قىسقا عۇمىردىڭ كەيبىر ساتتەرى كوز الدىڭا كەلىپ تۇرا قالادى ەكەن. جاڭا عانا الماتىدان سۋىق حابار جەتتى. بەلگىلى قوعام قايراتكەرى, كوسەمسوزشى, تەلەجۋرناليست مەيرامبەك تولەپبەرگەن باقيعا كوشىپتى... جانى جايساڭ, قالامى قارىمدى, ناعىز ۇلتجاندى ازامات ەدى.
ول قاسيەتتى اۋليەاتا وڭىرىندە دۇنيەگە كەلدى. ولكە تاريحى تۋرالى تولعاندى. 8 تاڭداۋلى ەڭبەكتىڭ اۆتورى. مەيرامبەك تولەپبەرگەندى قازاقتىڭ ۇلى تۇلعاسى شەراعا – شەرحان مۇرتازا ارقىلى تانۋشى ەدىم.
1986 جىلى جەلتوقسان كوتەرىلىسى كەزىندە ول الماتى وبلىستىق «جەتىسۋ» گازەتىندە قىزمەت ىستەيتىن. مەن اتاقتى «لەنينشىل جاس» گازەتىنىڭ باس رەداكتورى ەدىم. قابىلداۋىما مەيرامبەك كەلدى. ءوڭى سۇپ-سۇر. گازەتتە سوت ۇدەرىسىندەگى قايرات رىسقۇلبەكوۆتىڭ قاسقايىپ تۇرعان سۋرەتى جاريالانىپتى. گازەتتىڭ باس رەداكتورى, كازتاگ-تىڭ ديرەكتورى جۇمىستان بوساتىلعان.
گازەتتىڭ سول كۇنگى نومىرىنە كەزەكشىلىك جاساعان مەيرامبەكتىڭ دە جۇمىستان بوساۋ قاۋپى تۋىپتى. ءۇي الۋ كەزەگى جاقىنداپ تۇرعان ەكەن. جۇمىستان شىقسا, بارىنەن ايىرىلادى.
قالامگەر ءىنىمدى سول كۇندەردىڭ قاھارىنا قاراماستان «لەنينشىل جاسقا» قىزمەتكە اۋىستىرىپ الدىم. كەيىن ءۇيىن الىپ, گازەتتە ءبولىم مەڭگەرۋشىسى بولدى.
«ەگەمەن قازاقستان» گازەتىنە باس رەداكتور بولىپ كەلگەنىمدە ول وسى باسىلىمدا جۇمىس ىستەيدى ەكەن. قازاقستان تاريحىن جازۋعا نيەت ەتتىك. سول جۇمىستى ۇيلەستىرۋدى مەيرامبەك ىنىمە تاپسىردىم. اتاقتى مامبەت قويگەلدى, تالاس وماربەك, كامال بۇرقانوۆ, بەرەكەت كارىباەۆ, بۇركىتباي اياعان سىندى تاريحشى عالىمدار ءبىر جارىم جىل بويى گازەتكە عىلىمي زەرتتەۋ ماقالالار جاريالادى. ول كەزەڭدە رەسەي تاراپىنان «قازاق مەملەكەتتىلىگى بولعان جوق» دەگەن پىكىرلەر ايتىلا باستاعان. بۇل ءبىزدىڭ وسىنداي جاڭساق پىكىرگە بەرگەن توسقاۋىل جاۋابىمىز بولاتىن.
جاقسى جۋرناليست جاڭالىقتى ىزدەپ جۇرەدى. كەڭەس وداعىنىڭ باتىرى باقتىوراز بەيسەكباەۆ تۋرالى رەسەيدىڭ «يزۆەستيا» گازەتىندە كىشكەنتاي اقپارات جاريالاندى. قازاقتىڭ ۇلتجاندى ازاماتى, باسپاگەر مۇحتار قۇل-مۇحاممەد ەكەۋمىز تەلەفون ارقىلى سويلەستىك. ول ءىسساپار قارجىسىن ءوز موينىنا الدى. مەيرامبەكتى بەلورۋسسياعا جىبەردىك. ول «قاھارمان باقتىوراز» دەگەن تاماشا ماقالا جازدى. وسى ارقىلى ۇلت باتىرىن رەسپۋبليكا تانىدى, الماتى وبلىسى بالقاش اۋدانى اكىمدىگىنىڭ شەشىمىمەن مينسك تۇبىندەگى باقتىوراز باتىردىڭ بەيىتىنىڭ باسىنا ەسكەرتكىش قويىلدى. رەسپۋبليكادا كوشەلەرگە اتى بەرىلدى. ارقا توسىندەگى ەلوردادا دا باقتىوراز بەيسەكباەۆ كوشەسى بار.
جامبىل وبلىسى اكىمىنىڭ يدەولوگيا جونىندەگى ورىنباسارى بولدى.
كەيىن «قازاقستان» تەلەراديوكورپوراتسياسىنا قاراستى ايماقتىق «Jambyl» تەلەارناسىن ۇزاق باسقاردى.
پارلامەنت ءماجىلىسىنىڭ دەپۋتاتى بولىپ سايلانىپ, ەلدىك زاڭنامالاردىڭ قابىلدانۋىنا بەلسەنە ارالاستى.
ۇلتقا قىزمەت ىستەۋدىڭ ۇلگىسىن كورسەتكەن مەيرامبەك تولەپبەرگەننىڭ جاتقان جەرى جايلى, يمانى سالامات بولسىن.
ءۋاليحان قاليجانوۆ,
ۇعا اكادەميگى, قازاقستاننىڭ ەڭبەك سىڭىرگەن قايراتكەرى
