وسى ۇلگىنى قازاق تىلىنە اۋدارما مەن كونتەنت جاساۋدان باستاپ, كولەمدى ماتىندەردى وڭدەۋگە دەيىن قولدانۋعا بولادى. «ISSAI KAZ-LLM» مودەلى قازاق, ورىس جانە اعىلشىن تىلدەرىنە ارنالىپ جاسالعان. سونداي-اق تۇرىك ءتىلىن قوسىمشا قولدايدى. ءبىر جاعىنان, بۇل تىلدىك الشاقتىقتى جويىپ, شەكتەۋلى رەسۋرستارعا يە تىلدەردەگى گەنەراتيۆتى جاساندى ينتەللەكتىنىڭ دامۋىنا مۇمكىندىك بەرەدى. بۇعان ءبىراز كۇش جۇمسالدى. «ISSAI» كومانداسى اتالعان مودەلدىڭ جاقسى جۇمىس ىستەۋىن قامتاماسىز ەتۋ ءۇشىن 150 ملرد-تان استام ءسوزدى جيناپ, وڭدەپ, سينتەزدەپ, اۋدارعان. «ISSAI KAZ-LLM»-ءنىڭ وقىتۋ دەڭگەيى وتە جوعارى. بىلايشا ايتقاندا, بۇل مودەل جاساندى ينتەللەكت سالاسىنداعى الەمدىك كوشباسشىلارمەن باسەكەگە ەركىن تۇسە الادى.
سونىمەن قاتار «ISSAI KAZ-LLM» تالانتتى ادامدارعا تاجىريبە جيناۋعا مۇمكىندىك بەرىپ, ەلىمىزدەگى جاساندى ينتەللەكتىنى دامىتۋ اياسىن كەڭەيتەدى. بۇل جوبا وزىق جاساندى ينتەللەكت قۇرالىن جاساۋعا عانا ەمەس, سونداي-اق وسى سالادا وتاندىق ماماندار سانىن كوبەيتۋگە دە ىقپال ەتەدى. ونى ازىرلەۋگە وتاندىق زەرتتەۋشىلەر قاتىستى. اسىرەسە ەلىمىزدەگى جەتەكشى ينستيتۋتتارمەن ىقپالداستىق لينگۆيستەردىڭ جانە ماشينالىق اۋدارمانىڭ وزىق ادىستەرىنىڭ كومەگىمەن قازاق تىلىنە بەيىمدەلگەن سالىستىرمالى تالداۋ قۇرالدارى مەن دەرەكتەر جيىنتىعىن جاساۋعا مۇمكىندىك بەردى.
Nazarbayev University مەن NIS قارجىلاندىرعان جوبا بيىل ءساۋىر ايىندا باستالدى. بارلىق دەرەك قازاق تىلىندەگى ۆەب-سايتتارداعى جاڭالىقتار مەن ماقالالاردى, ونلاين-كىتاپحانالاردى قوسا العاندا, جالپىعا قولجەتىمدى كوزدەردەن جينالدى. سونداي-اق وعان ءارتۇرلى ۇيىم ۇسىنعان مالىمەتتەر دە قولدانىلدى.
«بۇل مودەل ەلىمىزدىڭ يننوۆاتسياعا, دەربەستىككە جانە تەحنولوگيالىق ەكوجۇيەسىنىڭ وسۋىنە دەگەن ۇمتىلىسىن كورسەتەدى. ءبىزدىڭ كوماندامىز «Meta-نىڭ Llama» ارحيتەكتۋراسىنا سۇيەنە وتىرىپ, جوعارى ءونىمدى جۇيەلەر مەن رەسۋرستارى شەكتەۋلى ورتالارعا وڭتايلاندىرىلعان 8 ميلليارد جانە 70 ميلليارد پارامەترلى «ISSAI KAZ-LLM»-ءنىڭ ەكى نۇسقاسىن دايىندادى. «CC-NC-BY» ليتسەنزياسىمەن شىعارىلعان مودەلدەر كوممەرتسيالىق ەمەس ماقساتتا «Hugging Face» پلاتفورماسىندا قولجەتىمدى بولادى. سونىمەن بىرگە جاھاندىق اكادەميالىق جانە زەرتتەۋ ىنتىماقتاستىعىنا ىقپال ەتەدى. وسىلايشا, ازىرلەۋشىلەر ءبىزدىڭ مودەلىمىزدى كۇردەلى سەرۆەرلەرگە دە, نوۋتبۋكتەرگە دە جۇكتەپ الىپ, ىسكە قوسا الادى», دەيدى NU جانىنداعى «ISSAI» نەگىزىن قالاۋشى جانە ديرەكتورى پروفەسسور حۋسەين اتاكان ۆارول.
ەندى اقىلدى جۇيەلەر مەن جاساندى ينتەللەكت ينستيتۋتىنىڭ زەرتتەۋشىلەرى جاساندى ينتەللەكت جۇيەلەرىن, ونىڭ ىشىندە ءتىلدى تانۋ مودەلدەرىن دامىتۋدى جانە وسى ۇلگىلەردى قوسىمشا تۇركى جانە ايماقتىق تىلدەردى قولداۋ ءۇشىن كەڭەيتۋدى قاراستىرماق. بۇل ايماقتىق بايلانىستاردى نىعايتىپ, ءتىل ينتەگراتسياسىن جەڭىلدەتەدى. سونىمەن قاتار ەلىمىزدە جانە باسقا جەرلەردە ەلەۋلى ەكونوميكالىق جانە تەحنولوگيالىق اسەردى ىنتالاندىرۋعا مۇمكىندىك بەرەدى.
ايتا كەتەيىك, اتالعان ينستيتۋت عالىمدارى جاساعان «KAZ-LLM» جوباسى «NU» جانە «NIS» دامۋ قورىنىڭ, سونداي-اق «Astana Hub» جانە «QazCode» (Beeline) قولداۋىنىڭ ارقاسىندا ىسكە استى. جوبانى ازىرلەۋ مەملەكەتتىڭ قاراجاتىنسىز جۇرگىزىلدى.
