۋ ۇدەرىسىنىڭ ءبىر ەرەكشەلىگى رەتىندە جاستاردىڭ ءبىلىم الۋ ماقساتىندا نەمەسە قىزمەتتە ءوسۋ ءۇشىن شەتەلگە كوپتەپ شىعۋىنا تۇسىنىستىكپەن قاراۋعا شاقىردى.
جاس عالىمداردىڭ حالىقارالىق «بولاشاق» ستيپەندياسىنىڭ شەتەلدەگى عىلىمي ورتالىقتاردا تاعىلىمدامادان ءوتۋى – زور مۇمكىندىك. راسىمەن وسىنداي ساپالى عىلىمي تاعىلىمدامالار ەلىمىزگە اۋاداي قاجەت. سونداي-اق ۇلتتىق يدەولوگيانى قالىپتاستىرۋعا قاتىستى زەرتتەۋلەر جۇرگىزۋ, حالقىمىزدىڭ سالت-ءداستۇرى مەن مادەنيەتىن دارىپتەپ, ەلىمىزدىڭ ابىروي-بەدەلىن ارتتىرۋعا اتسالىسۋ ماقساتىندا حالىقارالىق «بولاشاق» باعدارلاماسىمەن مۇمكىندىگىنشە وقىتۋشىلاردى, زەرتتەۋشىلەردى الەمنىڭ بەلدى ۋنيۆەرسيتەتتەرىنە جىبەرۋگە باسىمدىق بولسا دەيمىز.
بۇگىندە شەتەلدە ءبىلىم الۋ ورىندالمايتىن ارمان ەمەس. ناقتى ماقساتتى كوزدەپ, العا – ءبىلىم مەن تابىس جولىنا ۇمتىلعاندار ءۇشىن الەمنىڭ بارلىق ەلدەرىنىڭ ەڭ بەدەلدى ۋنيۆەرسيتەتتەرى مەن كوللەدجدەرىنىڭ ەسىگى ءاردايىم اشىق. تاعىلىمداما بارىسىندا العان تاجىريبەمىزدى ەلىمىزگە تانىستىرۋ, سونداي-اق شەتەلدىك ارىپتەستەرىمىزبەن تىعىز بايلانىس ورناتىپ, ءوز سالامىز بويىنشا بىرىككەن ءتۇرلى ءىس-شارالاردى ۇيىمداستىرۋ ءبىلىم-عىلىم سالاسىنىڭ دامۋىنا سەپتىگىن تيگىزەر ەدى. پرەزيدەنتىمىز ايتقانداي, قازاقستان دەگەن برەندتى الەمگە تانىتۋ ماڭىزدى ميسسيامىز بولۋ كەرەك.
گۇلناش اسحات,
ابىلاي حان اتىنداعى قازاق حالىقارالىق قاتىناستار جانە الەم تىلدەرى ۋنيۆەرسيتەتىنىڭ كافەدرا مەڭگەرۋشىسى, PhD
