وقۋشى – بولاشاق مامان, جەكە تۇلعا. مەكتەپتەگى ءار بالانىڭ كوڭىلىن تاۋىپ, قابىلەتىن اشۋ ۇستازدارعا زور جاۋاپكەرشىلىك جۇكتەيدى. مەكتەبىمىزدىڭ اشىلعانىنا 90 جىل بولدى. وسى ارالىقتا ءبىلىم ورداسى قانشاما جەتىستىككە قول جەتكىزدى. سونىڭ بارلىعىندا مۇعالىمنىڭ دە, تاربيەشىنىڭ دە ەسەلى ەڭبەگى جاتىر. شاكىرت جەتىستىگى – مۇعالىمنىڭ مەرەيى. بۇگىندە ءبىلىم وردامىزدان تۇلەپ ۇشقان شاكىرتتەرىمىز جوعارى وقۋ ورنىنا گرانتقا وقۋعا ءتۇسىپ, جاقسى ناتيجەمەن ءتامامداپ, ءاربىر سالادا ەسەلى ەڭبەك ەتىپ ءجۇر. تۇلەكتەرىمىزدىڭ جەتىستىگى مەكتەبىمىز ءۇشىن ۇلكەن ابىروي, جوعارى جەتىستىك. سوڭعى جىلدارى مۇعالىم مەرەيىن وسىرۋگە باعىتتالعان «پەداگوگ مارتەبەسى تۋرالى» زاڭ ءبىلىم سالاسىندا ەڭبەك ەتىپ جۇرگەن ۇستازداردىڭ جۇرەگىنە جول تاپتى. «التى الاشتىڭ باسى قوسىلسا, توردەگى ورىن – مۇعالىمدىكى» دەپ ماعجان جۇماباەۆ ايتقانداي, قازىرگى كەزدە مۇعالىمدەر ءوز مارتەبەسىنە ساي ساپالى ءبىلىم بەرۋ ۇردىسىنە بەلسەنە ارالاسىپ جاتىر. ءبىلىم سالاسىنداعى ماڭىزدى قۇجات پەداگوگ قىزمەتىنە سونى سەرپىلىس اكەلدى. مۇعالىم قۇقىعىنىڭ ارنايى زاڭمەن قورعالۋى, ۇستازداردىڭ قوعام الدىنداعى ەڭسەسىن كوتەرىپ تاستادى. قوعامدا ۇستازعا دەگەن ايرىقشا كوزقاراس قالىپتاستى. جۇكتەمەسى ازايىپ, ءبىلىم مەن ءىلىمدى بولاشاق ۇرپاققا جەتكىزۋشى تۇلعا دارەجەسىنە كوتەرىلدى. پرەزيدەنت تاپسىرماسىنا وراي بۇل باعىتتاعى جۇمىس ءالى دە جالعاسىن تاۋىپ وتىر. مۇعالىمنىڭ قوعامداعى ءرولى ارتىپ, جىگەرىنە جىگەر قوسىلدى.
قازىر مەكتەبىمىزدە 235 وقۋشى ءبىلىم الادى. مۇندا نەگىزگى پاندەرمەن قوسا وسى بالالاردى ومىرگە بەيىمدەيتىن ارنايى پاندەر وقىتىلادى. ولاردىڭ قاتارىندا ميميكا, پانتوميميكا, كەڭىستىكتى باعدارلاۋ, كورۋ قابىلەتىن تۇزەتۋ, ەمدىك دەنەشىنىقتىرۋ دەگەن سياقتى پاندەر بار. ارنايى مۋزىكا ءبولىمى جۇمىس ىستەيدى. مىنە, وسى باعىتتا مەكتەپ ۇستازدارىنا تۇسەتىن سالماق تا, جاۋاپكەرشىلىك جۇگى دە وتە جوعارى. ءار وقۋشىنىڭ جۇرەگىنە جول تاۋىپ, ونىڭ قوعاممەن ىقپالداستىعىنا بار-كۇش جىگەرىن سالىپ جۇرگەن مەكتەپ ۇجىمى بۇگىندە جەكە پاندەر بويىنشا, مۋزىكا جاعىنان جەتىستىككە جەتىپ جۇرگەن وقۋشىلارىن ماقتان ەتەدى. مەكتەپتەگى ۇلت-اسپاپتار وركەسترى, دومبىرا, فورتەپيانو, تاعى دا باسقا باعىتتاعى سىنىپتاردا وقۋشىلار ءوز قابىلەتتەرىن دامىتىپ جاتىر. وسىنداي ەرەكشە جاعدايدا ەڭبەك ەتىپ جاتقان مەكتەپ مۇعالىمدەرى مەن جەتىستىككە قۇلشىنعان وقۋشىلار مەكتەبىمىزدىڭ ابىرويىن اسىرىپ, ءاردايىم جەڭىس تۇعىرىنان كورىنىپ كەلەدى. بۇل – مەملەكەت تاراپىنان ۇستازداردى قولداۋعا باعىتتالعان جوبالار جەمىسى.
گۇلجانار نۇرپەيىسوۆا,
قازاقستاننىڭ ەڭبەك ەرى,
№4 ارنايى مەكتەپ-ينتەرناتتىڭ ماتەماتيكا ءپانىنىڭ مۇعالىمى
