تۇركى ەلدەرىنىڭ ستراتەگيالىق باعىتى

سۇحباتتا ەلىمىزدىڭ تمۇ ايا­سىنداعى بەلسەندىلىگى مەن تۇركى ىنتىماقتاستىعىن نىعايتۋعا قوسقان ۇلەسى كەڭىنەن تالقىلاندى. اتاپ ايتقاندا, اۋقىمدى جوبالار مەن 80-نەن اسا ءىس-شارا ۇيىم­داستىرىلعاندىعىنا باسا نازار اۋدارىلدى.

پرەزيدەنت 2021 جىلى كۇللى تۇركى الەمىنىڭ رۋحاني استاناسى بولىپ جاريالانعان كونە تۇركىستان قالاسىنىڭ تاريحي رو­لىنە ەرەكشە ءمان بەردى. مەملەكەت باسشىسىنىڭ پىكىرىنشە, تۇركىس­تاننىڭ قايتا جاندانۋى تۇركى الەمىنىڭ بىرلىگىن نىعايتۋعا زور ۇلەس قوسىپ جاتىر.

سونىمەن قاتار استانادا ۇيىمداستىرىلعان V دۇنيەجۇزى­لىك كوشپەلىلەر ويىندارى تۇركى حالىقتارىنىڭ باي مادەني مۇرا­سىن ناسيحاتتاۋدا ەرەكشە ورىن العانى اتاپ ءوتىلدى. بۇل ءىس-شارا تۇركى مادەنيەتى مەن ءداستۇرىن الەمگە تانىتىپ قانا قويماي, قاتىسۋشى ەلدەر اراسىنداعى مادەني-گۋمانيتارلىق ىنتىماق­تاستىقتى تەرەڭدەتە ءتۇستى.

كەيىنگى ونجىلدىقتا تمۇ اياسىنداعى ساۋدا-ەكونوميكالىق بايلانىستار دا ايتارلىقتاي نىعايدى. پرەزيدەنت 2023 جىلى ۇيىمعا مۇشە ەلدەردىڭ ءوزارا اينالىمى 45 ملرد دوللاردان اسقا­نىن اتاپ ءوتتى. بۇل كورسەتكىش ينتەگراتسيانىڭ جوعارى دەڭگەيىن جانە ءوزارا ءتيىمدى قارىم-قاتىناس­تاردىڭ قارقىندى دامىپ كەلە جاتقانىن دالەلدەيدى.

تمۇ شەڭبەرىندەگى ىنتى­ماق­تاستىقتىڭ ماڭىزدى اسپەكتى­لەرىنىڭ ءبىرى – ترانسكاسپي حالىق­ارالىق كولىك باعىتىن دامىتۋ. بۇل جوبا ەلىمىزدىڭ ەكونوميكالىق الەۋەتىن ارتتىرۋدا, ترانزيتتىك مۇمكىندىكتەرىن كەڭەيتۋدە جانە حالىقارالىق ينۆەستيتسيالاردى تارتۋدا شەشۋشى ءرول اتقارادى.

قاسىم-جومارت توقاەۆتىڭ سۇحباتىندا اتالعان تمۇ اياسىن­داعى سەرىكتەستىك ەلىمىزدىڭ كوپ­ۆەكتورلى سىرتقى ساياساتىنىڭ اجىراماس بولىگى ەكەنىن ايقىن اڭعارتادى. تۇركى الەمىمەن ىنتى­ماقتاستىق – ەلدىڭ رۋحاني, مادەني جانە ەكونوميكالىق دامۋىن قام­تاماسىز ەتەتىن ستراتەگيالىق باعىتتاردىڭ ءبىرى.

باۋىرجان اۋكەن,

پرەزيدەنت جانىنداعى قسزي

ازيالىق زەرتتەۋلەر ءبولىمىنىڭ اعا ساراپشىسى