ءىس-شاراعا قاشىقتىقتان قاتىسقان عىلىم جانە جوعارى ءبىلىم ءمينيسترى ساياسات نۇربەك قازىرگى اقپاراتتىق كەڭىستىكتەگى داتا جۋرناليستيكانىڭ ماڭىزىنا توقتالدى.
– داتا جۋرناليستيكا فەيك, جاساندى ينتەللەكتىنى قولدانۋمەن جاسالاتىن نەگىزسىز دەرەكتەردى ساراپتاۋدا جوعارى رولگە يە بولىپ وتىر. جاساندى جاڭالىق, اقيقاتىن اجىراتۋ, وسى تۇرعىدان العاندا كاسىبي وقۋ قۇرالدارىنىڭ قولجەتىمدى بولعانى كەرەك. الەمدىك تاجىريبەگە نەگىزدەلىپ جازىلعان «دەرەكتەر جۋرناليستيكاسى بويىنشا وقۋ كۋرسىندا» قامتىلعان دەرەكتەر جاڭا باعىتتاعى مۇمكىندىكتەردى يگەرۋگە ىقپال ەتەدى. قازىر كەيبىر جاعدايدا كاسىبي جۋرناليستەر بلوگەرلەر مەن الەۋمەتتىك جەلى بەلسەندىلەرىنىڭ تاساسىندا قالىپ قويادى. وسىنداي جاعدايلار ءجۋرناليستىڭ جۇمىسىنا شەكتەۋ جاسايدى. ولار كاسىبي جۋرناليست ايتا الماعان نارسەلەردى ايتادى, كەيدە, كەرىسىنشە جاۋاپكەرشىلىكتى سەزىنبەگەن كەيبىر مەديابەلسەندىلەر فاكتىلەردى تەكسەرمەي جاريالاي سالادى. كونتەنتتى كەيىن جۋرناليست زەرتتەپ, زەردەلەپ حالىققا ۇسىنسا, ونى كوپشىلىك وقىماي قالۋى دا ىقتيمال. ويتكەنى جاڭالىق تەز تارايدى. سوندىقتان جۋرناليست جاڭا دەڭگەيگە شىعۋعا ۇمتىلۋى قاجەت, – دەدى مينيستر.
ورتالىق ازيا ۋنيۆەرسيتەتتەرىنە بەيىمدەلىپ, يۋنەسكو-نىڭ قولداۋىمەن, قازاقستان, قىرعىزستان, وزبەكستان اۆتورلارى بىرلەسىپ دايىنداعان ەڭبەكتە دەرەكتەردى وڭدەۋ مەن تالداۋ سالاسىنداعى ۇزدىك الەمدىك تاجىريبەلەر مەن قۇرالداردى مەڭگەرۋگە, جاڭا باعىتتاعى جۋرناليستەردى دايىنداۋعا, جاساندى ينتەللەكت پەن تسيفرلىق, الەۋمەتتىك پلاتفورمالارمەن جۇمىس ىستەۋ تاجىريبەسى قامتىلعان.
«UNESCO IPDS» جوباسى اۆتورلارىنىڭ جەتەكشىسى, ساياسي عىلىمدار دوكتورى, نارحوز ۋنيۆەرسيتەتى قۇقىق جانە مەملەكەتتىك باسقارۋ مەكتەبىنىڭ پروفەسسورى گۇلميرا سۇلتانباەۆانىڭ ايتۋىنشا, وقۋ كۋرسى يۋنەسكو-نىڭ كوممۋنيكاتسيانى دامىتۋدىڭ حالىقارالىق باعدارلاماسىنىڭ «ورتالىق ازيا ەلدەرىنە بەيىمدەلگەن دەرەكتەر جۋرناليستيكاسى كۋرسىن دايارلاۋ» جوباسى اياسىندا وزبەك, تاجىك, قىرعىز, اعىلشىن تىلدەرىنە ازىرلەندى. وقۋلىق «زەرتتەۋ جانە ستاتيستيكا پرينتسيپتەرى», «اشىق كوزدەردەن اقپارات جيناۋ», «ەلەكتروندى كەستەلەرگە كىرىسپە», «ستوريتەللينگ ترەندى دەرەكتەر جۋرناليستيكاسىنا» قاتىستى 11 تاراۋدان تۇرادى.
جوبا اۆتورلارى داتا جۋرناليستيكانىڭ ەلىمىزدەگى قازىرگى دەڭگەيى ءالى دە گرافيكالىق دەڭگەيدە ەكەنىن ايتادى. وسى ورايدا ينتەراكتيۆتى, كارتوگرافيالىق جۋرناليستيكانى دامىتۋ قاجەت. ەگەر ينتەراكتيۆتى جۋرناليستيكا دامىسا, تاراپتاردىڭ ءبىر-بىرىمەن كەرى بايلانىسىندا ماسەلە تۋىندامايدى. ال جۋرناليستىك زەرتتەۋدە كارتوگرافيالىق باعىت ۇلكەن رولگە يە. داتا جۋرناليستيكا ەلىمىزدە العاش رەت 2019 جىلى ءال-فارابي اتىنداعى قازۇۋ-دىڭ جۋرناليستيكا فاكۋلتەتىندە اشىلىپ, ونى بۇگىنگە دەيىن 70-كە جۋىق مامان ءبىتىرىپ شىقتى.
الماتى
