كوللاجدى جاساعان – قونىسباي شەجىمباي, «EQ»
«ەگەمەن قازاقستانعا» – 75 جىل!
19.12.1994 رەداكتسيادامىز... ءۇش قاباتتى ساپىرىپ ءجۇرمىز. اينالايىن اسىلدار قىزمەت ىستەگەن قىمبات قابىرعا, جۇرەككە ىستىق ءبارى دە.
شاپشاڭ تۇردە ءماجىلىس بولدى. باس رەداكتور نۇرلان ورازالين قىسقا مالىمدەدى. بۇگىن 16.00 ساعاتتا اباي اتىنداعى وپەرا جانە بالەت تەاترىندا «ەگەمەن قازاقستاننىڭ» 75 جىلدىق تويى سالتاناتتى تۇردە اشىلاتىنىن ءمالىم ەتتى. قاراعاندىدان, جەزقازعاننان كەلگەن وكىلدەر رەداكتورعا سىي-سياپاتتارىن تاپسىردى... ءبىزدىڭ وبلىستاعى شەنەۋنىكتەردىڭ تارلىعىن ويلايمىن ىشىمنەن. ساعات 16.00-دە وپەرا جانە بالەت تەاترىنىڭ قاسيەتتى تابالدىرىعىنان اتتادىق. توي مىنەزى اركىمنىڭ كوزىنەن, سويلەگەن سوزىنەن بايقالادى. ءبارىنىڭ اۋزىندا – «ەگەمەن قازاقستان». سونى دارىپتەيدى, سونى ەمەشەگى ءۇزىلىپ ايتادى, تامسانعاندا تاڭدايى تىقىلدايدى. ءبىز 5-قاتارعا جايعاستىق.
سالتاناتتى كەش ساعات 16-دان 15 مينۋت كەتكەندە باستالدى. مەملەكەتىمىزدىڭ ءانۇرانى شىرقالدى. ساحنا تورىندەگى «ەگەمەن قازاقستان-75» دەگەن جازۋ قىزىلمەن اسا ايشىقتالىپ جازىلعان ەكەن, كوڭىلگە ءتۇرلى وي سالىپ, سەزىم قىلىن تەربەيدى... ە, اللا, كەشەگى مىرجاقىپ دۋلاتوۆ سىندى الىپتار ۋىعىن شانىشقان قارا شاڭىراقتىڭ تويىندا وتىرعانىما, شۇكىر دەپ ىشتەي تابىنامىن قۇدىرەتى كۇشتى جاراتۋشىعا.
ساحنا تورىندە وتىرعاندارعا ىنتىعا قاراپ, جىعا تانۋعا تالپىنامىن. ولار – ءبىر شوعىر, قازاق ادەبيەتى مەن مادەنيەتىنە ولشەۋسىز ۇلەس قوسقان كادۋىلگى الىپتار... پرەمەر-ءمينيستردىڭ ورىنباسارى ا.ەسىموۆ, بۇرىنعى باس رەداكتورلار س.بايجانوۆ پەن ب.قىدىربەك ۇلى, ش.مۇرتازا مەن جوعارعى كەڭەس توراعاسى, بۇرىنعى رەداكتور ءا.كەكىلباەۆ, قازاقستان جازۋشىلار وداعى باسقارماسىنىڭ ءبىرىنشى حاتشىسى ق.نايمانباەۆ, قازاقستان جۋرناليستەر وداعى باسقارماسىنىڭ ءبىرىنشى حاتشىسى ك.سمايىلوۆ, ش.ەلەۋكەنوۆ, ت.ب.
جينالىستى «ەق» باس رەداكتورى نۇرلان ورازالين اشتى. ول قازاقستان پرەزيدەنتى ن.نازارباەۆتىڭ گازەت تويىنا قۇتتىقتاۋىن وقىپ بەردى. جوعارعى كەڭەستىڭ دەپۋتاتى ۋ.قاليجانوۆ وسى وكىلەتتى ورگاننىڭ ارنايى قۇتتىقتاۋىن وقىدى.
