قارىزسىز قوعامدى, زاڭدىلىق پەن قۇقىقتىق ءتارتىپ مادەنيەتىن قالىپتاستىرۋ, سونداي-اق ءوسىپ كەلە جاتقان جاس ۇرپاقتىڭ قارجىلىق ساۋاتىن ارتتىرۋ – قۇقىق قورعاۋ ورگاندارىنىڭ الدىندا تۇرعان ماڭىزدى قادامنىڭ ءبىرى.
پاۆلودار وبلىسى بويىنشا ەكونوميكالىق تەرگەپ-تەكسەرۋ وكىلدەرى اتاپ وتكەندەي, مۇنداي الدىن الۋ ءىس-شارالارى رەسپۋبليكا بويىنشا بارلىق ايماقتا ۇيىمداستىرىلىپ جاتىر. جاستار زاڭسىز اينالىمداعى ەسىرتكى زاتتارىنىڭ ورنى تولماس قايعى-قاسىرەت الىپ كەلەتىنىن ءبىلۋى كەرەك. جەكە قاراجاتتى ساۋاتتى باسقارۋ, قۇمار ويىنداردىڭ قاۋپى تۋرالى كەڭىرەك ماعلۇمات الۋ ولاردىڭ كەلەشەگىنە وڭ اسەر ەتەدى.
فورۋم قاتىسۋشىلارى قۇمار ويىندار ادامنىڭ ءومىرىن قالاي قۇرتاتىنىن, ولاردى ۇيىمداستىراتىندار ادامداردى تارتۋدىڭ ءتۇرلى ايلا-شارعىسىن ويلاپ تاباتىنىن ءتۇسىندىردى. كەيىنگى ۋاقىتتا جاستار اراسىندا ەسىرتكىنى جانە پسيحيكانى بۇزاتىن زاتتاردى زاڭسىز تاسىمالداۋ دەرەكتەرى ءجيى تىركەلىپ وتىر. ەسىرتكىنى زاڭسىز تاسىمالداۋ مەن تاراتۋ – قىلمىستىق قۇقىق بۇزۋشىلىققا جاتادى. ەكىنشى جاعىنان مۇنداي زاڭسىز ارەكەت قوعامدا ناشاقورلىقتىڭ كوبەيۋىنە تەرىس اسەر ەتەدى.
وڭىرلىك پوليتسيا دەپارتامەنتى ەسىرتكى قىلمىسىنا قارسى ءىس-قيمىل باسقارماسىنىڭ ءبولىم باستىعى, پوليتسيا پودپولكوۆنيگى يرينا تەمىرعاليەۆا ەسىرتكىگە ەلىتەتىن جاس ازاماتتاردىڭ الدىندا تۇرعان تاۋەكەلدەر تۋرالى اڭگىمەلەپ, ولاردىڭ بارا-بارا ءوزىن تۇلعالىق تۇرعىدان قالاي جوعالتاتىنىن ناقتى مىسالدارمەن كەلتىردى.
– اينالايىندار, سەندەر ءالى كوپ دۇنيەنىڭ قادىرىن تۇسىنبەيتىندەرىڭدى, ادامي قۇندىلىقتارعا ماڭىزبەن قاراي قويمايتىندارىڭدى جاقسى بىلەمىز. بىراق ءبىزدىڭ مىندەت – قوعامدى الاڭداتاتىن قاۋىپتى وزدەرىنە ءتۇسىندىرۋ. كەيىن وپىق جەپ, قايعى-قاسىرەتكە تۇسپەۋ ءۇشىن نە نارسەنىڭ بولسا دا بايىبىنا بارماي, ارەكەت جاساماۋ كەرەك. ەگەر توپ ىشىندە جۇرگەندە زامانداستارىڭ ەسىرتكى پايدالانىپ كورۋگە كەڭەس بەرسە, ءسوزىن سوڭىنا دەيىن تىڭداڭىزدار. ول ءسوزىن اياقتاعان سوڭ سۇراقتارىڭىزدى قويىپ, ءوزىڭىزدىڭ ەستىگەن دالەلدەرىڭىزدى العا تارتىڭىز. مەيلىنشە كوپ سۇراقتار بولسا, ۇسىنىس جاساعان ادامنىڭ ءوزى دە ابدىرايتىنى بەلگىلى. ال سوڭىندا ءبارىبىر «جوق» دەپ جاۋاپ بەرگەنىڭىز ماڭىزدى. اشۋ ۇستىندە وزىڭىزگە قاراتا ايتىلعان بالاعات سوزدەرگە ءمان بەرمەۋ كەرەك. بۇل جەردە جانجال تۋىنداتۋ – ەڭ ۇلكەن قاتەلىك. ءوزىڭىزدى قورعاۋعا ارەكەتتەنۋ قارسىلاستىڭ اشۋىن قوزدىرا تۇسەدى. ءسىزدىڭ بويىڭىزداعى جەكە قادىر-قاسيەتتى وزگەلەر باعالايدى دەپ ويلاۋ – قاتەلىك. ال ادامدار ءبىر-ءبىرىن تالقىلاۋعا قۇمار. وزىنە سەنىمدى ادامدى قوعام الدەقايدا جوعارى باعالايتىنىن بىلگەن ابزال, – دەدى مامان.
ءىس-شارا سوڭىندا ستۋدەنتتەرگە ەسىرتكى قىلمىسىنىڭ الدىن الۋ مەن قارجى باسقارۋ تۋرالى اقىل-كەڭەستەر جازىلعان اقپاراتتىق پاراقشالار تاراتىلدى.
پاۆلودار وبلىسى
