سۋرەت: instagram.com/mazhilis.kz/
ماجىلىستەگى «اۋىل» پارتياسى فراكتسياسىنىڭ دەپۋتاتتارى اناس باققوجاەۆ پەن تاڭساۋلە سەرىكوۆ ايماقتارعا ساپارى اياسىندا قىزىلوردا قالاسىنداعى ءىرى ءوندىرىس ورىندارىنىڭ ءبىرى «كۆانت» زاۋىتىندا بولدى. دەپۋتاتتار زاۋىتتىڭ قازىرگى تىنىس-تىرشىلىگىمەن تانىسىپ, جۇمىسشىلارمەن كەزدەستى. اڭگىمە بارىسىندا حالىق قالاۋلىلارى ماجىلىستەگى زاڭ شىعارۋ قىزمەتى تۋرالى, سونىڭ ىشىندە الەۋمەتتىك-ەكونوميكالىق باعىتتا قابىلدانىپ جاتقان زاڭدار تۋرالى اقپارات بەردى. 5 مىڭ شارشى مەتردى قامتيتىن كاسىپورىن تولىقتاي اۆتوماتتاندىرىلعان جۇيە نەگىزىندە جۇمىس ىستەيدى. مۇندا 100-دەن اسا مەتالل تۇرلەرى وڭدەلەدى.
«ەلدەگى ءوندىرىس سالاسىن دامىتۋ ءۇشىن وسى «كۆانت» سياقتى زاۋىتتارعا باسا كوڭىل ءبولۋ كەرەك. وسىنداي كاسىپورىنداردى كوبىرەك قولداۋدى ۇسىنامىن. ويتكەنى ونىڭ ەل ەكونوميكاسىن ارتتىرۋعا قوساتىن ۇلەسى زور», دەدى ا.باققوجاەۆ.
ال ت.سەرىكوۆ «كۆانت» زاۋىتىنىڭ باسەكەگە قابىلەتتىلىگىن ارتتىرۋدىڭ, ءوندىرىس ورىندارىنىڭ ىشكى نارىقتاعى بەلسەندىلىگىن كۇشەيتۋدىڭ ماڭىزىن اتاپ ءوتتى. سونىمەن قاتار ساتىپ الۋ جۇيەسىن جەتىلدىرۋ ارقىلى وتاندىق زاۋىتتاردىڭ دامۋ قارقىنىن ايتارلىقتاي ارتتىرۋعا بولاتىنىنا نازار اۋداردى.
الماتى قالاسىنا جۇمىس ساپارى اياسىندا ماجىلىستەگى «قازاقستان حالىق پارتياسى» فراكتسياسىنىڭ دەپۋتاتى يرينا سميرنوۆا ەكولوگيالىق ماسەلەلەر بويىنشا پارتيانىڭ سايلاۋالدى باعدارلاماسىنا سايكەس №1 جىلۋ ەلەكتر ورتالىعىنىڭ جۇمىس بارىسىمەن تانىستى. ساپار بارىسىندا ي.سميرنوۆا «الەس» اق (جەو-1) كوزدەرىندە ورناتىلعان شىعارىندىلاردى باقىلاۋدىڭ اۆتوماتتاندىرىلعان جۇيەسىنىڭ جۇمىسىمەن تانىستى. جۇيە ەكولوگيالىق باقىلاۋدىڭ اشىقتىعىن ارتتىرۋعا جانە اتموسفەراعا زياندى شىعارىندىلاردى ازايتۋعا باعىتتالعان.
«2017 جىلدان باستاپ جىلۋ ەلەكتر ورتالىعى گازعا كوشتى. بۇل زياندى زاتتاردىڭ شىعارىندىلارىن ونداعان ەسەگە ازايتتى. قالانى جىلۋمەن قامتاماسىز ەتۋ بويىنشا جۇيەلى جۇمىستار ۇيىمداستىرىلىپ, جولعا قويىلدى. دەگەنمەن كادر ماسەلەسىندە پروبلەمالار بار. مۇندا ومىرلەرىن وسى ماڭىزدى ىسكە ارناعان وتباسىلىق اۋلەتتەر بار. ينستيتۋت, كوللەدج تۇلەكتەرى ءىس جۇزىندە وندىرىسكە كەلە بەرمەيدى», دەدى دەپۋتات.