جۇرت الدىندا ن.ورازالين «ەق»-نىڭ قۇرمەتتى ءتىلشىسى كۋالىگىن تاپسىرا باستادى. ءا.كەكىلباەۆ, ودان ءارى بايجانوۆقا, قىدىربەك ۇلىنا, مۇرتازاعا تابىستالدى. بەكبوسىنوۆ قاجىبەك مارتەبەلى كۋالىك يەلەرىن انمەن قۇتتىقتادى. سودان سوڭ بارىپ ورازالين بايانداما جاسادى. ءبىر كەزدە ساحنانىڭ قوس قاپتالىنان ايىرىلا جۇزگەندەي وڭشەڭ اققۋلار – قىزدار قولدارىنا ۇلبىرەتە ۇستاعان شاپاندارىن توعىزىنشى قاتاردا سامساپ وتىرعان 30 ارداگەردىڭ ۇستىنە جاپتى. ءتورت-بەس ارداگەر باسقا قاتاردا وتىرىپ قالسا كەرەك, ولارعا سول ساتىندە شاپان تيمەي قالىپ, ابىر-سابىر كوبەيىڭكىرەدى دە, كەيىن ەرجۇمان ارقايسىسىنا كادەلەرىن اتاپ-اتاپ ۇلەستىرىپ جاتتى.
ءباسپاسوز ءمينيسترى ا.سارسەنباەۆ ءسوز سويلەپ «ەق»-نىڭ جازىلىمى 83 248 داناعا جەتكەنىن ايتتى. نارىق قىسقان قيىن كەزدە بۇل تاماشا كورسەتكىش ەدى. بەكبولات تىلەۋحانوۆ دوسپامبەت جىراۋدىڭ توكپەسىن ورىندادى.
الماتى قالاسى اكىمىنىڭ ءبىرىنشى ورىنباسارى ش.وماروۆ ءسوز سويلەپ, «ەق»-عا 12 پاتەر بولىنەتىنىن حاباردار ەتتى. مۇنىڭ ەكەۋىنىڭ كىلتى تاپسىرىلىپ تا قويىپتى.
الماتى وبلىسىنىڭ اكىمى و.وزبەكوۆ «ۆولگا» كىلتىن باس رەداكتورعا تابىس ەتتى. تالدىقورعاندىقتار اتىنان (س.اقىنبەكوۆ) گازەتتىڭ تاربيەلىك ماڭىزى ايتىلىپ تۇيە, كىلەم سىيلاندى. وڭتۇستىكقازاقستاندىقتاردىڭ سىيى – (ز.تۇرىسبەكوۆ) گازەتتىڭ بيىل 20 مىڭ دانامەن تاراۋى, ياعني رەسپۋبليكالىق دەڭگەيدىڭ تورتتەن ءبىرى. جەزقازعاننان تويعا وبلىس اكىمىنىڭ ورىنباسارى كەلىپ قۇتتىقتاۋ ايتتى, وبلىستاعى مەنشىكتى تىلشىگە فاكس, ارناۋلى جۇمىس بولمەسى بەرىلىپتى.
قىرعىزستان رەسپۋبليكالىق «قىرعىز تۋى» گازەتىنىڭ (بۇل گازەت وسىنىڭ الدىندا 70-كە تولعان) باس رەداكتورى «ەق»-نى ءبىزدىڭ ەلدە تاڭشولپانعا باعالايدى دەدى. ماناس بەينەسى بەينەلەنگەن شاعىن كىلەمشە سىيلادى ول. وزبەكستان وكىلى سويلەدى. ول ەشتەڭە بەرمەي ءوزى شاپان-بورىك كيىپ جاتقاندا, زال ءىشى ءبىر ءازىلدىڭ تۇندىگىن جەلپىلدەتىپ دۋىلداتا قول سوقتى. قازاقستان جازۋشىلار وداعى باسقارماسىنىڭ ءبىرىنشى حاتشىسى قالداربەك نايمانباەۆ ءال-فارابي سۋرەتى بار كىلەمشە, دومبىرا سىيلادى. قازاقستان رەسپۋبليكاسى جۋرناليستەر وداعىنىڭ ءبىرىنشى حاتشىسى كامال سمايىلوۆ گازەت تاريحىندا ءابۋ سارسەنباەۆ پەن ءابدىلدا تاجىباەۆتىڭ, ءابدۋالي قاراعۇلوۆ پەن حاميت ەرعاليەۆتىڭ جانە باسقالاردىڭ ەرەكشە قولتاڭبالارى بار ەكەنىنە نازار اۋداردى.
