تولاسسىز جاۋعان قاردان كەيىن ەلورداداعى كوممۋنالدىق قىزمەتتەر تاۋلىك بويى كۇشەيتىلگەن رەجىمدە جۇمىس ىستەۋگە كوشتى. مىسالى, 21 جەلتوقساندا ەلوردادان 34 مىڭ تەكشە مەتردەن استام قاردى جۇمىسشىلار 2 833 رەيسپەن الىپ شىققان. ال 22 جەلتوقساندا كوممۋنالدىق قىزمەتتەر ەلوردادان 42 مىڭ تەكشە مەتر قار شىعارعان. قار كۇرەۋگە 2 603 جول جۇمىسشى مەن 1 595 ارنايى تەحنيكا جۇمىلدىرىلعان. جالپى, قار تۇسكەلى قار كۇرەيتىن مەكەمەنىڭ جۇمىسشىلارى پوليگوندارعا قالادان 105 695 رەيس ارقىلى 1 ملن 336 مىڭ تەكشە مەتردەن استام قار شىعارىپتى. ءوز جۇمىسىنا ابدەن ماشىقتانعان جۇمىسشىلار ەڭ الدىمەن, ەرەجەگە سايكەس, جولداردا كەپتەلىس بولماس ءۇشىن كولىك كوپ قاتىنايتىن ورىنداردى تازارتادى. سونداي-اق قارقىندىلىعى ورتاشا ۋچاسكەلەر – الاڭدار, ۆوكزال ماڭى اۋماقتارى, تروتۋارلار, الەۋمەتتىك نىساندارعا كىرمە جولدار جانە ورىندار كەزەكپەن قار قۇرساۋىنان بوساپ جاتىر. ولار ورتالىق كوشەلەردى, جولاۋشىلار كولىگى مارشرۋتتارى جۇرەتىن ورىنداردى, ايالدامالار مەن تروتۋارلاردا تازالاۋعا دا باسىمدىق بەرگەن.
بۇگىندە قالادا جابدىقتالعان, قار جيناۋعا قولايلى بىرنەشە پوليگون بار ەكەن. ولار ساموسۆال تەحنيكاسىنىڭ نومىرلىك بەلگىلەرىن وقۋ جۇيەسىمەن جابدىقتالعان. ياعني پوليگونعا قانداي كولىك كەلگەنىن اجىراتادى. پوليگوندا بەينەباقىلاۋ كامەرالارى ورناتىلىپ, جارىقتاندىرىلعان. قالا اكىمدىگى ەلوردا تۇرعىندارى مەن قوناقتارىن جولدا اباي بولۋعا, قاۋىپسىزدىك ەرەجەلەرىن ساقتاۋعا, داۋىلدى ەسكەرتۋ بولعان جاعدايدا الىس ساپارعا شىقپاۋعا شاقىرادى. توتەنشە جاعداي تۋىنداسا, لەزدە «112» نومىرىنە حابارلاسۋدى ەسكەرتەدى.
اقپارات ءۇشىن ايتار بولساق, قار جاۋعان كۇندەرى ەرىكتىلەر ەلوردانىڭ بايقوڭىر اۋدانىندا تۇراتىن قارتتاردىڭ اۋلاسىن قاردان تازارتىپ جاردەمدەستى. «تازا قازاقستان» ەكولوگيالىق اكتسياسى اياسىنداعى تاعى ءبىر ءىس-شارانى بايقوڭىر اۋدانىنىڭ اكىمدىگى مەن «استانا جاستارى» جاستار رەسۋرستىق ورتالىعى ۇيىمداستىرىپتى. وسى كۇنى ەرىكتىلەر قارت تۇرعىندارعا جاڭا جىلعا ارنالعان ازىق-ت ۇلىك سەبەتىن تابىس ەتۋدى ۇمىتپاعان. مۇنىمەن قويماي, «استانا جاستارى» بەلسەندىلەرى قالانى تاۋلىك بويى قاردان تازارتاتىن كوممۋنالدىق قىزمەت ماماندارىنا دا كومەكتەسىپ جۇرگەن كورىنەدى. ەرىكتىلەر تازالىقشىلارعا ىستىق شاي مەن باۋىرساق تاراتۋ اكتسيالارىن بىرنەشە مارتە وتكىزگەن. نەگىزى قالا ەرىكتىلەرى جىل سايىن قىستىڭ قارى قالىڭ تۇسكەن كۇندەرى قاراپ قالمايدى. ولار ەلوردانىڭ بارلىق اۋدانىندا جالعىز تۇراتىن قارتتار مەن كوپبالالى انالاردىڭ اۋلالارىن تازالاپ, ءجيى اكتسيالار ۇيىمداستىرىپ تۇرادى. بىرنەشە كۇن ءۇستى-ۇستىنە جاۋعان قاردان كەيىن كۇن-ءتۇن دەمەي, كۇشەيتىلگەن رەجىمدە كوشە تازالاۋعا جۇمىلعان جۇمىسشىلارعا, وسىندايدا قول-قۋسىرىپ وتىرماعان ەرىكتىلەرگە بارەكەلدى دەگەننەن باسقا ايتىرىمىز جوق.