ءماجىلىس دەپۋتاتى جەو باسشىلىعىمەن سو2 سياقتى از مولشەردە شىعارىلاتىن گازداردى قالا كاسىپورىندارىندا پايدالانۋ ءۇشىن جيناۋ مۇمكىندىگىن تالقىلادى. بۇل اۋانى جاقسى تازارتۋعا, سونداي-اق ەنەرگەتيكالىق كاسىپورىننىڭ ءوزى پايدا تابۋىنا ىقپال ەتەدى. سونداي-اق مەگاپوليستىڭ ەكولوگيالىق جاعدايىن جاقسارتۋ ءۇشىن كادرلىق قامتاماسىز ەتۋ, ەكولوگيالىق باستامالاردى جۇزەگە اسىرۋ جانە وزىق تەحنولوگيالاردى ەنگىزۋ مۇمكىندىكتەرىنە قاتىستى باسقا دا ماسەلەلەر قارالدى.
ال «اmاnاt» پارتياسى فراكتسياسىنىڭ مۇشەلەرى بولاتبەك ناجمەتدين ۇلى مەن دانابەك يسابەكوۆ شىمكەنت قالاسىنداعى مومىنوۆ كوشەسىنىڭ بويىندا سالىنىپ جاتقان تەمىرجول وتكەلىنىڭ قۇرىلىسىمەن تانىسىپ, جەرگىلىكتى تۇرعىندارمەن كەزدەستى.
جوبا اياسىندا تەمىرجولدىڭ ۇستىنەن ءتورت جولاقتى اسپالى كوپىر سالىنىپ, ول جاياۋ جۇرگىنشىلەرگە ارنالعان جولمەن جابدىقتالادى. سونىمەن قاتار جول قاۋىپسىزدىگىن قامتاماسىز ەتۋ ءۇشىن جارىقشامدار ورناتىلادى. قۇرىلىس 2024 جىلدىڭ قاراشاسىندا باستالعان. نىساندى ارالاپ كورگەن دەپۋتاتتار قۇرىلىس جۇمىستارىنىڭ ساپالى ءارى ۋاقىتىندا ورىندالۋىن قاداعالاۋ قاجەتتىگىن ەرەكشە اتاپ ءوتتى.
«مەگاپوليستەگى حالىق سانىنىڭ ارتۋىنان كولىك كەپتەلىسىنىڭ جيىلەي تۇسەتىنى بەلگىلى. ال وسىنداي اسپالى كوپىرلەر مەن جولايرىقتار حالىقتىڭ ءجۇرىپ-تۇرۋىن جەڭىلدەتىپ, قاۋىپسىزدىك دەڭگەيىن ارتتىرادى. مۇنداي اۋقىمدى نىساندى جوبالاعاندا, جەرگىلىكتى حالىقتىڭ ۇسىنىستارى مەن پىكىرلەرىن ەسكەرۋ كەرەك. ەڭ باستىسى سالاعا جاۋاپتى ازاماتتاردى قۇرىلىس جۇمىستارىن ساپالى جۇرگىزىلۋىن قاداعالاۋدى مىقتاپ قولعا الۋعا شاقىرامىن», دەدى بولاتبەك ناجمەتدين ۇلى.
شىمكەنتتە تىلەنشين كوشەسىنىڭ بويىندا تاعى ءبىر اسپالى كوپىر سالىنىپ جاتىر. ەكى نىساندى دا 2025 جىلدىڭ سوڭىنا دەيىن پايدالانۋعا بەرۋ جوسپارلانىپ وتىر. جوبالاردى جۇزەگە اسىرۋ قالا تۇرعىندارىنىڭ ءومىر ءسۇرۋ جاعدايىن جاقسارتۋعا, كولىك قىزمەتىنىڭ تيىمدىلىگىن ارتتىرۋعا, كولىك قاۋىپسىزدىگىن قامتاماسىز ەتۋگە ىقپال ەتەدى.