زالدان ءسوز سۇراپ, بۇيرا شاشتى ءابۋ سارسەنباەۆ ءىلبي كوتەرىلىپ كەلە جاتتى. نۇرلانمەن قۇشاقتاسىپ, سالەمدەستى دە مىنبەرگە شىقتى. – توقسانىمدى كوتەرىپ كەلىپ تۇرمىن بۇل تويعا, – دەدى ءسال دەمىن باسىپ, اسىل سۇيەكتى ابەكەڭ. – وتىزىنشى جىلداردىڭ سارقىتى ەدىم, باس كورسەتەيىن دەپ جەتتىم مۇندا. باس رەداكتورلار العاشىندا ماقالامدى شيمايلاپ تاستاپ, ولاردى قايتا كوشىرىپ اۋرە بولاتىنمىن. مايداننان دا بايلانىسىپ تۇردىم. ادەبيەتكە تانىستىرعان مەنى وسى گازەت ەدى.. ولەڭدەرىمدى جىبەرىپ, جاريالاتتىم. سوندا عابيتتىڭ «مايداننان سوققان جاڭا لەپ» دەگەن ماقالاسىنا ىلىككەنىم بار. كەزىندە قاسىمنىڭ «ابدوللاسىن» دا وسى گازەتتەن وقىدىق. راقمەت, ساعان تاربيەڭ ءۇشىن كيەلى شاڭىراعىم.
بۇدان سوڭ «كازاحستانسكايا پراۆدا» گازەتىنىڭ باس رەداكتورى گ.ديلدياەۆ, «حالىق كەڭەسىنىڭ» باس رەداكتورى ج.كەنجالين, «سۇحباتتىڭ» باس رەداكتورى س.شۇكىروۆ, «قازاق ادەبيەتى» گازەتىنىڭ باس رەداكتورى ا.جاقسىباەۆ, «پاراسات» جۋرنالىنىڭ باس رەداكتورى س.ەلۋباەۆ, ب.نۇرجەكەەۆ, ت.ب. سويلەدى. گازەت رەداكتورىنىڭ ورىنباسارى مىڭباي ىلەس تۇس-تۇستان كەلگەن قۇتتىقتاۋ-جەدەلحاتتاردىڭ مازمۇنىمەن تانىستىردى.
ب.قىدىربەك ۇلى قۇرمەتتى ءتىلشى كۋالىگىن الۋىنا بايلانىستى راقمەتىن ايتىپ, قىسقاشا لەبىز ءبىلدىردى. ب.تولەگەنوۆا «قالام ۇشىنان قۋانىشتى ماقالالار شىعا بەرسىن» دەپ, ىستىق تىلەگىن قوسىپ, ەكى ءان شىرقاپ بەردى. ...سالتاناتتى كەش ساعات 19.10-دا اياقتالدى. ءۇش ساعاتقا سوزىلىپتى.
