فوتو: ۆيدەودان الىنعان كادر
باس پروكۋراتۋرانىڭ مالىمەتىنشە, كۇدىكتى 2023 جىلى كورەيا رەسپۋبليكاسىنان اۆتوكولىكتەردى نارىقتىق باعادان تومەن باعامەن جەتكىزۋگە ۋادە بەرىپ, الاياقتىق جولمەن 6 جابىرلەنۋشىنىڭ (الماتى قالاسى تۇرعىندارىنىڭ) قاراجاتىن يەمدەنىپ, ولارعا جالپى كولەمدە 145 ميلليون تەڭگەدەن استام زالال كەلتىرگەن.
قىلمىس جاساعاننان كەيىن كۇدىكتى جاسىرىنىپ, سوعان بايلانىستى ول حالىقارالىق ىزدەۋگە جاريالانعان.
«بيىلعى جىلدىڭ ساۋىرىندە ول رەسەي فەدەراتسياسىنىڭ كراسنودار ولكەسىندە ۇستالىپ, سودان كەيىن قازاقستان رەسپۋبليكاسى باس پروكۋراتۋراسىنىڭ سۇراۋى بويىنشا وتانىنا ەكستراديتسيالاندى. قازىر كۇدىكتى تەرگەۋ يزولياتورىنا قامالدى», دەلىنگەن حابارلامادا.
كۇدىكتىگە ايىپتالعان قىلمىستى جاساعانى ءۇشىن مۇلكى تاركىلەنىپ, بەس جىلدان ون جىلعا دەيىنگى مەرزىمگە باس بوستاندىعىنان ايىرۋ جازاسى قاراستىرىلعان.
