بۋماكول اۋىلدىق وكرۋگىنە قاراستى وبلاۆكا اۋىلى شاعىن بولعانىمەن, شەكارانىڭ ىرگەسىندە تۇرعان ستراتەگيالىق ەلدى مەكەن. مەملەكەتتىك شەكارا ءدال اۋىل جانىنان اعاتىن جايىق وزەنى ارقىلى وتەدى. وسىدان 10 جىل بۇرىن رەسپۋبليكا قازىناسىنان قوماقتى قارجى ءبولىنىپ, وزەننىڭ جىل سايىن سۋ قۇلاتىپ كەلە جاتقان جاعالاۋى بەكىتىلگەن ەدى. اۋىلدا 228 ەرەسەك تۇرعىن بار. تاۋەلسىزدىك كۇنى قارساڭىندا وسى اۋىلدا سۋ جاڭا مەديتسينالىق پۋنكت پايدالانۋعا بەرىلدى.
جاڭا نىسان قۇرىلىسىنا 160 ملن تەڭگە جۇمسالعان. «اۋىلدا دەنساۋلىق ساقتاۋدى جاڭعىرتۋ» باعدارلاماسى اياسىندا جۇزەگە اسقان بۇل جوباعا تاپسىرىس بەرگەن – باتىس قازاقستان وبلىستىق دەنساۋلىق ساقتاۋ باسقارماسى ەكەن. قۇرىلىس-مونتاج جۇمىسى بيىلعى قىركۇيەك ايىندا عانا باستالسا دا, مەردىگەر «ۋرالسكستروينۆەست» كومپانياسى مەديتسينالىق پۋكتتى از ۋاقىت ىشىندە ساپالى ەتىپ سالىپ شىققان.
ء«بىزدىڭ بۇعان دەيىن پايدالانىپ كەلگەن عيماراتىمىز 1950 جىلدارى سالىنعان كونە ءۇي ەدى. قازىر كىرىپ وتىرعان جاڭا عيماراتىمىزدىڭ اۋماعى 155 شارشىمەتر. مۇندا دارىگەرگە دەيىنگى قاراۋ, پروتسەدۋرالىق, فيزيوتەراپيالىق كابينەتتەر, مەدبيكەنىڭ قابىلداۋ بولمەسى جانە تەحنيكالىق بۇرىش بار. قاجەتتى قۇرال-جابدىق دايىن. شتاتتا مەدبيكە, تەحنيكالىق قىزمەتكەر, كۇزەتشى جانە ەكى قازاندىق وپەراتورى جۇمىس ىستەيمىز. اۋىل تۇرعىندارىنىڭ دەنساۋلىعى ۇدايى نازارىمىزدا. ءدال قازىر اۋىلدا ءبىر جاسقا دەيىنگى 2 بالا, 14 جاسقا دەيىنگى 48 بالا بار. ەسەپتە تۇرعان جۇكتى ايەل جوق. ءبىز بۇل جەردە ناۋقاستاردى قابىلداپ, تەكسەرىپ, فۋنكتسيونالدىق مىندەتتەرىمىزگە كىرەتىن پروتسەدۋرالاردى جۇرگىزەمىز», دەيدى مەدبيكە گۇلنار تەمىرعاليەۆا.
40 جىلعا جۋىق ەڭبەك ءوتىلىنىڭ 35 جىلىن وسى اۋىلدا مەدبيكە بولىپ اتقارعان گۇلنار تەمىرعاليقىزى – ءوز ءىسىنىڭ جەتىك مامانى.
اۋىلداعى جاڭا نىساننىڭ اشىلۋ سالتاناتىندا ءبورلى اۋدانى اكىمىنىڭ ورىنباسارى مۇقتار نۇرماقوۆ قاتىسىپ, تۇرعىنداردى تاۋەلسىزدىك كۇنىمەن قۇتتىقتاپ, جاڭا مەديتسينالىق پۋنكتتىڭ ەل يگىلىگىنە قىزمەت ەتۋىنە تىلەك ءبىلدىردى. اۋىل تۇرعىندارى اتىنان ءسوز العان مەيرام تاتاەۆ زاماناۋي اپپاراتتارمەن جابدىقتالعان جاڭا عيمارات ءۇشىن مەملەكەت قامقورلىعىنا العىس ايتتى.
بۇل كۇنى ءبورلى اۋدانىنداعى اقسۋ اۋىلى تۇرعىندارى دا ءدال وسىنداي سۋ جاڭا مەديتسينالىق بەكەتكە يە بولىپ, قۋانىشقا بولەندى. اقسۋ اۋىلدىق وكرۋگىنە قاراستى اقسۋ جانە جاڭاقونىس اۋىلدارىندا 510 ادام تۇرىپ جاتىر. ەندى ولار باس اۋىرىپ, بالتىر سىزداسا اۋدانعا سابىلماي, جەڭىل-جەلپى سىرقات بولسا ءوز اۋىلىندا ساپالى ەم الاتىن بولدى. اۋىلعا بيىل عانا جولدامامەن كەلگەن مەدبيكە گۇلنار عۇسمانوۆاعا وسىدان بۇرىن قىزمەتتىك پاتەر بەرىلگەن ەدى. جاس مامان ءۇشىن الاڭسىز قىزمەت ەتەتىن بارلىق جاعداي جاسالعان.
ء«بىزدىڭ ءبورلى اۋدانىندا «اۋىلدا دەنساۋلىق ساقتاۋدى جاڭعىرتۋ» مەملەكەتتىك باعدارلاماسى وتە جاقسى جۇزەگە اسىپ كەلەدى. بىلتىر عانا اقساي قالاسىنىڭ ىرگەسىندەگى ارالتال شاعىناۋدانىندا امبۋلاتوريا پايدالانۋعا بەرىلدى. بيىل كۇزدەن بەرى قاراعاندى اۋىلىندا فەلدشەرلىك-اكۋشەرلىك بەكەت, جاڭاقونىس, وبلاۆكا, اقسۋ اۋىلدارىندا امبۋلاتوريا ىسكە قوسىلدى. بۇل جۇمىس بولاشاقتا دا جالعاسادى. بۇعان قوسا اۋىلدا تۇراتىن مەديتسينا قىزمەتكەرلەرى ءۇشىن «سوبول» ماركالى 6 اۆتوكولىك بەرىلدى», دەيدى ءبورلى اۋداندىق اۋرۋحاناسىنىڭ ديرەكتورى التىناي بايمۇراتوۆا.
تاۋەلسىزدىك مەرەكەسى قارساڭىندا ءبورلى اۋدانىندا بولعان وڭ جاڭالىقتىڭ قاتارىنا قاراشىعاناق جانە ۋسپەن اۋىلدارىنداعى تۇرعىن ۇيلەردىڭ ورتالىق سۋ قۇبىرى جۇيەسىنە قوسىلىپ, ساپالى اۋىز سۋمەن قامتاماسىز ەتىلگەنىن ايتا كەتەيىك. «اۋىل ەل بەسىگى» باعدارلاماسى اياسىندا جۇزەگە اسقان سۋ جەلىسىنىڭ جالپى ۇزىندىعى 16,5 شاقىرىم. اۋىلدا جاڭا مۇنارا مەن سۋ قويماسى ورناتىلعان.
باتىس قازاقستان وبلىسى
