فوتو: تۋريزم جانە سپورت مينيسترلىگى
قازاقستان فۋتبول فەدەراتسياسىنىڭ پرەزيدەنتتىگىنە كانديداتتار رەتىندە «الماتى وبلىسىنىڭ فۋتبول قاۋىمداستىعى» زتب اتىنان التاي داۋموۆ, «اقمولا وبلىستىق فۋتبول قاۋىمداستىعى» زتب اتىنان ەربول قايىروۆ جانە «استانا قالاسى فۋتبول فەدەراتسياسى قاۋىمداستىعى» زتب اتىنان مارات وماروۆ ۇمىتكەر اتاندى.
قفف باس حاتشىسى سايان حاميتجانوۆ جيىندى اشىپ, كۇن تارتىبىندەگى ماسەلەلەردى اتاپ ءوتتى. ودان كەيىن پرەزيدەنتتىككە ۇمىتكەرلەرگە ءسوز بەرىلدى. وتىرىستىڭ رەسمي بولىگى اياقتالعان سوڭ وبلىستىق فۋتبول قاۋىمداستىعى زاڭدى تۇلعالار بىرلەستىگىنىڭ, فۋتبول ۇيىمدارىنىڭ جانە فۋتبول مەكتەپتەرىنىڭ وكىلدەرى جاڭا پرەزيدەنتتى سايلاۋ ءۇشىن داۋىس بەردى. ناتيجەسىندە قاتىسۋشىلار م.وماروۆتىڭ كانديداتۋراسىن قولدادى.
مينيستر ەربول مىرزابوسىنوۆ مارات وماروۆتى قۇتتىقتاپ, الداعى جۇمىسىنا ساتتىلىك تىلەدى.
«قازاقستان فۋتبول فەدەراتسياسىنىڭ جۇمىسىندا ۇلكەن وزگەرىستەر بولىپ جاتىر. بۇگىن قۇرىلىمنىڭ جاڭا پرەزيدەنتى تاعايىندالدى. باسشىلىققا مارات وماروۆ كەلىپ وتىر. فۋتبول - الەمدەگى ەڭ قىزىقتى ءارى تانىمال سپورت ءتۇرى. قازاقستان ءۇشىن دە ءدال سولاي. جاڭا پرەزيدەنتتىڭ باسشىلىعىمەن ۇلتتىق قۇراما جاقسى ناتيجە كورسەتەدى دەپ سەنەمىن. مارات تالعات ۇلى سالاعا جاڭاشا سەرپىن اكەلىپ, وسى ۋاقىتقا دەيىن جيناعان تاجىريبەسىن وتاندىق فۋتبولدىڭ دامۋىنا جۇمسايدى دەگەن ويدامىن. ەل ازاماتتارى فۋتبولعا ەرەكشە قىزىعۋشىلىقپەن قارايدى. سوندىقتان فۋتبولدى جاڭاشا دامىتۋىمىز كەرەك. اسىرەسە, حالىقارالىق دەڭگەيدەگى ىنتىماقتاستىقتى ارتتىرۋ قاجەت. فۋتبولشىلاردىڭ, الەمدىك دەڭگەيدەگى باپكەرلەر مەن تورەشىلەردىڭ دايىندىعىنا, رەزەرۆتى دايارلاۋعا ەرەكشە كوڭىل ءبولۋ ماڭىزدى», دەدى ەربول مىرزابوسىنوۆ.
ايتا كەتەيىك, بۇگىنگى تاڭدا بۇل سپورت تۇرىمەن 1 ميلليوننان استام ادام تۇراقتى تۇردە شۇعىلدانادى. ونىڭ ىشىندە اۋىلدىق جەرلەردە 537 مىڭ ادام فۋتبول وينايدى.
