فوتو:Polisia.kz
جابىرلەنۋشىلەر تانىمال «وردا» توبىنىڭ كونتسەرتىنە كىرە الماي قالعان ساتتە عانا الدانعاندارىن ءتۇسىنىپ, بىردەن پوليتسياعا جۇگىنگەن. سول سياقتى, باسقا دا ازاماتتار رەسەيلىك تانىمال ءانشىنىڭ كەشىنە كىرۋ ءۇشىن جالعان QR كودتار ساتىپ العان.
«بيلەتتەردىڭ قۇنى 10 مىڭنان 20 مىڭ تەڭگەگە دەيىن بولعان, ال جالپى كەلتىرىلگەن شىعىن شامامەن 200 مىڭ تەڭگەنى قۇرادى. جەدەل-ىزدەستىرۋ ءىس-شارالارى بارىسىندا الماتى اۋدانىنىڭ كريمينالدىق پوليتسيا ءبولىمىنىڭ قىزمەتكەرلەرى بۇل الاياقتىققا 18 جاستاعى ازاماتتىڭ قاتىسى بار ەكەنىن انىقتادى. كۇدىكتى Instagram جەلىسىندە جالعان اككاۋنت اشىپ, تانىمال انشىلەردىڭ كونتسەرتتەرىنە بارۋعا مۇمكىندىك بەرەتىن, شىن مانىندە جوق بيلەتتەردى ۇسىنعان. پوليتسيا قىزمەتكەرلەرى جابىرلەنۋشىلەر اقشا اۋدارعان بانكتىك شوتتى تەكسەرۋ ارقىلى كۇدىكتىنى تابا الدى. تەرگەۋ بارىسىندا جاس جىگىت ءوز كىناسىن تولىق مويىنداپ, تاعى 11 الاياقتىق ارەكەت جاساعانى انىقتالدى», دەلىنگەن حابارلامادا.
قالالىق پوليتسيا دەپارتامەنتى ازاماتتارعا الەۋمەتتىك جەلىلەردەگى جارنامالىق سىلتەمەلەر ارقىلى بيلەتتەر ساتىپ الماۋدى سۇرادى.