20.12.1994 باس رەداكتور ءبارىمىزدىڭ باسىمىزدى قوسىپ, تۇستەن كەيىن ساعات 15.00-دە ن.نازارباەۆ ءوزىنىڭ اقورداسىندا قابىلدايتىنىن ايتتى. سونىمەن, جاۋاپتى قابىلداۋعا باراتىنداردىڭ – رەداكتسيا باسشىلارىمەن قاتار, ءبولىم مەڭگەرۋشىلەرى مەن مەنشىكتى تىلشىلەردىڭ ءتىزىمى وقىلدى. اقوردادان ءبىر-اق شىقتىق. وندا ءبىراز تەكسەرۋ مەن باقىلاۋدان, كادىمگىدەي تىنتكىلەۋدەن ءوتىپ ۇلكەن زالعا كەلىپ جايعاستىق. سودان ساعات 15.30-17.35 ارالىعىندا ەلباسىمەن سۇحبات قۇردىق, ول كىسىنىڭ اقىل-كەڭەسىن تىڭدادىق. اراگىدىك نارىقتى ىلعي دا قارا بوياۋمەن جازاسىڭدار دەپ ءوزىمسىنىپ ۇرسىپ تا الادى ول كىسى. سوڭىنان ەلباسىمەن الدەنەشە رەت سۋرەتكە تۇستىك... سوندا باياعى شاكىرتىم جۇنىسبەك سۇلتانمۇراتوۆتى, تورعايلىق جازۋشى تولەن ابدىكوۆتى كورىپ, سالەمدەستىم.
قابىلداۋدان سوڭ رەداكتسياعا ورالدىق. ورازالين قورىتىندى ءسوز سويلەپ, قىسقا قايىردى دا بىزگە – مەنشىكتى تىلشىلەرگە ءسال-ءپال جاۋاپكەرشىلىك كەرەكتىگىن ەسكەرتتى. ...قازاق ءباسپاسوزى قاراشاڭىراعىنىڭ بەدەل-ابىرويى ءۇشىن ۇيقى-كۇلكىنى قويىپ ەڭبەك ەتۋ كەرەك قوي.
...كەشكىلىك, ساعات 17.30-دا جامبىل وبلىسىندا تىلشىلىك قىزمەتكە كىرىسكەن كوسەمالى ءساتتىباي ۇلىنىڭ بولمەسىندە ونى تىلشىلىككە قابىلدادىق. تىلشىلەر قاۋىمداستىعىنىڭ پرەزيدەنتى, تالدىقورعاندىق سەيداحمەت مۇحامەتشين باستاعان ارىپتەستەر وعان ءبىراز اقىل-كەڭەس بەردى.
ازاعاڭ – توقسان جىلدىقتا
22-24.12.2009 «ەگەمەن قازاقستان» گازەتىنىڭ شىعا باستاعانىنا – 90 جىل تولۋىنا ارنالعان سالتاناتتى ءىس-شاراعا الماتىدان ارنايى كەلىپ ءازىلحان نۇرشايىقوۆ تا قاتىستى. 87 جاستاعى قارت جازۋشى, تىپ-تىڭ, ەلگەزەك, جىلى جىميىسپەن ماڭايىن نۇرلاندىرىپ ءجۇر. جول باستاۋشى ەتىپ, قاسىنا مەنى ءبولىپ قويعان ەدى. ەكەۋمىز ەگىزدەي قوسارلانىپ, ءبىر ەلى اجىرامايمىز. 23 جەلتوقساندا ەلباسى ن.ءا.نازارباەۆتىڭ «ەگەمەن قازاقستان» گازەتىنىڭ رەداكتسياسىندا بولاتىنى كۇنى بۇرىن بەلگىلى ەدى. ول كىسىنى قارسى الۋ مەزەتىندە ءسوز سويلەۋ ازاعاڭا جۇكتەلگەن-ءتىن. «دانيار» قوناقۇيىندە الدىن الا جازىپ قويعان سول ءسوزىن پىسىقتاپ وقۋدان جالىقپايدى. ماعان تىڭداتادى. «نە دەيسىڭ؟» دەگەندەي, باسىن كوتەرىپ, يەگىن قاعادى. «جاقسى ەكەن!» دەيمىن ىزەتپەن.
