ء«بىزدىڭ بولاشاعىمىز – وسكەلەڭ ۇرپاقتىڭ ۋاقىت تالابىنا ساي تەرەڭ ءبىلىم مەن تاربيە الۋىنا قولايلى ءارى وتە ادەمى مەكتەپتەر بوي كوتەرىپ جاتىر. بيىل وبلىستا «جايلى مەكتەپ» جوباسىمەن 7 مەكتەپ پايدالانۋعا بەرىلسە, سونىڭ 6-ۋى قاراساي اۋدانىندا. ويتكەنى بۇل اۋداندا حالىق وتە تىعىز شوعىرلانعان. بالالار سانى جىل سايىن ارتىپ وتىرعاندىقتان, وسى اۋداندا سالۋ جوسپارلانعان. جايلى مەكتەپتە وقۋشىلارىمىز جاقسى ءبىلىم الىپ, وقۋ مەن سپورتتاعى جەتىستىكتەرىن ەسەلەي تۇسەرىنە سەنىمدىمىز», دەگەن ءوڭىر باسشىسى مارات سۇلتانعازيەۆ قۇرىلىس جۇمىستارىن ۋاقتىلى ءارى ساپالى اياقتاعان «BI Urban Construction» كومپانياسىنىڭ قۇرىلىسشىلارىنا العىس حاتتار تابىستادى.
سونىمەن قاسكەلەڭ قالاسىنىڭ ىرگەسىندە بوي كوتەرگەن 1500 ورىندىق مەكتەپتىڭ اشىلۋ سالتاناتىنان سوڭ, كەمەرتوعان اۋىلىندا دا ءدال وسىنداي «جايلى مەكتەپ» باعدارلاماسى بويىنشا ىرگەسى قالانعان عيمارات پايدالانۋعا بەرىلدى.
«وبلىستا ءۇشاۋىسىمدى وقىتۋ ماسەلەسىن جويۋ بويىنشا بيىل 26 مەكتەپ قۇرىلىسىن باستادىق. ونىڭ 10-ى قولدانىسقا بەرىلدى. كەمەرتوعان اۋىلىندا دا مەكتەپ تاپشىلىعى وتە كۇردەلى ماسەلە بولعان ەدى. ەندى وسى ءزاۋلىم عيماراتتا بالالار الاڭسىز ءبىلىم الاتىن بولادى. مۇندا ينكليۋزيۆتىك ورتالىق, كىتاپحانا, اسحانا, شەبەرحانا, ءماجىلىس زالدارى, سپورت زالدارى بار. ايماقتاعى اۋىل مەكتەپتەرىندەگى وقۋشىلاردىڭ الەۋەتى وتە جوعارى جانە ونى دامىتۋ ءۇشىن جان-جاقتى قولداۋ كورسەتكىمىز كەلەدى. ەكى جىلدان بەرى وقۋشىلارىمىز «ۇلتتىق اۋىل مەكتەپتەرىنىڭ» وليپياداسىنا قاتىسىپ كەلەدى. الماتى وبلىسى بىلتىر 32 جۇلدەمەن 2-ورىن السا, بيىل 34 جۇلدەمەن اۋىل مەكتەپتەرىنىڭ اراسىندا 1-ورىنعا شىقتى. قولدانىسقا بەرىلگەن بۇل مەكتەپتە دە ءبىراز وقۋشىلار كەلەسى جىلى سول وليمپياداعا قاتىسۋعا دايىن بولادى دەگەن ويدامىن. بۇل ناتيجەگە باعىتتالعان جۇمىستىڭ جەمىسى», دەگەن وبلىس اكىمى مارات ەلەۋسىز ۇلى ۇستازدار ۇجىمى مەن اتا-انا, وقۋشىلاردى قۋانىشتارىمەن قۇتتىقتاپ, تابىستى بولۋىن تىلەدى.
بۇدان سوڭ ۇلاعاتتى ۇستاز, «اسىل انا» قوعامدىق بىرلەستىگىنىڭ ءتورايىمى ۇلتۋسىن امانكەلدىقىزى دا ىزگى تىلەگىن ءبىلدىردى.
«1500 ورىندىق مەكتەپتىڭ نورموتيۆتىك قۇرىلىس ۋاقىتى 22 اي بولسا, بۇل مەكتەپ كوز الدارىڭىزدا 11 ايدا سالىنىپ شىقتى. مۇنداي مەكتەپتەر شەتەلدەردە جوق. تەحنيكالىق جابدىقتالۋى دا وتە جوعارى دەڭگەيدە. ۇل-قىزدارىڭىزدىڭ قالاعا بارىپ وقۋىنىڭ قاجەتى جوق. وسىنداي مەكتەپتەر بەرىلگەلى بەرى بالالاردىڭ ساباق ۇلگەرىمى ارتقان ەكەن. وعان مەكتەپتىڭ تەحنيكالىق بازاسىنىڭ وزىق تەحنولوگيامەن جابدىقتالۋى سەبەپ. سوندىقتان دا اۋىل حالقى ءۇشىن زور قۋانىش. بۇل – مەملەكەتتىڭ قامقورلىعى», دەدى «Samruk-Kazyna Construction» اق باسقارما توراعاسى ماۋلەن ايمانبەتوۆ.
جان جادىراتقان جاڭا مەكتەپكە كەلگەن وقۋشى سانى 2500-گە جۋىقتاعانى تۋرالى مەكتەپ ديرەكتورىنىڭ مىندەتىن اتقارۋشى داۋرەن بولات ۇلى تىلگە تيەك ەتتى. 1200 ورىندىق كەمەرتوعان ورتا مەكتەبىندە قازىرگى تاڭدا 6000-عا جۋىق بالا ءۇشاۋىسىمدا ءبىلىم الۋدا ەكەن. ەندى مىنە, «جايلى مەكتەپتىڭ» قۇرىلىسى اياقتالىپ, وقۋشىلاردىڭ تەڭ جارىمى جاڭا مەكتەپكە اۋىسىپ, سونىڭ ارقاسىندا جۇكتەمە ازاياتىن بولادى.
ۇلكەن مەگاپوليستىڭ ىرگەسىندەگى اۋىلدا ءوسىم بار. بۇگىنگى كۇنى اۋىل مەكتەبىندە 11-سىنىپتا 200-گە جۋىق وقۋشى بار بولسا, 2500-دەن اسا بالا باستاۋىشتا ءبىلىم الىپ جاتىر.
الماتى وبلىسى
