سەناتور امانگەلدى نۇعمانوۆ اقتوبە وبلىسىنىڭ اكىمىمەن جانە ءوڭىردىڭ اكتيۆىمەن كەزدەستى. كەزدەسۋ بارىسىندا اكىم سەناتورعا 2024 جىلدىڭ الەۋمەتتىك-ەكونوميكالىق قورىتىندىلارى, اعىمداعى جۇمىستار مەن وزەكتى ماسەلەلەر تۋرالى باياندادى. اسىرەسە اۆتوموبيل جولدارىنىڭ جاعدايى, ەكولوگيالىق احۋال, الەۋمەتتىك قىزمەتتەردىڭ ساپاسى, ينفراقۇرىلىم جانە ينتەرنەتكە قولجەتىمدىلىك ماسەلەلەرى قوزعالدى.
«پرەزيدەنت حالىقتىڭ شىنايى مۇقتاجىنا نازار اۋدارۋ كەرەكتىگىن ايتىپ وتىر. اۋىلدىق ايماقتاردى نىعايتۋ, الەۋمەتتىك جانە كولىك ينفراقۇرىلىمىن دامىتۋ, اگرارلىق سەكتور مەن جاڭا تەحنولوگيانى قولداۋ – بۇل ءبارىمىز بىرلەسىپ شەشۋگە ءتيىستى مىندەتتەر», دەدى سەناتور.
سەنات دەپۋتاتتارى ءالي بەكتاەۆ, مۇرات قادىربەك جانە اليشەر ساتۆالديەۆ تۇركىستان وبلىسى ماقتاارال اۋدانىندا جۇزەگە اسىپ جاتقان الەۋمەتتىك جانە ينفراقۇرىلىمدىق جوبالاردىڭ بارىسىمەن تانىستى.
پرەزيدەنتتىڭ «ادىلەتتى مەملەكەت. ءبىرتۇتاس ۇلت. بەرەكەلى قوعام» اتتى جولداۋىندا باستاۋ العان «جايلى مەكتەپ» ۇلتتىق جوباسى اياسىندا وسى اۋداندا جاڭا بەس مەكتەپتىڭ قۇرىلىسى جوسپارلانعانى تۋرالى دەپۋتاتتار حاباردار بولدى. سەناتورلار اتاكەنت اۋىلىندا سالىنىپ جاتقان مەكتەپ قۇرىلىس الاڭىن ارالادى. 1500 ورىنعا ارنالعان بۇل مەكتەپ زاماناۋي قۇرال-جابدىقتارمەن, ونىڭ ىشىندە روبوتوتەحنيكا كابينەتتەرىمەن, كەڭ جولاقتى ينتەرنەتپەن جانە زەرتحانالارمەن جابدىقتالادى. بۇل ءبىلىم ساپاسىن ارتتىرۋعا جانە مۇعالىمدەردىڭ بىلىكتىلىگىن كوتەرۋگە مۇمكىندىك بەرەدى.
دەپۋتات ەرنۇر ايتكەنوۆ پاۆلودار وبلىسىنداعى ماي اۋداندىق ءماسليحاتىنىڭ دەپۋتاتتارىمەن ءوڭىردىڭ الەۋمەتتىك-ەكونوميكالىق دامۋىنىڭ نەگىزگى ماسەلەلەرىن تالقىلادى. پرەزيدەنت قاسىم-جومارت توقاەۆتىڭ «انا ءتىلى» گازەتىندە جاريالانعان سۇحباتى تالقىلاۋدىڭ باستى تاقىرىبىنىڭ ءبىرى بولدى. وندا مەملەكەت باسشىسى ينفراقۇرىلىم, تۇرعىن ءۇي قۇرىلىسى جانە ەكونوميكانىڭ نەگىزگى سالالارىن دامىتۋداعى 2024 جىلعى جەتىستىكتەردى اتاپ وتكەن بولاتىن.
ەرنۇر ايتكەنوۆ كوممۋنالدىق ينفراقۇرىلىمدى جاڭارتۋدى جالعاستىرۋ, جولدار مەن تۇرعىن ۇيلەر سالۋ قاجەتتىگىن, سونداي-اق اۋىل شارۋاشىلىعىن قولداۋدىڭ ماڭىزدىلىعىنا نازار اۋداردى.
سەناتتىڭ الەۋمەتتىك-مادەني دامۋ جانە عىلىم كوميتەتىنىڭ توراعاسى نۇرتورە ءجۇسىپ ا.بايتۇرسىنوۆ اتىنداعى ءتىل ءبىلىمى عىلىمي-زەرتتەۋ ينستيتۋتىندا بولدى. وندا مەكەمە باسشىلىعىمەن جانە قىزمەتكەرلەرىمەن كەزدەسىپ, ونىڭ ماتەريالدىق-تەحنيكالىق بازاسىمەن تانىستى.
نۇرتورە ءجۇسىپ ينستيتۋت لينگۆيستيكا, قازاق ءتىلىن ساقتاۋ جانە دامىتۋ سالاسىنداعى زەرتتەۋلەرمەن اينالىساتىن قازاقستاننىڭ جەتەكشى عىلىمي مەكەمەلەرىنىڭ ءبىرى ەكەنىن اتاپ ءوتتى.
«جاقىندا پرەزيدەنت قاسىم-جومارت توقاەۆ بەلگىلى باسىلىم «انا ءتىلى» گازەتىنە بەرگەن سۇحباتىندا ەلىمىزدەگى قازاق ءتىلىنىڭ جاي-كۇيى مەن دامۋ كەلەشەگى تۋرالى ماسەلەلەرگە جان-جاقتى توقتالدى. مەملەكەت باسشىسى قازاق ءتىلىنىڭ بولاشاعى قوعام ءومىرىنىڭ ءتۇرلى سالاسىنا قانشالىقتى تەرەڭ ەنەتىنىنە بايلانىستى ەكەنىن اتاپ ءوتتى. الدا اۋقىمدى جۇمىس كۇتىپ تۇر. دەگەنمەن, ونىڭ ءمان-ماڭىزىنا دەگەن سەنىم مەن بۇكىل مەملەكەتتىك جانە قوعامدىق ينستيتۋتتاردىڭ بەلسەندى قولداۋى ارقاسىندا قازاق ءتىلى ەلىمىزدىڭ قازىرگى الەمدە ۇيلەسىمدى دامۋىن قامتاماسىز ەتەتىن اقيقاتقا اينالادى. قازاق ءتىلىن دامىتۋ ۇلتتىق بىرەگەيلىكتى نىعايتادى. پرەزيدەنت پارمەنىن ەسكەرە وتىرىپ, ينستيتۋت وسى ماڭىزدى جانە كۇردەلى ميسسيادا ماڭىزدى ءرول اتقارادى دەپ سانايمىن. ويتكەنى, ونىڭ ءتىل ساياساتى, لەكسيكوگرافيا جانە ورفوگرافيا بويىنشا عىلىمي زەرتتەۋلەرى مەن جۇمىستارى ەلىمىزدىڭ قازاق ءتىلى مەن مادەني ورتاسىنىڭ قالىپتاسۋى مەن دامۋىنا ايتارلىقتاي اسەر ەتەدى», دەدى نۇرتورە ءجۇسىپ.