ءبارى ويداعىداي بولا بەرە مە؟ ەلباسى «ەگەمەنگە» تۇسكە شەكتى كەلدى دە, رەداكتسيا بولمەلەرىنىڭ كەيبىرىنە جەدەل كىرىپ شىعىپ, كىرەبەرىس حوللدا ءسال ايالداپ, ۇجىمدىق سۋرەتكە ءتۇسىپ سۋىت اتتانىپ كەتتى دە ازاعاڭ ءسوز سويلەي الماي قالدى. بىراق بۇل وكىنىشتىڭ ەسەسى سول كۇنى كەشتە ك.بايسەيىتوۆا اتىنداعى وپەرا جانە بالەت تەاترىندا وتكەن سالتاناتتى جيىندا قايتارىلعان ەدى.
ساحنادا ءا.نۇرشايىقوۆ دايىن ءسوزىن ساڭقىلداپ وقىپ تۇر. جۇرەككە جەتكەن اندەي بويدى شىمىرلاتادى. ساف اۋاداي تىنىس اشادى. «...ەندى «ەگەمەن قازاقستانعا» كەلەيىن. قازاق ءباسپاسوزىنىڭ التىن شاڭىراقتى اق ورداسى – «ەگەمەن قازاقستان». كورنەكتى قازاق جازۋشىلارى مەن جۋرناليستەرىنىڭ ۇشقان ۇياسى, ۇشار ۇياسى – «ەگەمەن قازاقستان». قازاق حالقى رۋحىنىڭ الاتاۋداي بيىك اسقارى, ەسىل مەن ەرتىستەي سارقىلماس ءنارى – «ەگەمەن قازاقستان». قازاق حالقىنىڭ رۋحاني ماڭگىلىك ازىعى, قازاقستاندىقتاردىڭ بىرلىگى مەن ىنتىماعىنىڭ مىزعىماس قازىعى – «ەگەمەن قازاقستان». – وسىلايشا, ارىنان باسا الماعان تۇلپارداي تارپىنعان ول اڭگىمەسىنىڭ ادەمى دە ءدامدى جەرىنە كەلدى: «ۇلتتىق ءداستۇرىمىز بويىنشا توي بولعان جەردە شاشۋ شاشىلادى. مەن ءوز گازەتىمىزدىڭ 90 جىلدىعىنا 90 كىتاپ اكەلەيىن دەپ ەدىم, كوتەرە المادىم. التى بۋما – 60 كىتاپ اكەلدىم مىقشىڭداپ. ەندى ايتايىن دەگەنىم: تويعا جينالعان بارشا قاۋىمدى امان-ساۋ بولىپ, «ەگەمەن قازاقستاننىڭ» 100 جىلدىق تويىن بىرگە تويلاۋعا شاقىرامىن».
...سويتكەن ازاعاڭ, جۇرتتى 100 جىلدىق تويعا شاقىرىپ, ءوزى وسى سوزىنەن 1 جىل ەكى اي وتكەندە, ماڭگىلىك ومىرىنە اتتانىپ كەتە بارعان ەدى. ...ازاعاڭمەن بىرگە وتكىزگەن 3 كۇن ەستە بەرىك بەدەرلەنىپ قالىپتى. كەڭكىلدەپ ك ۇلىپ, كەرەكتى عانا اڭگىمە ايتاتىن اسىل اعا ەدى-اۋ!
– سىرتتا 30 گرادۋس اياز, ازاعا, استانانى ارالاعىڭىز كەلىپ تۇر-اۋ! – دەدىم سىر تارتىپ.
– ءوزىڭ قاسىمدا باردا, ماعان جىلى سەكىلدى! – دەيدى جان اعام. – قادىرلى جەرلەرىن كورىپ قالايىن دا...
مۇندايدا تۇرىس بار ما!.
