اۋداندىق مادەنيەت ءۇيىنىڭ شىعارماشىلىق جەتەكشىسى ناتاليا ەرماك العاش قولىنا دومبىرا العاندا «تەپەڭكوك» كۇيىن ۇيرەنىپتى.
«وعان شامامەن ەكى اپتا ۋاقىت جۇمسادىم. اۋەلدە «قولىمنان كەلمەيدى-اۋ» دەپ ويلادىم. بىراق مەنى دومبىرا قاتتى باۋراپ الدى. قوڭىر ءۇنى قۇلاعىمنان كەتپەي قويدى. سودان با, تەز ۇيرەنىپ الدىم», دەدى ول.
قازىر اتالعان اۋداندا قىزمەت ىستەيتىن ءتۇرلى ماماندىق يەلەرى اراسىندا دومبىرا ۇيرەنىپ جۇرگەندەر از ەمەس. سولاردىڭ دەنى – وزگە ۇلت وكىلدەرى.
«جاركول» ەتنو-مادەني ءانسامبلىنىڭ جەتەكشىسى جاندوس مىرزاحمەتوۆتىڭ ايتۋىنشا, بىلتىر «دومبىرا» كۇنى مەرەكەسىندە 140 دومبىراشى ونەر كورسەتىپتى. سولاردىڭ اراسىندا 70–80 ادام وزگە ۇلت وكىلدەرى بولعان. وسى ونەرپازداردىڭ ىشىندە 20-دان اسا ازامات دومبىرانى جاقسى مەڭگەرىپ العان. كۇمبىرلەتە تارتادى.
«بۇگىندە ولار حالىق كۇيى «تەپەڭكوك» پەن نۇرعيسا تىلەنديەۆتىڭ «القيسساسىن» ەركىن وينايدى. قازىر دومبىراشىلاردىڭ رەپەرتۋارىندا 3-4 كۇي بار. ءبىزدىڭ اۋداندا دومبىرا ۇيرەنۋگە وزگە ۇلت وكىلدەرىنىڭ قىزىعۋشىلىعى كۇشتى. سوعان قاراپ, ولاردىڭ قاتارى ءالى دە كوبەيە تۇسەدى دەپ ويلايمىن», دەيدى انسامبل جەتەكشىسى.
ماسەلەن, اۋدان اكىمدىگىنىڭ جەتەكشى مامانى داريا تيمچەنكو دومبىرانى از ۋاقىت ىشىندە ۇيرەنىپ العان. ءبىر عاجابى, ول سول قولىمەن تارتادى.
«جەتى جىل مۋزىكا مەكتەبىندە وقىدىم. گيتارا تارتىپ, ءان ايتتىم. ال دومبىرانى «جاستار» ۇيىندە اشىلعان ۇيىرمەگە بارىپ ۇيرەندىم. مۋزىكالىق ءبىلىمىم بولعاندىقتان, اسا قينالعان جوقپىن. جىلدام مەڭگەردىم. ەندى دومبىرانى كاسىبىي دەڭگەيدە ۇيرەنىپ السام دەيمىن», دەدى ول.
بەيبىت مەيرام ۇلى,
جۋرناليست
قوستاناي وبلىسى,
فەدوروۆ اۋدانى
