بۇل گرانتتى وقۋ ورنى 2022 جىلى تاعايىنداعان. بيىل بايقاۋعا ۋنيۆەرسيتەتتىڭ ءۇش مىڭنان استام وقىتۋشىسى, دوكتورانتتارى مەن پوستدوكتورانتتارى قاتىستى. ءسويتىپ, ۋنيۆەرسيتەتتەگى ديرەكتورلار كەڭەسىنىڭ تاۋەلسىز ديرەكتورى, بەلگىلى كاسىپكەر, ينۆەستور تالعات دۇيسەكوۆ باسقارعان كوميسسيا جالپى قۇنى 84 ميلليون تەڭگەنى قۇرايتىن 10 جوبانى انىقتادى.
«قازىر مەملەكەت باسشىسى تاراپىنان عىلىم مەن عالىمداردى جان-جاقتى قولداۋ ۇدايى ارتىپ كەلەدى. ءبىر جاعىنان, وتاندىق عىلىم الدىندا عالىمداردىڭ يننوۆاتسيالىق ازىرلەمەلەرىن كوممەرتسيالاندىرۋ جانە ولاردى ەكونوميكاعا ەنگىزۋ مىندەتى تۇر. بۇل – ورتاق ماقسات. سوندىقتان ەكى جىل بۇرىن ەۇۋ زەرتتەۋشىلەرىن قولداۋ باعىتىندا «جاڭا اسۋ» گرانتى تاعايىندالدى. بيىلعى بايقاۋعا 36 جوبا قاتىسىپ, ونىڭ 10-ى ۇزدىك دەپ تانىلدى. ونىڭ ىشىندە ەنەرگەتيكا, ميكروبيولوگيا, ەكولوگيا سالاسىنا ارنالعان جوبالار بار. ەندى بۇدان ءارى دە بيزنەس-يدەيالاردى, كوممەرتسيالاندىرۋ بولاشاعى بار جوبالاردى دامىتىپ, عالىمداردى جان-جاقتى قولداۋعا بارلىق جاعداي جاسايمىز», دەدى ۋنيۆەرسيتەت رەكتورى ەرلان سىدىقوۆ.
ودان كەيىن ءسوز العان ەۇۋ عىلىم جانە كوممەرتسيالاندىرۋ جونىندەگى پرورەكتورى جاننا قۇرمانعاليەۆا ەكى جىل ىشىندە «جاڭا اسۋ» گرانتى عىلىمي-تەحنيكالىق قىزمەت ناتيجەلەرىن كوممەرتسيالاندىرۋدى قولداۋدىڭ تابىستى قۇرالى بولعانىن جەتكىزدى.
«باستاپقىدا 3 ميلليون تەڭگەنى قۇراعان بۇل گرانتتىڭ العاشقى يەگەرلەرىنىڭ كەيبىرى بۇگىندە 150 ميلليون تەڭگە تابىس دەڭگەيىنە جەتكەنى قۋانتادى. مەنىڭ ويىمشا, بۇل فاكت عىلىمدى قاجەت ەتەتىن بيزنەستى قالىپتاستىرۋعا ەڭ از ينۆەستيتسيالاردىڭ دا جوعارى ناتيجەلىلىگىن ايقىن كورسەتەدى. وتاندىق عالىمدار مەن ولاردىڭ ازىرلەمەلەرىنىڭ الەۋەتىنە سەنۋ كەرەك», دەدى ول.
جاڭا گرانت يەگەرى, ەۇۋ مەحانيكا-ماتەماتيكا فاكۋلتەتىنىڭ دوكتورانتى ايدانا كارىپوۆا ءجاسوسپىرىم قىزدارعا ارنالعان «Sezin» ءموبيلدى قوسىمشاسىن ازىرلەگەن.