توقسان بەستەگى تاريحناما
20-21.12.2014 توي قازاقستان رەسپۋبليكاسىنىڭ ۇلتتىق مۇراجايىندا ءوتتى. سالتاناتتى ءراسىمدى ءماجىلىس زالىندا گازەت باسشىسى ساۋىتبەك ابدراحمانوۆ جۇرگىزىپ وتىردى. قر مەملەكەتتىك حاتشىسى گ.ابدىحالىقوۆا كىرىسپە سوزىندە گازەت تاريحىن تەرەڭنەن قوزعاپ, بۇگىنگى تابىستارىن, ەرتەڭگى مىندەتتەرىن باياندادى. گازەت تيراجى 203 394 داناعا جەتتى! بۇل – بۇرىن-سوڭدى بولماعان كورسەتكىش! مەرەيتويعا ارنالىپ بۋكلەت شىعارىلىپتى. قازاقستان رەسپۋبليكاسىنىڭ پرەزيدەنتى سىيلىعىنىڭ لاۋرەاتتارى تورتەۋ ەكەنبىز: ەرجۇمان سمايىل, ەركىن قىدىر, ساۋىتبەك ابدراحمانوۆ جانە مەن. ۇشەۋى دە گازەت باسشىلارى. جۋرنالشىلار قۋانىشىندا شەك جوق. ءار وبلىستان دەلەگاتسيالار كەلدى. قۇرامىندا – مەنشىكتى ءتىلشى, وبلىس اكىمدىگىنىڭ وكىلى, ت.ب. ايتۋلى اقىن-جازۋشىلار. وزىندىك سىي-سياپاتتارىن جاسادى.
...ءيا, «ەگەمەنمەن» 2015 جىلدىڭ العاشقى كۇندەرىنەن باستاپ قوشتاساتىن سىڭايلىمىز (قىزمەتتىك شتاتتى تىيامىز). تاۋبە, زەينەتكەرلىك 63 جاستان سوڭ دا رەداكتسيادا 5 جىل ەڭبەك ەتىپپىز... جانە دە ساناۋلى كۇندەردەن سوڭ بولار قوشتاسار ءساتتىڭ قيماستىق سەزىمى, گازەت باسشىسى ساۋىتبەك ابدراحمانوۆتىڭ كەۋدەمە «قازاقستاننىڭ ەڭبەك سىڭىرگەن قايراتكەرى» قۇرمەتتى اتاعىنىڭ بەلگىسىن ۇجىم الدىندا قاداپ جاتقاندا تىپتەن شيىرشىق اتىپ, اۋزىما مىنا ءبىر شۋماق جولدارىن سالىپ-اق جىبەرگەن ەدى:
«قيىننان قيىستىرىپ امالمەنەن,
تاعدىردىڭ تاۋقىمەتى – قامال دەگەن.
مىنەكەي, ۇجىمىمدى قيماي تۇرمىن,
«ەگەمەننىڭ» كىرپىشى بوپ قالار دەنەم!»
...«ەگەمەن قازاقستان» 100-گە جەتسىن! اللا كۋاگەرى بولۋعا جازسىن, سول تويدىڭ!
ءجۇز جىلدىق جىلناما
21.11.2019 «ەگەمەن قازاقستان» گازەتىنىڭ 100 جىلدىعى «قازمەديا» ورتالىعىندا سالتاناتتى جاعدايدا اتاپ ءوتىلدى. مەملەكەت باسشىسى مەن تۇڭعىش پرەزيدەنتتىڭ قۇتتىقتاۋلارىن مەملەكەتتىك حاتشى ق.كوشەرباەۆ وقىدى. سەنات جانە ءماجىلىس سپيكەرلەرىنىڭ لەبىزدەرى (ن.ءجۇسىپ, ق.سۇلتانوۆ وقىدى) جەتكىزىلدى. گازەت باسشىسى دارحان قىدىرالى بارشاسىنا شىن جۇرەكتەن العىس ايتتى.
