سۋرەتتى تۇسىرگەن – ەرلان ومار, «EQ»
ەلىمىزدەگى زەينەتكەرلەر سانى – 2 ملن 428 مىڭ ادام. 2024 جىلعى 1 جەلتوقسانداعى جاعداي بويىنشا جيىنتىق زەينەتاقىنىڭ ورتاشا مولشەرى 131 556 تەڭگەگە جەتسە, ونىڭ ىشىندە ىنتىماقتى زەينەتاقى مولشەرى – 88 967 تەڭگە, بازالىق زەينەتاقى – 42 589 تەڭگە.
2018 جىلعى 1 شىلدەدەن باستاپ مەملەكەتتىك بازالىق زەينەتاقى تولەمى زەينەتاقى جۇيەسىندەگى ءوتىلىن ەسكەرە وتىرىپ, ءار الۋشىعا جەكە تاعايىندالىپ كەلەدى. بۇل رەتتە 1998 جىلعى 1 قاڭتاردان بەرى ىنتىماقتى جۇيەدە جۇمىس ىستەگەن ۋاقىتى, سونداي-اق مىندەتتى زەينەتاقى جارنالارى (مزج) تولەنگەن كەزەڭدەر زەينەتاقى جۇيەسىندەگى ەڭبەك وتىلىنە قوسىلادى.
ەگەر ازاماتتىڭ زەينەتاقى جۇيەسىندەگى ءوتىلى 10 جىل نەمەسە ودان از بولسا, سونداي-اق مۇلدە بولماسا, بازالىق زەينەتاقى ەڭ تومەنگى كۇنكورىس دەڭگەيىنىڭ 65%-ىنا تەڭ بولسا, سودان كەيىن 10 جىلدان اسقان ءار جىل ءۇشىن ونىڭ مولشەرى 2 %-عا ارتادى. ال ەگەر ەڭبەك ءوتىلى 20 جىلعا تولسا, بازالىق زەينەتاقىسى تومەنگى كۇنكورىس دەڭگەيىنىڭ 85%-ى مولشەرىندە بولادى. ەڭبەك ءوتىلى 30 جىل نەمەسە ودان كوپ بولسا, كۇنكورىس دەڭگەيىنىڭ ەڭ جوعارعى مولشەرىندە, ياعني 105% بەلگىلەنەدى.
ەگەر ءبىر اي ىشىندە مىندەتتى زەينەتاقى جارنالارى بىرىڭعاي جيناقتاۋشى زەينەتاقى قورىنا بىرنەشە رەت اۋدارىلسا, جيناقتاۋشى جۇيەگە قاتىسۋ مەرزىمى ءبىر ايدى قۇرايدى. وسىلايشا, مىندەتتى زەينەتاقى جارنالارى نەعۇرلىم تۇراقتى, تولىق كولەمدە اۋدارىلاتىن بولسا, زەينەت جاسىنا جەتكەندە بازالىق زەينەتاقى سوماسى سولعۇرلىم قوماقتى بولادى. ءار ازاماتتىڭ جاسىنا بايلانىستى زەينەتاقى تولەمدەرىنىڭ مولشەرى 1998 جىلعى 1 قاڭتارداعى جۇمىس وتىلىنە (كەم دەگەندە 6 اي قاجەت) ءارى زەينەتكەرلىككە دەيىنگى كەزەڭدەگى ورتاشا ايلىق تابىسىنا قاراي ەسەپتەلەدى.
