قازىرگى ۋاقىتتا لۋ بان شەبەرحاناسىندا 400-گە جۋىق ستۋدەنت پەن ماگيسترانت «كولىك, كولىك تەحنيكاسى جانە تەحنولوگيالار», «تاسىمالداۋدى, قوزعالىستى ۇيىمداستىرۋ جانە كولىكتى پايدالانۋ» باعدارلامالارى بويىنشا ءبىلىم الىپ جاتىر. سونداي-اق «كولىكتىك ماشينا جاساۋداعى سمارت تەحنولوگيالار مەن جاساندى ينتەللەكت» جاڭا يننوۆاتسيالىق ءبىلىم بەرۋ باعدارلاماسىمەن «اقپاراتتىق تەحنولوگيالار» ماماندىعى بويىنشا وقۋ توبى قۇرىلدى. بۇعان 24 ستۋدەنت قابىلداندى.
لۋ بان شەبەرحاناسى حالىقارالىق جوبا اياسىندا 2023 جانە 2024 جىلدارى 15 وقىتۋشى, ماگيسترانت جانە شقتۋ ينجەنەرلەرى قىتايدا تيانتسزين كاسىبي ينستيتۋتىندا ينتەللەكتۋالدى جەلىلىك اۆتوكولىكتەر, ەلەكتروموبيلدەر قىزمەتى جانە اۆتوكولىكتەردەگى SMART تەحنولوگيالاردى زەرتتەۋ بويىنشا تاجىريبەدەن ءوتىپ كەلگەن. ستۋدەنتتەرگە ءوندىرىس كاسىپورىندارىندا زاماناۋي جابدىقتى پايدالانا وتىرىپ, وقىتۋ مۇمكىندىگى بەرىلدى.
– شەبەرحانانىڭ اشىلۋى جوعارى بىلىكتى مامانداردى كولىك سالاسىندا دايارلاۋدى ەداۋىر تولىقتىرادى. لۋ بان شەبەرحاناسىنىڭ ارقاسىندا ءبىزدىڭ ۋنيۆەرسيتەتىمىزدە كولىك سالاسىنداعى الدىڭعى قاتارلى سمارت-تەحنولوگيالار مەن ەلەكترلىك جانە گيبريدتى كولىكتەردىڭ جاڭا كونسترۋكتسيالارىمەن تانىسۋ مۇمكىندىگى پايدا بولدى. مۇنداعى ءبىلىم بەرۋ مودەلى «EPIP» ستاندارتتار جۇيەسىنە نەگىزدەلگەن, ونىڭ پرينتسيپتەرى «CDIO» ستاندارتتار جۇيەسىمەن ۇندەسەدى. سوندىقتان لۋ بان شەبەرحاناسىنىڭ ءبىلىم بەرۋ مودەلى قازاقستانداعى تەحنيكالىق ءبىلىم بەرۋ سالاسىنداعى جاڭا كەزەڭ, – دەدى د.سەرىكباەۆ اتىنداعى تەحنيكالىق ۋنيۆەرسيتەتتىڭ باسقارما توراعاسى, رەكتور ساۋلە جادىگەرقىزى.
شەبەرحانادا بىلىمدەرىن شىڭداعان ستۋدەنتتەر جوعارى سۇرانىسقا يە. اسىرەسە بيزنەس وكىلدەرى قىزىعۋشىلىق تانىتقان. ماسەلەن, وقۋى ورىن «Astana Motors», «Allur Auto» سىندى كاسىپورىندارمەن شارت جاساسىپ, ستۋدەنتتەر دۋالدى وقىتۋعا كوشكەن. ءسويتىپ, ولار تاجىريبەسىن جەتىلدىرە ءجۇرىپ, تۇراقتى جۇمىسقا ورنالاسادى. ۇزدىكتەر قاتارىنان كورىنگەن ستۋدەنتتەر شقتۋ ماگيستراتۋراسى مەن دوكتورانتۋراسىندا وقۋىن جالعاستىرۋعا جانە عىلىمي زەرتتەۋلەر مەن تاجىريبەلىك-كونسترۋكتورلىق جۇمىستار جۇرگىزۋگە باعىتتالعان.
