ەل تاريحىنىڭ تۇگەندەلۋىنە وزدەرىنىڭ سۇبەلى ەڭبەكتەرىن قوسىپ كەلە جاتقان ەكى تاريحشىمىزدىڭ بۇل جولعى شىمكەنت قالاسىنا بەت بۇرۋى دا جايدان-جاي ەمەس ەكەن. م. اۋەزوۆ اتىنداعى وڭتۇستىك قازاقستان ۋنيۆەرسيتەتى كوللەدجىنە كەلىپ, وقۋ ورداسىنىڭ وقىتۋشىلارىمەن جۇزدەستى.
تاريح عىلىمى جايىندا تەرەڭنەن ءسوز قوزعاپ, رۋحاني اڭگىمەلەردىڭ تيەگىن اعىتقان زيابەك قابىلدينوۆ مۇنداي كەزدەسۋلەر كوبىنەسە ۋنيۆەرسيتەتتەردە ءوتىپ, كوللەدجدەردە كوپ بولا بەرمەيتىنىن ەسكەرىپ, ارنايى كەلىپ تۇرعانىن دا جاسىرمادى. سونىمەن قاتار بىلىكتى مامانداردىڭ دا كوبىنىڭ العاشقى ءبىلىم ءنارىن كوللەدجدەن العانىن دا ايتتى.
بۇل كەزدەسۋدەگى كوڭىل قۋانتار جاعدايدىڭ ءبىرى – 1956–1982 جىلدار ارالىعىندا ش.ءۋاليحانوۆ اتىنداعى تاريح, ارحەولوگيا جانە ەتنوگرافيا ينستيتۋتىندا تاريح عىلىمىنىڭ جاندانۋ جولىندا 26 جىل ەلەۋلى ەڭبەك ەتكەن قازاق كسر عىلىم اكادەمياسىنىڭ اكادەميگى جانە ۆيتسە-پرەزيدەنتى, مەملەكەتتىك سىيلىقتىڭ لاۋرەاتى, تاريح عىلىمدارىنىڭ دوكتورى, پروفەسسور اقاي نۇسىپبەكوۆتىڭ 115 جىلدىعىنا وراي دايىندالعان V تومدىق ەڭبەكتەر جيناعىنىڭ تۇساۋى كەسىلدى. الماتىدان كەلگەن قوناقتارىمىز بۇل V تومدىققا ەنگەن اقاي نۇسىپبەكوۆتىڭ ەڭبەكتەرى جايىندا كوللەدج ۇجىمىنا تولىق تانىستىرىپ, وقۋ ورنىنا سىيعا تارتقاندىعى بارشا وقىتۋشىلار ءۇشىن ءبىر مەرەيلى كەزدەسۋ ەكەندىگى انىق.
اۋەزحان شاشاەۆ كوللەدج ۇجىمىنا تۇسىنىكتى بولۋى ءۇشىن اقاي نۇسىپبەكوۆتىڭ ومىرىنە كەڭىنەن توقتالىپ, بۇل بەس تومدىق ەڭبەكتىڭ دايىندالۋى ش.ءۋاليحانوۆ اتىنداعى تاريح جانە ەتنولوگيا ينستيتۋتى ۇجىمىنىڭ تۇگەلدەي جۇمىلۋىمەن ىستەلگەن شارۋا ەكەنىن جەتكىزدى. سونىمەن قاتار ەل ءۇشىن ەڭبەك ەتكەن ا.نۇسىپبەكوۆتەي ەرەن تۇلعانى ۇلىقتاۋ ايتۋلى ينستيتۋتتىڭ ءداستۇرلى جولى ەكەنىن ايتا كەلىپ, 2019 جىلى ا.نۇسىپبەكوۆ اتىنداعى مەموريالدى كابينەت اشىلعاندىعىن, جىل وتكەن سايىن عالىمنىڭ عىلىمي مۇرالارىن جاڭا قىرىنان زەرتتەۋ جۇمىستارى مەن كونفەرەنتسيالار ءجيى بولىپ تۇراتىنىن باياندادى.
كەزدەسۋدە كوللەدج ۇجىمىن تاعى ءبىر سەرپىلتكەن – زيابەك قابىلدينوۆتىڭ قۇتتىقتاۋ ءسوزى بولدى. ياعني ش.ءۋاليحانوۆ اتىنداعى تاريح جانە ەتنولوگيا ينستيتۋتى بارلىق وبلىسپەن, وڭىرمەن تىعىز بايلانىستا بولا وتىرىپ, اسىرەسە ەل تاريحىنىڭ تولىقتانۋىنا, جاندانۋىنا جۇيەلى جۇمىس جاساۋ ءۇشىن ءار وبلىستاردان ينستيتۋتتىڭ وكىلدىكتەرىن سايلايتىندىعىن ۇعىندىردى. سونداي-اق تۇركىستان وبلىسى, شىمكەنت قالاسىنداعى وكىلى رەتىندە تاريح عىلىمدارىنىڭ دوكتورى, پروفەسسور سەيدەحان الىبەك تاعايىندالعانىن حابارلاپ, قولىنا كۋالىك تابىس ەتتى.
ءسوز سوڭىندا بۇگىنگى كەزدەسۋدى قورىتا وتىرىپ, ءارى وزىنە جۇكتەلگەن مىندەتتى ويداعىداي اتقاراتىنىنا سەنىمدىلىك بىلدىرگەن كوللەدج باسشىسى سەيدەحان الىبەك «تاريحىن بىلمەگەن ەل – تامىرسىز اعاش سەكىلدى» دەگەن ناقىل ءسوزدىڭ تەگىن ايتىلماعانىن, سوندىقتان دا ءار سالانىڭ, ءار ادامنىڭ بولسىن, ءبارىنىڭ دە تاريحقا قاتىسى بار ەكەنىن تىلگە تيەك ەتتى. ەل تاريحىن جيناقتاۋ جولىندا بارلىعىمىزدىڭ, اسىرەسە تاريحشى مامانداردىڭ جەمىستى جۇمىس ىستەۋى كەرەك ەكەنىن, ءوزى باسقارىپ وتىرعان كوللەدج ۇجىمىنىڭ بۇدان كەيىن ىرگەلى ينستيتۋتپەن جاقىن بايلانىستا بولىپ, جۇيەلى جۇمىس جۇرگىزەتىنىن جەتكىزدى.
نۇرلىبەك دوسىباي,
م.اۋەزوۆ اتىنداعى وقۋ كوللەدجىنىڭ اعا وقىتۋشىسى
