شاتتىققا تولى ءىس-شاراعا قاتىسقان وقۋشىلار مەرەكەلىك كيىمى مەن كەيىپكەرلىك كەلبەتى جاعىنان بىرىنەن-ءبىرى وتەدى. اسىرەسە ولاردىڭ اراسىنداعى سولتۇستىكقازاقستاندىق 10 جاستاعى ءالي قۇدياروۆتىڭ وبرازى انادايدان وزىنە ەرىكسىز كوز تارتادى. ءالي – سولتۇستىك قازاقستان وبلىسى, اقجار اۋدانى كۇلكول اۋىلىنىڭ ق.حادەسوۆ اتىنداعى ورتا مەكتەبىنىڭ وقۋشىسى. بۇل مەرەكەلىك ءىس-شاراعا كيىپ كەلگەن ء«ومىر اعاشى» كوستيۋمىن ءوزىنىڭ اناسى ارنايى تىگىپ بەرگەن ەكەن. بالاقايدىڭ ۇستىندەگى ء«ومىر اعاشى» كوستيۋمىنىڭ ەڭ الدىمەن كوزگە تۇسەتىنى – الىپ بۇتاقتارى. اعاشتىڭ ءدىڭى رەتىندە جالعاسقان كوستيۋمىنىڭ كەۋدە تۇسىنا جەتى اتاسى تىزىلگەن ءوز اۋلەتىنىڭ شەجىرەسى جازىلعان.
ال ارناۋلى الەۋمەتتىك قىزمەتتەرگە مۇقتاج بالالاردى قولداۋ ورتالىعىنىڭ تاربيەلەنۋشىسى اقمولالىق داريا دياچيشينا پرەزيدەنتكە جاڭاجىلدىق شىرشاعا شاقىرعانى ءۇشىن العىسىن ءبىلدىردى. كيوكۋشينكاي كاراتەمەن شۇعىلداناتىن ونىڭ جەتىستىكتەرى كوپ.
«بۇگىن جاڭا جىل شىرشاسىنا قاتىسۋ مەنىڭ ومىرىمدەگى ەڭ ەرەكشە ءسات, ۇمىتىلماس ۇلكەن وقيعا بولدى. مەن كوپتەگەن سىيلىق الدىم, كەرەمەت شوۋدىڭ كۋاسى بولىپ, وزگە وڭىرلەردەن كەلگەن ءوزىم قۇرالىپتاس بالالارمەن تانىستىم. پرەزيدەنتكە جانە ۇيىمداستىرۋشىلارعا وسى تاڭعاجايىپ مەرەكەنى سىيلاعانى ءۇشىن شەكسىز العىس ايتامىن», دەيدى داريا.
مەرەكەلىك ءىس-شارادا ءار بالاعا مەملەكەت باسشىسى قاسىم-جومارت توقاەۆتىڭ اتىنان قۇتتىقتاۋ اشىقحاتتارى تابىس ەتىلدى.
«اينالايىن بالاقاي! سەنى جاڭا جىل مەيرامىمەن قۇتتىقتايمىن! وسى جارقىن مەرەكە ءوزىڭدى شاتتىققا بولەسىن! ءاردايىم جاڭاشىلدىققا, جاسامپازدىققا ۇمتىل! ءبىلىمپاز, وزات ءارى زەرەك بولىپ, جاقىندارىڭدى قۋانتا بەر! ارمانىڭ اسقاق, قيالىڭ ۇشقىر بولسىن! ساعان زور دەنساۋلىق, باياندى باقىت تىلەيمىن!» دەلىنگەن پرەزيدەنت قۇتتىقتاۋىندا.
ال مەرەكەلىك ءىس-شاراعا قاتىسقان وقۋ-اعارتۋ ءمينيسترى عاني بەيسەمباەۆ مەكتەپ وقۋشىلارىمەن بىرگە شىرشا شامىن جاقتى.
«بۇگىن اسەم ەلوردامىزعا ەلىمىزدىڭ تۇكپىر-تۇكپىرىنەن كەلگەن 100-دەن اسا بالا جينالدى. بۇل كۇندەرى سىزدەر قالانىڭ كورىكتى جەرلەرىن ارالاپ, ەلىمىزدىڭ جەتەكشى وقۋ ورىندارىندا بولدىڭىزدار. 2024 جىل, راسىندا, سىزدەر ءۇشىن جەتىستىكتەر مەن جاقسى جاڭالىقتارعا تولى جىل بولدى. سىزدەردىڭ ارالارىڭىزدا بىلىمىمەن ۇزدىك اتانعاندار, جارىستار مەن بايقاۋلاردا وزا شاپقاندار دا بار, سونداي-اق سىزدەر بيىلعى جىلى جەتىستىكتەرمەن بىرگە جاڭا دوستار تاپتىڭىزدار. ارقايسىلارىڭىزدىڭ جەتىستىكتەرىڭىز ەلىمىزدىڭ بولاشاعىنا قوسىلعان ماڭىزدى ۇلەس دەپ بىلەمىن. مەملەكەت سىزدەردىڭ باقىتتى بالالىق شاقتارىڭىز بەن جارقىن بولاشاقتارىڭىز ءۇشىن بارلىق جاعدايدى جاساپ كەلەدى. ال سىزدەردىڭ مىندەتتەرىڭىز – وسى مۇمكىندىكتەردى پايدالانىپ, جاقسى وقۋ جانە جان-جاقتى دامۋ, وسىلايشا ەلىمىزدىڭ ادال دا جاۋاپتى ازاماتى بولىپ ءوسۋ», دەدى ع.بەيسەمباەۆ.
ەلوردانىڭ ۇزدىك شىعارماشىلىق ۇجىمدارىنىڭ ارتىستەرى مەن قويىلىمدار بالالارعا مەرەكەلىك اتموسفەرا سىيلادى. ەلىمىزدىڭ تانىمال ارتىستەرى كوڭىلدى ءان شىرقاپ, بالالار شىرشانى اينالا بيلەدى. وسى رەسپۋبليكالىق شارشا تويىنا دەيىن ەلىمىزدىڭ ءار قيىرىنان كەلگەن بالالارعا استانانىڭ كورىكتى جەرلەرىنە, ونىڭ ىشىندە تەاترعا, كينوتەاترعا جانە مۇراجايلارعا ەكسكۋرسيا ۇيىمداستىرىلدى. ال ەڭ قىزىقتى ساتتەردىڭ ءبىرى – ءىس-شارا سوڭىندا ءار بالاعا مەملەكەت باسشىسىنىڭ اتىنان جاڭاجىلدىق سىيلىق تارتۋ ەتىلدى.
