پاۆلوداردان الماتىعا دەيىنگى ءجۇرۋ ۋاقىتى – 26 ساعات 44 مينۋت. ءبىر باعىتقا بيلەت قۇنى – كۋپەگە 15 072 تەڭگە, پلاتسكارتقا 9 945 تەڭگە. جالپى 3 پويىز قۇرامى, 15 ۆاگون (8 كۋپە جانە 7 پلاتسكارت) جۇمىلدىرىلعان.
ۆاگونداردى جاڭارتۋ جانە جولاۋشىلار تاسىمالىنىڭ ساپاسىن ارتتىرۋ ماقساتىندا وزگەرىستەر ەنگىزىلىپ جاتىر. پەتروپاۆل قالاسىنداعى وتاندىق ۆاگون جاساۋ زاۋىتىندا وندىرىلگەن جولاۋشىلار ۆاگونى اتالعان باعىتتا جۇرە باستادى. «جولاۋشىلار تاسىمالى» اق پەتروپاۆل ۆاگون جاساۋ زاۋىتىمەن 157 ۆاگوندى جەتكىزۋ بويىنشا شارت جاسادى. وسى كەلىسىم اياسىندا 50 ۆاگون جەتكىزىلىپ, №31/32 «پاۆلودار – الماتى» باعىتىنا جىبەرىلدى», دەيدى «جولاۋشىلار تاسىمالى» اق ءباسپاسوز حاتشىسى ناريمان دۇيسەكەەۆ.
جاڭا ۆاگوندار اۋانى باپتاۋ جۇيەسى, ءتۇتىن دەتەكتورى, بيودارەتحانا جانە تامبۋرداعى بەينەباقىلاۋ جۇيەسىمەن جابدىقتالعان. جولاۋشى جايلىلىعى ءۇشىن كۋپەلەردە ەلەكتر روزەتكاسى مەن USB پورتتار قاراستىرىلعان. پلاتسكارت – 52 ورىن, كۋپە – 36 ورىنعا لايىقتالعان. قازىر كومپانياعا 2 171 ۆاگون تيەسىلى. 2030 جىلعا دەيىن ەسكىرگەن ۆاگونداردى ەسەپتەن شىعارۋ جوسپارلانعان. پاركتى جاڭارتۋ اياسىندا جاڭا ۆاگوندار ساتىپ الىنادى. كەيىنگى 10 جىلدا اكتسيونەرلىك قوعامنىڭ ۆاگوندار پاركى 50%-عا جاڭارعان. سونىمەن قاتار «Stadler Bussnang AG» كومپانياسىمەن 2025–2030 جىلدار ارالىعىندا «Stadler» تەحنولوگياسى بويىنشا 557 ۆاگون ساتىپ الۋ تۋرالى كەلىسىمشارت جاسالعان.
سونىمەن بىرگە جاڭا ۆاگوندار اتىراۋ – ماڭعىستاۋ, اقتوبە – اتىراۋ, پاۆلودار – تۇركىستان, استانا – سەمەي, الماتى – جەزقازعان باعىتتارىندا قاتىنايدى.
پاۆلودار وبلىسى