گازەتتىڭ باستاۋىندا تۇرعان تۇلعالاردىڭ مونولوگىن تەاتر ارتىستەرى وقىدى. ا.سەيدىمبەكتىڭ «سارىارقا» ءانى ورىندالدى. ء«ۇش ارىس» ءانىن (س.سەيفۋللينگە, ءى.جانسۇگىروۆكە, ب.مايلينگە ارنالعان) ق.ءجۇنىسوۆ شىرقادى. ەڭ قىسقا اڭگىمەگە جاريالانعان بايقاۋدىڭ جۇلدەگەرى بولىپ جاندوس جۇسىپبەك (وبلىستىق «قوستاناي تاڭى» گازەتىنىڭ ءتىلشىسى) تانىلدى. «ەگەمەن قازاقستاننىڭ» ءانۇرانى شىرقالعاندا (ە.ابدىحالىقوۆا) ساحنادا جاس جۋرناليستەر بايشەشەكشە قۇلپىرىپ, كوز جاۋىن الدى. مەرەكەگە وراي ۇيىمداستىرىلعان كورمە دە مازمۇندى ءارى كوزتارتارلىقتاي بولدى.
توي داستارقانى «Grand Hall Astana» مەيرامحاناسىندا جايىلدى. ميراس اسان مەن راۋان قايدار تاماشا جۇرگىزدى. ءار وبلىسقا جىر-شۋماقتارى ارنالىپ, وكىلدەرى سويلەپ, تارتۋ-تارالعىلارىن تاراتتى. شىعىستىڭ پانتاكرين ونىمدەرى بىزگە دە بۇيىردى.
ءسوز كەزەگى تيگەندە «ەڭبەكشى قازاق» گازەتى جاڭا استانا الماتىعا اۋىساتىن كۇننىڭ تۇنىندە (29.12.1928) تۇتقىندالعان م.دۋلات ۇلىنىڭ (گازەت رەداكتورىنىڭ ستيليستيكا جونىندەگى كومەكشىسى) ارمان-ماقساتىنا قاتىستى تولعادىم. «ويان, قازاق!»-تا كۇڭىرەنە تەرمەلەنگەن جەر, ءدىن, ءتىل, ءدىل ماسەلەلەرى شەشىمىن تاپقانىن ەندى وسى «ەگەمەن» قاشان سۇيىنشىلەرىن اڭساۋ رەتىندە تىلەگىمە قوستىم.
22.11.2019 رەداكتسيادا «ەگەمەن» ارداگەرلەرىنىڭ قاتىسۋىمەن شاعىن جينالىس وتكىزىلىپ, شاي ۇستىندە اڭگىمە ءوربىتىلدى. س.اقتاەۆ (تاياعىنا سۇيەنىپ, 85-تە) م.جاقىپ (قوس بالداقپەن, 81-دە) تاعىلىمعا تولى ەستەلىك تاراۋلارىن شيراتتى.
* * *
گازەتتىڭ كەشەگى سانىندا جاريالانعان ارداگەر ق.امانجولدىڭ ء«جۇز جىل» پوەما-تولعانىسى ءسوز اراسىنا سىنالانىپ, ادەبي ۇزدىك تۋىندى رەتىندە باعالاندى. وقىپ ەدىم, وڭقايىنان تۇرعان وڭدى شىعارما ەكەن. وزىنە ريزاشىلىعىمدى ايتتىم. پوەمانىڭ سوڭعى شۋماعىنا تامساندىم: ء«وزىڭسىڭ كەمەلىم دە كورەگەنىم, قانىما قاعيداڭدى شەگەلەدىڭ. مەنىمەن قوشتاسۋعا قاقىلىسىڭ, سەنىمەن قوشتاسپايمىن, «ەگەمەنىم»! قورعانبەك ء«جۇز جىل»-دى پوەما-تولعانىس دەپ جانرىن ايقىنداپتى. «پوەما» دەپ قانا اڭعارتقاندا...
قايسار ءالىم,
پرەزيدەنت سىيلىعىنىڭ, حالىقارالىق «الاش» ادەبي سىيلىعىنىڭ لاۋرەاتى
