ەلوردا اكىمدىگىنىڭ مالىمەتىنشە, پيروتەحنيكالىق ونىمدەر ساتىلاتىن ساۋدا ورىندارىن تەكسەرۋ 23 جەلتوقسان كۇنى باستالىپ, 3 قاڭتارعا دەيىن جالعاسادى. رەيدتەردى استانا قالاسىنىڭ پوليتسيا دەپارتامەنتى مەن توتەنشە جاعدايلار دەپارتامەنتىنىڭ قىزمەتكەرلەرى بىرلەسىپ وتكىزىپ جاتىر.
تاعى ءبىر الدىن الۋ شاراسى بايقوڭىر اۋدانىندا جۇرگىزىلدى. ۆەدومستۆو وكىلدەرى پيروتەحنيكالىق زاتتار ساتاتىن بازارلاردى, دۇكەندەردى, ساۋدا ورىندارىن تەكسەردى.
- جاڭا جىل قارساڭىندا ەلوردا تۇرعىندارى وتشاشۋدى بەلسەندى تۇردە ساتىپ الىپ جاتىر. وسىعان وراي, اۋدانداعى تۇرعىندار كوپ جۇرەتىن ورىنداردا پيروتەحنيكالىق زاتتاردىڭ زاڭسىز اينالىمىنىڭ جولىن كەسۋ, ازاماتتاردىڭ قاۋىپسىزدىگىن قامتاماسىز ەتۋ جانە ساتۋ ەرەجەلەرىنىڭ ساقتالۋىن قاداعالاۋ ماقساتىندا رەيدتەر جۇرگىزىلدى. سونداي-اق پيروتەحنيكالىق زاتتاردى پايدالانۋ كەزىندە ءورت قاۋىپسىزدىگى ەرەجەلەرىن ساقتاۋ ماڭىزدىلىعىن ەسكە سالامىز. وتشاشۋدى ىسكە قوسقان كەزدە تۇرعىن ۇيلەردەن جانە ەلەكتر سىمدارىنان كەمىندە 50 مەتر الىسقا شىعىڭىز. ساتىپ الۋ الدىندا ساتۋشىدان سەرتيفيكات سۇراپ, ساقتاۋ مەرزىمىن تەكسەرىڭىز. كوپتەگەن ادام پايدالانۋ نۇسقاۋلارىن ەلەمەيدى. الايدا بۇل وتە قاۋىپتى. پيروتەحنيكانى دۇرىس قولدانۋدى مىندەتتى تۇردە ۇيرەنىڭىز. بالكوندار مەن تەرەزەلەردەن وتشاشۋلاردى اتپاڭىز – بۇل ورتكە اكەلۋى مۇمكىن, - دەدى بايقوڭىر اۋدانى توتەنشە جاعدايلار ءبولىمىنىڭ باس مامانى ايان قانتەك.
رەيد بارىسىندا اۋداندا پيروتەحنيكالىق زاتتاردى زاڭسىز ساتۋ فاكتىلەرى انىقتالعان جوق.
ۇيىمداستىرۋشىلار جاڭا جىل قارساڭىندا پيروتەحنيكالىق زاتتاردى دۇرىس پايدالانباۋعا بايلانىستى وقيعالاردىڭ سانى ايتارلىقتاي ارتقانىن ەسكەرتەدى. سوندىقتان ەلوردا تۇرعىندارى ساق بولىپ, قاۋىپسىزدىك ەرەجەلەرىن ساقتاۋى كەرەك.
