سۋرەتتى تۇسىرگەن – جەڭىس ىسقاباي
ەڭ باستىسى, مەموراندۋم اياسىندا وبلىس تۇرعىندارىن دياگنوستيكالاۋ, ەمدەۋ, وڭالتۋ باعىتىندا, جاڭا تەحنولوگيالار مەن وزىق ەمدەۋ ادىستەرىن مەڭگەرۋدە ەكى تاراپ ءوزارا تاجىريبە الماسا الادى. بۇل جەرگىلىكتى مەديتسينا ماماندارى ءۇشىن ۇلكەن مۇمكىندىك. دەنساۋلىق سالاسى جىل سايىن دامۋ ۇستىندە, سوندىقتان جەتىسۋلىق دارىگەرلەر ۇلكەن قالالاردا بىلىكتىلىگىن ارتتىرعانى ابزال. ءوزارا ىنتىماقتاستىق ورناتۋدىڭ حالىقتىڭ دەنساۋلىعىن نىعايتىپ, مەديتسينالىق قىزمەت كورسەتۋ ساپاسىن جاقسارتۋعا ىقپال ەتەتىنى كۇمانسىز.
كەزدەسۋ بارىسىندا پرەزيدەنتتىڭ ءىس باسقارماسى مەديتسينالىق ورتالىعىنىڭ جەتەكشىسى الەكسەي تسوي باستاعان ورتالىقتىڭ بىلىكتى ۇجىمىنا وڭىرلەرمەن ىنتىماقتاستىق ورناتۋعا ىقىلاس تانىتىپ, باستاما جاساعاندارى ءۇشىن شىنايى ريزاشىلىعىن بىلدىرگەن بەيبىت يساباەۆ وبلىستا دەنساۋلىق ساقتاۋ سالاسىنا جاسالىپ وتىرعان قولداۋ شارالارى جايلى قىسقاشا ايتىپ ءوتتى.
«دەنساۋلىق ساقتاۋ سالاسى نىساندارىن سوڭعى جىلدارى 53%-عا جاڭارتتىق. الداعى ۋاقىتتا جەكە ينۆەستور ەسەبىنەن تالدىقورعاندا زاماناۋي ونكولوگيالىق ورتالىق سالىنادى. وڭىردە قابىلدانعان قولداۋ شارالارىنىڭ ناتيجەسىندە وتكەن جىلى وبلىسقا 152 مەديتسينا مامانى كەلدى. ەكى جىل ىشىندە مەديتسينا مەكەمەلەرىنە 63 جەدەل جاردەم ماشينالارىن الىپ بەردىك. ءوز تاراپىمىزدان دەنساۋلىق ساقتاۋ سالاسىنا جاڭا نىساندار سالۋ, ماتەريالدىق-تەحنيكالىق بازاسىن نىعايتۋ, ماماندارعا قولداۋ كورسەتۋ جۇمىستارىن جۇيەلى تۇردە جالعاستىرامىز. مەملەكەت باسشىسى ايتقانداي, حالىقتىڭ دەنساۋلىعى – ەلدىڭ ەڭ باستى بايلىعى. سوندىقتان سىزدەر مەن ءبىزدىڭ ماقساتىمىز ورتاق», دەدى ب.يساباەۆ.
جالپى, وبلىستىڭ دەنساۋلىق ساقتاۋ سالاسىنا تۇراقتى نەگىزدە مەملەكەتتىك قولداۋ كورسەتىلەدى. «اۋىلداعى دەنساۋلىق ساقتاۋدى جاڭعىرتۋ» ۇلتتىق جوباسى اياسىندا وبلىستا 59 نىساننىڭ قۇرىلىسى قارقىندى جۇرگىزىلىپ جاتىر. بۇگىندە اۋىلدىق جەرلەردە ساپالى مەديتسينالىق قىزمەتتەردىڭ قولجەتىمدىلىگىن قامتاماسىز ەتۋ ءۇشىن جەرگىلىكتى بيۋدجەت قاراجاتى ەسەبىنەن سوڭعى 3 جىلدا 61 بلوكتىك-مودۋلدىك مەديتسينالىق نىسان سالىنعان, 2022 جىلى – 12, 2023 جىلى – 22, 2024 جىلى 27 نىسان تۇرعىزىلدى.
ءوز كەزەگىندە الەكسەي تسوي وڭىردە پرەزيدەنتتىڭ ءىس باسقارماسىنىڭ مەديتسينالىق ورتالىعى كۇندەرىن ۇيىمداستىرۋعا جاردەمدەسكەنى ءۇشىن وبلىس اكىمىنە العىسىن جەتكىزدى.