قازىرگى ۋاقىتتا لۋ بان تسەحىنىڭ قۇرىلىسى ەكىنشى كەزەڭگە وتكەندىگىنە قاراساق, دامۋ ۇستىندە. باعدارلامالاۋ, سمارت قۇرىلعىلاردى جوبالاۋ, قوزعالىس قاۋىپسىزدىگى سمارت-تەحنولوگيالارى جانە اۆتونومدى ۇشقىشسىز اپپاراتتار تەحنولوگيالارى سياقتى وزەكتى داعدىلارعا باعىتتالعان جاڭا كۋرستار ەنگىزىلىپتى. ستۋدەنتتەر قىزىعۋشىلىق تانىتقاندىقتان, ولاردىڭ قاتارى بولاشاقتا كوبەيە تۇسەرى انىق. قازىرگى ۋاقىتتا نيگەريا, موڭعوليا, رەسەي جانە بەلورۋسسيا سىندى مەملەكەتتەردەن كەلىپ, ءبىلىم الىپ جۇرگەندەر دە بار.
شەتەل دەمەكشى, لۋ بان شەبەرحاناسىنىڭ جالعاسى رەتىندە د.سەرىكباەۆ اتىنداعى شىعىس قازاقستان تەحنيكالىق ۋنيۆەرسيتەتى مەن تيانتسزين كاسىبي ينستيتۋتى اراسىندا جاسالعان كەلىسىم نەگىزىندە «SMART Driving Technology» اۆتوموبيلدىك ينتەللەكتۋالدى تەحنولوگيالارىن قولدانۋ جانە جەتىلدىرۋ جونىندەگى قازاقستاندىق ينجەنەرلىك ورتالىق قۇرىلىپ جاتىر. «SMART Driving Technology» نىسانىن سالۋ بويىنشا جۇمىس قولعا الىنعان. ال قىتايدىڭ سەرىكتەستەرى 6 ەلەكتروموبيل بەرەدى. ءسويتىپ, شەبەرحانا از ۋاقىت ىشىندە جوعارى بىلىكتى مامانداردىڭ دامۋىنا ىقپال ەتەتىن تاجىريبە مەن ءبىلىم الماسۋدىڭ كوپىرىنە اينالادى.
قوسىمشا ايتا كەتەرلىگى, لۋ بان شەبەرحاناسى قازاقستاندا «EPIP» (Engineering Practice Innovation Project) ستاندارتتارىنا سايكەس ينجەنەرلەردى دايارلايتىن سەرتيفيكاتتالعان ورتالىق. بۇل ستۋدەنتتەرگە تەك تەحنيكالىق سالالاردا جاڭا ءبىلىم الۋ عانا ەمەس, سونىمەن قاتار ماشينا جاساۋ, اقپاراتتىق تەحنولوگيالار, ەلەكتروتەحنيكا جانە باسقا دا سالالاردا وزىق جۇمىس ادىستەرىن مەڭگەرۋگە مۇمكىندىك بەرەدى.
جوعارىدا اتالعان بىرلەسكەن باعدارلامالار ەلىمىزدەگى وقۋ ستاندارتتارىن جاقسارتۋعا, قىتايدا قولدانىلىپ جۇرگەن جاڭا ادىستەمەلەر مەن تەحنولوگيالاردى ەنگىزۋگە ىقپال ەتۋى مۇمكىن. وقۋ-ورىن باسشىلىعىنىڭ ايتۋىنشا, لۋ بان شەبەرحاناسى تەك ءبىلىم سالاسىندا عانا ەمەس, ديپلوماتيالىق دەڭگەيدە دە الەۋەتكە يە. قازاقستان مەن قىتاي اراسىنداعى دوستىق قارىم-قاتىناستاردى نىعايتۋدا ماڭىزدى ءرول اتقارادى.
وسكەمەن
