فوتو: gov.kz
وقۋ-اعارتۋ مينيسترلىگىنىڭ ءباسپاسوز قىزمەتىنىڭ ءمالىم ەتۋىنشە ءۇش كۇنگە سوزىلعان ءبىلىم سايىسىنىڭ ناتيجەسى بويىنشا ەڭ جوعارى باعاعا قول جەتكىزگەن 197 وقۋشى جۇلدەگەر اتاندى, ولارعا 36 التىن, 65 كۇمىس, 96 قولا مەدال تابىستالدى.
«ۇزدىك وليمپيادالىق كوماندا» نوميناتسياسى بويىنشا I دارەجەلى ديپلوممەن الماتى وبلىسىنىڭ قۇراما كومانداسى ماراپاتتالدى. II دارەجەلى ديپلوم تۇركىستان, اتىراۋ, ماڭعىستاۋ وبلىستارى كوماندالارىنا, III دارەجەلى ديپلوم قىزىلوردا, سولتۇستىك قازاقستان, قوستاناي, باتىس قازاقستان وبلىستارى كوماندالارىنا بەرىلدى.
7 جەڭىمپاز ەلدىڭ جەتەكشى جوعارى وقۋ ورىندارىنىڭ رەكتورلىق گرانتتارىنا يە بولدى (SDU – 4, حالىقارالىق ق.ا. ياساۋي ۋنيۆەرسيتەتى – 3).
ەسكە سالايىق, رەسپۋبليكالىق وليمپيادا 13 ءپان بويىنشا ءۇش كەزەڭدە وتكىزىلىپ كەلەدى. بيىل مەكتەپىشىلىك كەزەڭگە 99 264 وقۋشى قاتىسىپ, ولاردىڭ 53 593-ءى اۋداندىق دەڭگەيگە ءوتتى. وبلىستىق كەزەڭدە 12 000 وقۋشى باق سىناسا, فينالدىق كەزەڭگە 1 000-عا جۋىق وقۋشى ىرىكتەلگەن. قوعامدىق-گۋمانيتارلىق باعىتتا 450, ال جاراتىلىستانۋ-ماتەماتيكا باعىتىندا 486 وقۋشى ءبىلىم باسەكەسىنە ءتۇستى. بارلىعى ەكى باعىت بويىنشا 418 جۇلدەگەر انىقتالدى.
سوڭعى كەزەڭگە قاتىسۋشى 940 وقۋشىنىڭ بارلىعى بولاشاق ينتەللەكتۋالدىق جارىستارعا دايىندالۋ ماقساتىندا «دارىن» رەسپۋبليكالىق سىرتتاي مەكتەبىنە قابىلداندى. ال I دارەجەلى ديپلوم يەگەرلەرى 2025 جىلدىڭ ناۋرىزىندا وتەتىن جالپى ءبىلىم بەرەتىن پاندەر بويىنشا رەسپۋبليكالىق وليمپيادانىڭ سوڭعى كەزەڭىنە قاتىسا الادى.