«مەملەكەت باسشىسى وڭىرلىك دەنساۋلىق ساقتاۋدى دامىتۋعا ەرەكشە كوڭىل ءبولۋ تۋرالى تاپسىرما بەردى. پرەزيدەنتتىڭ ءىس باسقارماسى مەديتسينالىق ورتالىعىنىڭ كۇندەرى ەلدىڭ بارلىق وڭىرلەرىندە وتكىزىلەدى. توقسان جىلدان استام ۋاقىت ىشىندە پرەزيدەنتتىڭ ءىس باسقارماسىنىڭ مەديتسينالىق ورتالىعى دەنساۋلىق ساقتاۋ جۇيەسىندە كوشباسشى بولىپ كەلەدى. سوڭعى 3 جىلدىڭ وزىندە ورتالىقتىڭ مەديتسينا قىزمەتكەرلەرى 150-دەن استام جاڭا تەحنولوگيانى سىناقتان وتكىزدى. وڭىرلەردەگى ارىپتەستەرىمىزگە مەديتسينالىق پراكتيكالىق كومەك كورسەتۋدى جوسپارلاپ وتىرمىز. بۇعان بۇگىن قول قويىلعان ىنتىماقتاستىق تۋرالى مەموراندۋم ىقپال ەتەدى, بۇل مامىلە وسىنداي اكتسيالاردى تۇراقتى وتكىزۋگە مۇمكىندىك بەرەدى. نەگىزگى ماقساتىمىز – ايماقتارعا جاڭا تەحنولوگيالاردى كەڭىنەن ەنگىزۋ. ماسەلەن, جەتىسۋ ءوڭىرىنىڭ تۇرعىندارى وبلىستان سىرتقا شىقپاي-اق, كۇردەلى مەديتسينالىق كومەكتى جەرگىلىكتى جەردە دە الا الادى. ءبىزدىڭ بىرلەسكەن جۇمىسىمىز مەديتسينالىق قىزمەتتەردىڭ ساپاسىن كەزەڭ-كەزەڭىمەن جاقسارتا تۇسۋگە مۇمكىندىك بەرەدى», دەدى ا.تسوي.
ءسويتىپ, جەتىسۋ وبلىسى مەن قازاقستان رەسپۋبليكاسى پرەزيدەنتىنىڭ ءىس باسقارماسى مەديتسينالىق ورتالىعىنىڭ ءوزارا ىنتىماقتاستىعى تۋرالى مەموراندۋمعا سالتاناتتى جاعدايدا قول قويىلدى. سونداي-اق پرەزيدەنتتىڭ ءىس باسقارماسى مەديتسينالىق ورتالىعىنىڭ كۇنى اياسىندا ماماندار تالدىقورعاننىڭ بىرقاتار مەديتسينالىق مەكەمەسىندە پاتسيەنتتەردى قابىلدادى. ماماندار قاتارىندا ەندوكرينولوگ, تراۆماتولوگ, گەنەتيك, اريتمولوگ, گاستروەنتەرولوگ, پۋلمونولوگ, انگيوحيرۋرگ, گەرونتولوگ, نەۆروپاتولوگ, اللەرگولوگ, ەپيلەپتولوگ دارىگەرلەر بار. اكتسيانىڭ اياسىندا 31 وپەراتسيا جاسالدى, ونىڭ 7-ءى – بىرەگەي وپەراتسيا. جۇكتى ايەلدەردى, بالالار مەن قارتتاردى قوسا العاندا, 207 پاتسيەنتكە كونسۋلتاتسيالىق-دياگنوستيكالىق كومەك كورسەتىلدى. 193 مامان قاتىسقان 11 ءدارىس پەن تانىستىرىلىم وتكىزىلدى.
ءوڭىر اكىمى ءباسپاسوز قىزمەتىنىڭ مالىمەتىنشە, جەتىسۋ وبلىسى «قر ءپىب مەديتسينالىق ورتالىعىنىڭ كۇندەرى» اكتسياسى ءوتىپ وتىرعان ون ءتورتىنشى ايماق. اكتسيانىڭ نەگىزگى ماقساتى – قر ءپىب مەديتسينالىق ورتالىعى جۇيەسىنىڭ وزىق تاجىريبەسىن وڭىرلەردىڭ دەنساۋلىق ساقتاۋ سالاسىنا تاراتۋ. بۇل ءوز كەزەگىندە حالىق تۇراتىن ەلدى مەكەندەردە جوعارى تەحنولوگيالىق قىزمەتتەر مەن ەمدەۋدىڭ وزىق ادىستەرىنىڭ قولجەتىمدىلىگىن كەڭەيتۋگە ىقپال ەتەدى.
جەتىسۋ وبلىسى
