دالىرەك ايتقاندا, استانا قالاسىندا ەكى اۋىسىمدا 4 مىڭ وقۋشىعا ارنالعان ون ءبىرىنشى «جايلى مەكتەپ» پايدالانۋعا بەرىلدى. بۇل ءبىلىم ورداسى «ۇركەر» تۇرعىن الابىندا ورنالاسقان. جاڭا وقۋ وشاعى باس شاھارداعى وقۋشى ورنى تاپشىلىعىن شەشۋگە سەپتىگىن تيگىزبەك. وسى «جايلى مەكتەپ» ۇلتتىق جوباسى اياسىندا 2026 جىلعا دەيىن ەلوردادا 24 مەكتەپ سالىنادى دەپ جوسپارلانىپ وتىر.
سونداي-اق تۇركىستان وبلىسىنداعى ەڭبەكشى ديحان مەن مانكەنت اۋىل ادامدارى ءۇشىن اق تۇيەنىڭ قارنى جارىلدى. بۇل قوس ەلدى مەكەندە ەكى جاڭا مەكتەپ بوي كوتەردى. ءبىلىم ورداسىنىڭ ءبىرى – پرەزيدەنت باستاماسىمەن جۇزەگە اسىپ وتىرعان «جايلى مەكتەپ» ۇلتتىق جوباسى اياسىندا سالىندى. اتالعان مەكتەپ 600 وقۋشىعا ارنالىپ, زاماناۋي قاۋىپسىزدىك تالاپتارىنا سايكەس كەلەتىن بارلىق قۇرال-جابدىقپەن قامتىلعان. ايتا كەتەيىك, بۇل – تۇركىستان وبلىسىندا بەرىلگەن ەكىنشى «جايلى مەكتەپ».
ال باتىس قازاقستان وبلىسىنىڭ ورتالىعى ورال قالاسىندا 400 وقۋشىعا ارنالعان جاڭا مەكتەپ وقۋشىلارعا ەسىگىن ايقارا اشتى. مۇندا بالالار شىعارماشىلىعىن دامىتۋ مەن دەمالۋعا ارنالعان كەڭىستىكتەر, سونداي-اق جەكە شكافتار قاراستىرىلعان. بۇدان بولەك, سپورت جانە اكت زالدارى, كىتاپحانا, اسحانا, شەبەرحانا جانە 36 پاندىك كابينەت بار. بۇعان قوسا قوستاناي وبلىسىنىڭ قوستاناي جانە ارقالىق قالالارىندا مەملەكەتتىك ەكى جاڭا بالاباقشانىڭ لەنتاسى قيىلدى. بۇل مەكتەپكە دەيىنگى ۇيىمدار بارلىق زاماناۋي ستاندارتتارعا ساي جاسالعان. ولار جاتىن, ويىن بولمەلەرىمەن, حورەوگرافيالىق, گيمناستيكالىق, مۋزىكالىق جانە سپورت زالدارىمەن, پەداگوگ-پسيحولوگ, لوگوپەد, مەديتسينالىق, قوسىمشا ءبىلىم بەرۋ كابينەتىمەن قامتىلعان.
مەرەكە كۇنى ەلىمىزدىڭ ءتورت وڭىرىندە قوسىمشا ءبىلىم بەرۋ نىساندارى بەرىلدى. ماسەلەن, اقتوبە وبلىسى قارعالى اۋدانىنىڭ بادامشا اۋىلىندا ونەر مەكتەبى بوي كوتەردى. وندا 550-گە جۋىق بالا ءبىلىم الادى. قىزىلوردا وبلىسىنىڭ جاڭاقورعان اۋدانىندا وقۋشىلار سارايى مەن ونەر مەكتەبى ەسىگىن اشتى. مۇندا 19 قوسىمشا ءبىلىم بەرۋ باعىتىمەن 250-دەن استام بالا وقيدى.
سونىمەن قاتار پاۆلودار وبلىسىنىڭ ەكىباستۇز قالاسىندا مەملەكەت باسشىسىنىڭ تاپسىرماسىمەن سالىنعان «سامعاۋ» اتتى بالالاردىڭ زاماناۋي شىعارماشىلىق ءۇيى پايدالانۋعا بەرىلدى. «بالالارعا قوسىمشا ءبىلىم بەرۋ جۇيەسىنىڭ جاڭا ۇلگىسى» عىلىمي-تەحنيكالىق باعدارلامالارى اياسىندا سالىنعان نىسان 12 باعىت بويىنشا جەتكىنشەكتەردى وقىتۋعا ارنالعان جوعارى تەحنولوگيالارمەن جابدىقتالعان. ورتالىق كۇنىنە 3000-عا دەيىن بالانى قابىلدايدى. ونىڭ ىشىندە ەرەكشە ءبىلىم بەرۋدى قاجەت ەتەتىن وقۋشىلار دا بار.
