22 جەلتوقسان كۇنى كوممۋنالدىق قىزمەتتەر ەلوردادان 42 مىڭ تەكشە مەتردەن استام قاردى 3 033 رەيسپەن الىپ شىقتى.
سول سياقتى بۇگىن قار كۇرەۋ جۇمىسىنا 2 603 جول جۇمىسشى مەن 1 595 ارنايى تەحنيكا جۇمىلدىرىلدى.
قىس مەزگىلىنىڭ باسىنان باستاپ پوليگوندارعا قالادان 105 695 رەيس ارقىلى 1 ملن 336 مىڭ تەكشە مەتردەن استام قار شىعارىلدى.
ەڭ الدىمەن, ەرەجەگە سايكەس, جولداردا كەپتەلىس بولماس ءۇشىن قوزعالىسى وتە قارقىندى ورىندار تازارتىلادى. سونداي-اق, قارقىندىلىعى ورتاشا ۋچاسكەلەر – الاڭدار, ۆوكزال ماڭى اۋماقتارى, تروتۋارلار, الەۋمەتتىك نىساندارعا كىرمە جولدار جانە ت.ب. تازارتىلادى.
ورتالىق كوشەلەردى, جولاۋشىلار كولىگى مارشرۋتتارى جۇرەتىن ورىنداردى, ايالدامالار مەن تروتۋارلاردا تازالاۋ دا باسىمدىققا يە.
قالادا بىرنەشە جابدىقتالعان قار پوليگونى بار. ولار ساموسۆال تەحنيكاسىنىڭ نومىرلىك بەلگىلەرىن وقۋ جۇيەسىمەن جابدىقتالعان, مۇندا بەينەباقىلاۋ كامەرالارى ورناتىلىپ, جارىقتاندىرۋ قوسىلعان.
قالا تۇرعىندارى مەن قوناقتارىنان جولداردا اباي بولۋدى, قاۋىپسىزدىك ەرەجەلەرىن ساقتاۋدى, داۋىلدى ەسكەرتۋ بولعان جاعدايدا الىس ساپارلارعا شىقپاۋدى سۇرايمىز.