«بۇل – ەلىمىزدەگى قازاق تىلىندەگى العاشقى ءموبيلدى قوسىمشا. وندا قىزداردىڭ جەكە دامۋىنا باعىتتالعان ءبىلىم مازمۇنى بار (ەلەكتروندىق كىتاپحانا, ونلاين وقىتۋ كۋرستارى, سۇلۋلىق بلوگى, لايفحاكتار, ت.ب.). مەن وسى جوباعا اۆتورلىق قۇقىق پاتەنتىن ءبىر جارىم جىل بۇرىن الدىم. قوسىمشا جاساۋ يدەياسى مەكتەپتە وقىپ جۇرگەندە ويىما كەلدى. ءوزىم اۋىل مەكتەبىندە ءبىلىم الدىم. سوندا مەن قىزدارعا مۇنداي اقپاراتتىق قولداۋدىڭ قانشالىقتى قاجەت ەكەنىن ءتۇسىندىم. مەنىڭ ماقساتىم – كەز كەلگەن قيىندىققا تاپ بولعان ءاربىر بويجەتكەنگە كومەكتەسۋ, قولداۋ كورسەتۋ», دەدى جوبا اۆتورى.
ال ل.ن گۋميلەۆ اتىنداعى ەۇۋ ەكولوگيا كافەدراسىنىڭ 3-كۋرس دوكتورانتى مەدەت احتاەۆ كومىرتەگى شىعارىندىلارىن ازايتىپ, وتىندى ۇنەمدەۋگە سۋتەگى وتىنىن گەنەراتسيالاۋ جۇيەسىن ەنگىزۋ بىرەگەي عىلىمي جوباسىمەن اينالىسادى.
ء«بىز بۇل يدەيانى ەكى سالادا سىناپ كوردىك. جوبانىڭ بىرەگەيلىگى سول, الەمدىك انالوگتەر جاڭا جابدىقتارعا ارنالعان بولسا, ءبىزدىڭ ازىرلەمەلەردى وتاندىق وندىرىستەگى قازىرگى ديزەلدىك جابدىققا ەنگىزۋگە بولادى. بولاشاقتا جوبا ەلىمىزدىڭ اۋىر ونەركاسىبىنە وراسان پايدا اكەلەدى دەپ سەنەمىن», دەيدى دوكتورانت.
سونداي-اق بايقاۋدا فيزيكا-تەحنيكالىق عىلىمدار ينستيتۋتىنىڭ (فعزي) دوكتورانتى ازات نۇرقاسيموۆتىڭ «وڭ تەمپەراتۋرالىق كوەففيتسيەنتى بار پوليمەرلى كومپوزيت نەگىزىندەگى وتاندىق ءوزىن-ءوزى رەتتەيتىن جىلۋ كابىلىن ءوندىرۋ تەحنولوگياسىن قۇرۋ», جاراتىلىستانۋ فاكۋلتەتى دوكتورانتۋراسىنىڭ عىلىمي قىزمەتكەرى نۇرگۇل ىقساتتىڭ «اۋىل شارۋاشىلىعى داقىلدارىنىڭ ۆيرۋستىق اۋرۋلارىن دياگنوستيكالاۋدىڭ رنق تەحنولوگيالارىن ازىرلەۋ جانە زەرتتەۋ», مەحانيكا-ماتەماتيكا فاكۋلتەتىنىڭ وقىتۋشىسى داۋرەن بالتابايدىڭ ء«ارتۇرلى ماقساتتاعى روبوت-مانيپۋلياتورلاردىڭ 3D ۇلگىلەرىن جاساۋ جانە باعدارلاما جاساۋ», ەكونوميكا فاكۋلتەتىنىڭ دوكتورانتى اراي ەسەيقىزىنىڭ «Daneqer» جوباسىن باسقارۋعا ارنالعان باعدارلامالىق مودەلدەۋ ويىنى», فيلولوگيا فاكۋلتەتىنىڭ دەكانى سەرىكزات دۇيسەنعازىنىڭ «تانىمال شەتەلدىك مۋزىكالىق شىعارمالار مادەنيەتىنىڭ قازاق تىلىندە جاڭعىرۋى: ءان مەن ءتىل توعىسى», تاعى باسقا جوبالار جەڭىسكە جەتتى.
